​បាល់ទាត់៖ ​ខ្សែប្រយុទ្ធ​ជួរមុខ​ទាំងពីរ​នាក់​របស់ Paris Saint Germain, Kylian Mbappe​ និង Neymar បានធ្វើការ​ហ្វឹកហាត់​ជុំ​​គ្នា​ជាមួយ​មិត្ត​រួម​ក្រុម ​ត្រៀមលក្ខណៈ​សំរាប់​ការប្រកួត​វគ្គ​ពាក់កណ្តាល​ផ្តាច់ព្រ័ត្រ​ជើង​ទី១ ជួប Manchester City​។​ ​​ខ្សែប្រយុទ្ធ​បារាំង Kylian Mbappe ​បាន​រងរបួស​ភ្លៅ​អំឡុង​ជ័យជំនះ​របស់ PSG លើ Metz ៣-១ ចុង​សប្តាហ៍​កន្លងទៅ​ដែល​ធ្វើអោយ​អ្នកចាត់ការ Mauricio Pochettino ​នៅពេលនោះ​បង្ហាញ​ក្តីបារម្ភ​។

​​តែ​នៅពេលនេះ​កីឡាករ​សំខាន់​ទាំង​ ២រូប​បានបង្ហាញ​ខ្លួន​នៅ​ទីលាន​ហ្វឹកហាត់​ធម្មតា​។ ​​PSG និង Manchester City កំពុង​ស្វែង​រកពាន UEFA Champions League លើកដំបូង​ដូចគ្នា​ ខណៈ​អ្នកចាត់ការ PSG លោក Mauricio Pochettino ​បានបង្ហាញ​អារម្មណ៍​កោតសរសើរ​ដល់​លោក Pep Guardiola អ្នកចាត់ការ Manchester City​។ ​​មិន​ផ្លាស់ប្តូរ​ទេ PSG នឹងមាន​កីឡាករ​ជួរមុខ​ទាំងបី​នាក់​ក្នុងនោះ Kylian Mbappe ​កណ្តាល​គាំទ្រ​ដោយ​ស្លាប​ប្រយុទ្ធ​ទាំងពីរ Neymar និង Angel Di Maria​។​ ​​Kylian Mbappe ​មកដល់ពេលនេះ​រកបាន ៣៧គ្រាប់​ហើយ​គ្រប់​ក្របខណ្ឌ​អោយ PSG រដូវ​កាល​នេះ​។ PSG មិនមាន​បញ្ហា​របួស​ឡើយ​ក្នុងនោះ Marquinhos​ ទើប​ត្រលប់មក​ហ្វឹកហាត់​វិញ ស្របពេល​ខ្សែបំរើ Marco Verratti ​ក៏​ដូចគ្នា​ដែរ និង​បាន​ចូល​លេង​ពេញ​ម៉ោង​ពេល PSG ជួប Metz៕

​អត្ថបទ​៖​នាង សុភា​វុ​ធ