ភ្នំពេញ៖ ព្រឹទ្ធសភាជាតិ បានធ្វើវិសោធនកម្មបទបញ្ជាផ្ទៃក្នុង ដើម្បីអនុញ្ញាតឲ្យដំណើរការសម័យប្រជុំព្រឹទ្ធសភា អាចធ្វើទៅតាមប្រព័ន្ធអេឡិចត្រូនិក ស្របតាមមាត្រា ១០៩ថ្មី នៃរដ្ឋធម្មនុញ្ញផ្ទៃក្នុងព្រឹទ្ធសភា និងការអនុវត្តជាក់ស្ដែងក្នុងបរិបទកូវីដ-១៩ ។

បន្ទាប់ពីសម័យប្រជុំលើកទី១០ ព្រឹទ្ធសភានីតិកាលទី៤ ដឹកនាំដោយឯកឧត្តមកិត្តិនីតិកោសល បណ្ឌិត ស៊ឹម កា ប្រធានស្តីទីព្រឹទ្ធសភា នៅថ្ងៃទី៦ ខែមីនា ឆ្នាំ២០២៣ ឯកឧត្តម ម៉ម ប៊ុននាង អ្នកនាំពាក្យព្រឹទ្ធសភា មានប្រសាសន៍ថា អង្គប្រជុំបានពិនិត្យ និងអនុម័តលើសេចក្តីស្នើវិសោធនកម្ម​បទបញ្ជាផ្ទៃក្នុងព្រឹទ្ធសភា ដោយមានសមាជិកហត្ថលេខីចំនួន ២១រូប បានស្នើវិសោធនកម្មបទ​បញ្ជាផ្ទៃក្នុង ត្រង់ប្រការ២ ប្រការ៧ ប្រការ៨ ប្រការ២៩ ប្រការ៣៩ ប្រការ៤២ ប្រការ ៥៧ ប្រការ៦០ ប្រការ៧២ និងប្រការ៨៤ ។

ឯកឧត្តមបន្តថា សេចក្តីស្នើនេះ ធ្វើឡើងក្នុងគោលបំណងសំខាន់ៗ ដើម្បីបង្កើតឱ្យមាននីតិវិធី​អនុវត្តជាក់លាក់ សម្រាប់ធានាការប្រព្រឹត្តទៅដោយរលូន ក្នុងដំណើរការសម័យប្រជុំដំបូង នៃនីតិកាលនីមួយៗ របស់ព្រឹទ្ធសភា ស្របតាមស្មារតីមាត្រា ១០៦ ថ្មី (ពីរ) មាត្រា ១០៩ថ្មី និងមាត្រ ១១៤ថ្មី (មួយ)នៃរដ្ឋធម្មនុញ្ញ និងសង្គតិភាពទៅនឹងការអនុវត្តរបស់រដ្ឋសភា ។

អ្នកនាំពាក្យបន្ថែមថា ដើម្បីអនុញ្ញាតឱ្យដំណើរការសម័យប្រជុំព្រឹទ្ធសភា អាចធ្វើទៅតាមប្រព័ន្ធ​អេឡិចត្រូនិក ស្របតាមស្មារតីមាត្រា ១០៩ថ្មី នៃរដ្ឋធម្មនុញ្ញ ប្រការ ៦១ នៃបទបញ្ជាផ្ទៃក្នុងព្រឹទ្ធសភា និងការអនុវត្តជាក់ស្តែងក្នុងបរិបទកូវីដ-១៩, ដើម្បីធានាឱ្យអគ្គលេខាធិការដ្ឋានព្រឹទ្ធសភា ក្នុងការទំនាក់ទំនងការងាររបស់ព្រឹទ្ធសភាជាមួយនឹងក្រសួង ស្ថាប័ន និងដៃគូអភិវឌ្ឍនានា ព្រមទាំងបំពេញការងារការទូតសភា ឱ្យកាន់តែមានប្រសិទ្ធភាព និងសង្គតិភាពទៅ​នឹងការអនុវត្តរបស់រដ្ឋសភា ។

ឯកឧត្តម ម៉ម ប៊ុននាង បានបញ្ជាក់ថា ជារួមការធ្វើវិសោធនកម្មបទបញ្ជាផ្ទៃក្នុងព្រឹទ្ធសភា រៀបចំឡើងដើម្បីកែសម្រួលបំពេញបន្ថែមនូវខ្លឹមសារ ដើម្បីឱ្យមានសង្គតិភាពទៅនឹងរដ្ឋធម្មនុញ្ញ ច្បាប់ បរិបទនៃការវិវឌ្ឍថ្មី និងការអនុវត្តរដ្ឋសភា ព្រមទាំងស្របទៅនឹងស្ថានភាព នៃការអនុវត្តជាក់​ស្តែងក្នុងការធានាបាននូវនិរន្តរភាព និងកិច្ចដំណើរការជាប្រក្រតីរបស់ព្រឹទ្ធសភា ហើយ​អង្គប្រជុំព្រឹទ្ធសភាបានពិនិត្យ និងអនុម័តលើសេចក្តីស្នើវិសោធនកម្មបទបញ្ជាផ្ទៃក្នុងព្រឹទ្ធសភា ដោយមានសំឡេងគាំទ្រចំនួន ៥៩សំឡេង នៃចំនួនសមាជិកព្រឹទ្ធសភាទាំងមូល ។

គួរបញ្ជាក់ថា ក្នុងសម័យប្រជុំនេះ ព្រឹទ្ធសភាក៏បាន ស្តាប់របាយការណ៍ស្តីពីសកម្មភាព និងលទ្ធផលការងាររបស់ព្រឹទ្ធសភា នៅចន្លោះសម័យប្រជុំលើកទី៩ និងលើកទី១០ ដោយក្នុងអំឡុងពេលចន្លោះសម័យប្រជុំព្រឹទ្ធសភាបីខែនេះ ថ្នាក់ដឹកនាំ គណៈកម្មាធិការអចិន្ដ្រៃយ៍ គណៈកម្មការ ក្រុមភូមិភាគនានា ក្រុមសមាជិកាព្រឹទ្ធសភា និងសមាជិក សមាជិកាព្រឹទ្ធសភា បាន ខិតខំបំពេញភារកិច្ចរៀងៗខ្លួន ហើយសម្រេចបានលទ្ធផលផ្លែផ្កាជាគុណប្រយោជន៍ដល់ជាតិ និងប្រជាពលរដ្ឋ ៕ អត្ថបទ បាន សុខរិទ្ធិ