ភ្នំពេញ៖ ឪពុកម្ដាយ អាណាព្យាបាល នៃបេក្ខជនប្រឡងចូលបម្រើវិស័យកងទ័ព បានសម្ដែងនូវមោទកភាព ចំពោះកូនៗរបស់ពួកគេ ដែលមានបំណងចង់បម្រើប្រទេសជាតិ ។

ក្នុងពេលរង់ចាំកូនប្រឡង កាលពីថ្ងៃទី៥ ខែមីនា ឆ្នាំ២០២៣ ប្រជាពលរដ្ឋ បានលើកឡើងថា ការដែលកូនៗពួកគេមកប្រឡងនេះ សុទ្ធសឹងតែជាបំណងប្រាថ្នា និងចំណង់ចំណូលចិត្តរបស់​ពួកគេ ដោយក្នុងនាមជាឪពុកម្ដាយ​ ក៏បានគាំទ្រ ​និងបានជំរុញលើកទឹកចិត្តបន្ថែម ។

ពលរដ្ឋបានបន្តថា ទោះបីដឹងថា ការធ្វើជាកងទ័ព មានការលំបាក ជាពិសេសនៅពេលហ្វឹកហាត់ តែយ៉ាងណា ​ការងារនេះ គឺដើម្បីការពារប្រទេសជាតិ ​ឲ្យបន្តមានសុខសន្តិភាព និង​ប្រជាពលរដ្ឋទាំងអស់ រស់នៅប្រកបដោយភាពសប្បាយរីករាយ ដូចនេះពួកគេ មានមោទកភាព​យ៉ាងខ្លាំងចំពោះកូនខ្លួន ។

នៅឆ្នាំនេះ ក្រសួងការពារជាតិ បានជ្រើសនាយទាហាន​ នៃកងយោធពលខេមរភូមិន្ទ ក្នុងនោះ បាន​កំណត់​សន្ទស្សន៍​ នៃការជ្រើសរើសនាយទាហានសកម្ម ជំនាន់ទី២៥ ចំនួន១០០នាក់, នាយទាហាន ទ័ពជើងគោក ជំនាន់ទី១៣ ចំនួន១០០នាក់, នាយទាហាន​បន្តវេន​ ជំនាន់ទី១៤ ចំនួន១៥០នាក់ និង នាយ​ទាហានជំនាញបច្ចេកទេសយោធា ​ចំនួន ៣០នាក់ ។

កាលពីថ្ងៃទី៥ ខែមីនា នេះ ក្រសួងការពារជាតិ ​បានរៀបចំការប្រឡងចូលក្របខណ្ឌកងទ័ព ​ដែល មាន​បេក្ខជនដាក់ពាក្យប្រឡង ចំនួន៦ពាន់ ៣៩៩នាក់ ​ក្នុងនោះមាននារីចំនួន ២ពាន់ ៩៩៨នាក់ នៅតាម ​មណ្ឌលចំនួន៤ ក្នុងរាជធានីភ្នំពេញ ​ដែលមានសាលាវិទ្យាល័យបាក់ទូក, វិទ្យាល័យជាស៊ីមសន្ធរម៉ុក, វិទ្យា ល័យ ប៊ុន រ៉ានី ហ៊ុនសែនវត្តភ្នំ និងវិទ្យាល័យឥន្ទ្រាទ្ទទេវី ដែលមានការប្រឡងលើវិញ្ញាសា ចំណេះដឹងទូទៅ, ភាសាអង់គ្លេស និងវិញ្ញាសារកាយសម្បទា ៕អត្ថបទ៖ បាន សុខរិទ្ធិ