ភ្នំពេញ៖ នៅថ្ងៃទី៤ ខែមីនានេះ ឯកឧត្តម ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួង​ការបរទេស និងកិច្ចសហប្រតិបត្តិការអន្តរជាតិ បានអញ្ជើញគោរពវិញ្ញាណក្ខន្ធ សពកង​កម្លាំង​រក្សា​សន្តិភាព​អង្គការសហប្រជាជាតិ (UN) របស់កម្ពុជា វរៈសេនីយទោ ភឿក ជីវ័ន្ត ដែល​បាន​ពលី​ជីវិត នៅក្នុងតំបន់បេសកកម្មថែរក្សាសន្តិភាពUN នៅប្រទេសមាលី កាលពីថ្ងៃទី៩ កុម្ភៈ​កន្លង​ទៅ​នេះ។

ឯកឧត្តម ឧបនាយករដ្ឋមន្ត្រី ប្រាក់ សុខុន ក្នុងនាម​ប្រធាន​គណៈកម្មាធិការជាតិ​សម្រប​សម្រួល​ការ​បញ្ជូន​កងកម្លាំងរក្សាសន្តិភាពផងដែរនោះ ពេល​អញ្ជើញ​គោរព​វិញ្ញាក្ខន្ធ​នៅ​គេហដ្ឋាន​គ្រួសារ​សព ក៏បាននាំយក​សារលិខិតរំលែកទុក្ខដ៏ក្រៀមក្រំ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា ជូនលោកស្រី វង្ស ស្រីខួច ភរិយាគ្រួសារសព នៅភូមិ​ត្រពាំង​សំរិត សង្កាត់គងនយ ខណ្ឌដង្កោ រាជធានីភ្នំពេញ។

ក្នុងសារលិខិតនោះ បានសរសេរថា សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុនសែន បានទទួលដំណឹងដ៏ក្រៀមក្រំ ក្តុកក្តួល និងសោកស្តាយជាទីបំផុត ដោយលោក វរសេនីយ៍ទោ ភឿក ជីវន្ត មេបញ្ជាការរងកងវិស្វកម្មព្រលានយន្តហោះលេខ៧២៩ ប្រចាំតំបន់ បេសកម្មរក្សាសន្តិភាពរបស់អង្គការសហប្រជាជាតិUN នៅសាធារណរដ្ឋម៉ាលី បានពលី ដោយ​ជំងឺ​សួត​ធ្ងន់ធ្ងរ នៅថ្ងៃទី៩ ខែកុម្ភៈឆ្នាំ២០២៣នេះ វេលាម៉ោង ២២និង៥០ យប់ ម៉ោងនៅ​ប្រទេស​ម៉ាលី។

ក្នុងសារលិខិតសម្តេចតេជោ បានសរសេរទៀតថា ការបាត់បង់រូប វរសេនីយ៍ទោ ភឿក ជីវ័ន្ត​គឺ​ជា​ការ​បាត់​បង់​យោធិនមួយរូប ដែលមានការលះបង់កម្លាំងកាយចិត្ត ដើម្បីបម្រើជាតិមាតុភូមិ និង​ប្រជាជន ព្រមទាំងបា​​ន​ចូលរួម​ចំណែក​ដោយ​ស្ម័គ្រ​ចិត្ត​ក្នុង​បេសកកម្ម​រក្សា​សន្តិភាព​របស់​UN​ក្នុង​នាម​មនុស្សធម៌។

ក្នុងក្របខណ្ឌ នៃការបំពេញបេសកកម្ម វរសេនីយទោ ភឿក ជីវ័ន្ត បាន​យកចិត្ត​ទុក​ដាក់​អនុវត្ត​ការងារ​យ៉ាង​សកម្មប្រកបដោយស្មារតីទទួលខុសត្រូវខ្ពស់ ដើម្បីចូលរួមលើកកម្ពស់កេរ្តិ៍ឈ្មោះ កិត្តិយសជាតិ មាតុភូមិ ក៏ដូចជាកងយោធពលខេមរភូមិលើឆាកអន្តរជាតិ។

ក្នុងឱកាសអញ្ជើញគោរពវិញ្ញាណក្ខន្ធសពទ័ពមួកខៀវនេះដែរ ឯកឧត្តម ឧបនាយករដ្ឋមន្ត្រី ប្រាក់ សុខុន បាន នាំយកថវិកាសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ចំនួន ១ម៉ឺន​ដុល្លារអា​មេរិកជូនលោកស្រី វង្ស ស្រីខួច ភរិយាគ្រួសារសពផងដែរ។

សូមបញ្ជាក់ថា មកដល់ពេលនេះ កម្ពុជា មានកម្លាំងមួកខៀវសរុបចំនួន៨៨៥៩នាក់ ក្នុងនោះ​នារី​ចំនួន ៦៨១នាក់ ធ្លាប់បានបញ្ជូនចេញបំពេញបេសកកម្មរក្សាសន្តិភាពUN នៅតាម​បណ្តា​ប្រទេស​ចំនួន៩ ដែល មាន១១បេសកកម្ម ក្នុងនោះមានកម្លាំងមួកខៀវកម្ពុជា ចំនួន ១១នាក់ បាន​រងពលីនៅក្នុងតំបន់បេសកកម្ម៕ អត្ថបទ៖ ស៊ុម សុខជា