ភ្នំពេញ៖ ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល ថ្លែងក្នុងពិធីបើកសន្និបាតបូកសរុបការងារសុខាភិបាលទូទាំងប្រទេស លើកទី៤២ និងបូកសរុបសមិទ្ធផលសុខាភិបាលរយៈពេល៥ឆ្នាំ នាព្រឹកថ្ងៃទី៦ ខែមីនា ឆ្នាំ២០២៣នេះថា ក្រសួង មានមោទនភាពក្នុងការបម្រើសុខភាពជូនប្រជាពលរដ្ឋប្រកបដោយប្រសិទ្ធភាព។

ក្នុងឱកាសនេះ ឯកឧត្តម រដ្ឋមន្រី្ត ក៏សូមសម្តែងនូវការកោតសរសើរដ៏ស្មោះដល់ថ្នាក់ដឹកនាំ និងមន្ត្រីរាជការ បុគ្គលិកសុខាភិបាលគ្រប់លំដាប់ថ្នាក់ ដែលបានខិតខំបំពេញភារកិច្ចក្នុង​រយៈពេល​កន្លងមកនេះ យ៉ាងយកចិត្តទុកដាក់តាមតួនាទី ភារកិច្ចរបស់ខ្លួន ប្រកបដោយស្មារតីទទួល​ខុស​ត្រូវខ្ពស់ និងទទួលបានសមិទ្ធផលដ៏គួរជាទីមោទនៈ។

ឯកឧត្តមសាស្ត្រាចារ្យ ម៉ម ប៊ុនហេង បានសង្កត់ធ្ងន់ថា ក្នុងរយៈពេល២ថ្ងៃ នៃអង្គសន្និបាត​សុខាភិបាល​លើកទី៤២នេះ សង្ឃឹមយ៉ាងមុតមាំថា ឯកឧត្តម លោកជំទាវ លោក លោកស្រី នឹងខិតខំពិនិត្យ ពិចារណា ពិភាក្សាផ្លាស់ប្តូរយោបល់គ្នា ​ដើម្បីដកស្រង់​ យកបទពិសោធន៍ល្អៗ យើង​ក៏ពិនិត្យផងដែរ នូវបញ្ហាប្រឈមដែលយើងត្រូវជម្នះ ដោះស្រាយដោយមិន អល់ឯក ឬរង់ចាំ ដើម្បីយកទៅអនុវត្តបន្តនៅតាមអង្គភាព ​មូលដ្ឋានរបស់ខ្លួនឲ្យបានជោគជ័យ និងប្រសិទ្ធភាព​បន្ថែមទៀត។ ជាពិសេសទៅទៀតនោះ អង្គសន្និបាតទាំងមូលនឹងបាន​ត្រងត្រាប់ស្ដាប់ និងទទួល​យកនូវអនុសាសន៍ដ៏មានសារសំខាន់របស់សម្ដេចតេជោ ហ៊ុន សែន នាយករដ្ឋមន្ត្រី ដែលសម្ដេចតេជោ នឹងអញ្ជើញផ្តល់កិត្តិយសដ៏ខ្ពង់ខ្ពស់បំផុត នៅពេលបិទសន្និបាត នាថ្ងៃស្អែកនេះ។

បើតាមឯកឧត្តមវេជ្ជបណ្ឌិត ឡូ វាសនាគីរី រដ្ឋលេខាធិការ បានធ្វើរបាយការណ៍សង្ខេបសមិទ្ធផល​សុខាភិបាល ឆ្នាំ២០១៨-២០២២ និងទិសដៅឆ្នាំ២០២៣ និងឆ្នាំបន្ត ឲ្យដឹងថា ចំនួនមូលដ្ឋាន​សុខាភិបាលសាធារណៈ ពីឆ្នាំ២០១៨-២០២២ ក្នុងនោះប្រភេទមូលដ្ឋានសុខាភិបាលសាធារណៈ តាមរាជធានី-ខេត្ត ឆ្នាំ២០២២ ស្រុកប្រតិបតិ្ត ចំនួន១០៣, មនី្ទរពេទ្យរាជធានី-ខេត្ត ចំនួន២៥, មនី្ទរពេទ្យបង្អែកស្រុក ចំនួន៩៥, មណ្ឌលសុខភាព ចំនួន១,២៨៨ និងប៉ុស្តិ៍សុខភាពចំនួន១២៥ និងមនី្ទរពេទ្យជាតិ សរុបចំនួន១២(មនី្ទរពេទ្យកាល់ម៉ែត, មនី្ទរពេទ្យមិត្តភាពខ្មែរ-សូវៀត, មនី្ទរពេទ្យមិត្តភាពកម្ពុជា-ចិន ព្រះកុសុមៈ, មនី្ទរពេទ្យកុមារជាតិ, មនី្ទរពេទ្យគន្ធបុប្ជា, មនី្ទរពេទ្យព្រះអង្គឌួង, មនី្ទរពេទ្យជ័យវរ្ម័នទី៧, មនី្ទរពេទ្យសម្ភព និងរោគស្រី្ត នៃមជ្ឈមណ្ឌលជាតិគាំពារមាតា និងទារក, មនី្ទរពេទ្យរបេង នៃមជ្ឈមណ្ឌលជាតិកំចាត់រោគរបេង និងហង់សិន, មនី្ទរពេទ្យជាតិ តេជោសន្តិភាព, មនី្ទរពេទ្យហ្លួងម៉ែ និងមនី្ទរពេទ្យព្រះសីហនុ នៃមណ្ឌលកី្តសង្ឃឹម។

ជាមួយគ្នានោះដែរលោកស្រី Li Ailan តំណាងអង្គការសុខភាពពិភពលោក ប្រចាំកម្ពុជា បានលើក​ឡើងថា អង្គការសុខភាពពិភពលោក ដៃគូសុខាភិបាល​ និងម្ចាស់ជំនួយទាំងអស់ នៅតែ​បន្តប្តេជ្ញា​ចិត្តធ្វើការងារប្រកៀកស្មាគ្នាជាមួយនឹងបុគ្គលិកថែទាំសុខភាព និងរដ្ឋាភិបាល​នៃព្រះរាជា​ណាចក្រ​កម្ពុជា ជាពិសេសក្រសួងសុខាភិបាល ​ក្នុងការអនុវត្តផែនការយុទ្ធសាស្រ្តសុខាភិបាល៕ អត្ថបទ រដ្ឋា