ទួរគី៖ ប្រទេសទួរគីប្រឈមមុខនឹងបញ្ហានៃការបន្តការជួយសាងសង់ឡើងវិញ នៅក្នុងតំបន់ទទួលរងដោយរញ្ជួយដីដ៏មានឥទ្ធិពលកាលពីមួយខែកន្លងទៅនេះ។ រញ្ជួយដីកម្រិត ៧.៨រ៉ិចទ័របានវាយប្រហារនៅភាគខាងត្បូងប្រទេសទួរគី នៅជិតព្រំដែនប្រទេសស៊ីរីកាលពីថ្ងៃទី៦ ខែកុម្ភៈ។
ការរញ្ជួយដី និងរំញ័រជាបន្តបន្ទាប់បណ្តាលឲ្យមនុស្សជិត ៥២.០០០នាក់ស្លាប់ ដែល ៤៥.៩៦៨នាក់នៅក្នុងប្រទេសទួរគី និង ៥.៩១៤នាក់នៅក្នុងប្រទេសស៊ីរី។ រដ្ឋាភិបាលទួរគីនិយាយថា អគារជាង ២០០,០០០ខ្នងបានបាក់រលំ ឬត្រូវបានបំផ្លាញយ៉ាងធ្ងន់ធ្ងរនៅក្នុងប្រទេស។ ក្រុមមន្ត្រីបាននិយាយថា មនុស្ស ១៤លាននាក់ ឬ ១៦ភាគរយនៃចំនួនប្រជាជនប្រទេសទួរគីបានបាត់បង់លំនៅឋានរបស់ពួកគេ ឬបានរងផលប៉ះពាល់។ មនុស្សជាង ១.៤៤លាននាក់ត្រូវបានរាយការណ៍ថា បានបង្ខំឱ្យស្វែងរកទីជម្រកនៅក្នុងតង់ ប៉ុន្តែអ្នកជម្លៀសខ្លួនកំពុងត្អូញត្អែរថា ទឹក អាហារ និងរបស់របរប្រើប្រាស់ប្រចាំថ្ងៃផ្សេងៗទៀត មិនត្រូវបានផ្តល់ឲ្យមកកាន់តំបន់រងគ្រោះនោះទេ។
ប្រជាជនមួយចំនួននៅក្នុងខេត្ត Kahramanmaras ភាគខាងត្បូងដែលរងគ្រោះខ្លាំង នៅតែបន្តរស់នៅក្នុងតង់ក្រោមស្ថានភាពលំបាក គ្មានអគ្គិសនី និងទឹកប្រើប្រាស់ ដែលពួកគេបានរិះគន់រដ្ឋាភិបាលថា មិនបានយកចិត្តទុកដាក់ចំពោះពលរដ្ឋភៀសខ្លួនកំពុងស្នាក់នៅក្នុងតង់។ នៅក្នុងប្រទេសស៊ីរី អ្នកនៅរស់រានមានជីវិតនៅតំបន់ភាគពាយ័ព្យនៃគ្រោះរញ្ជួយដីរបស់ប្រទេស ដែលគ្រប់គ្រងដោយកងកម្លាំងប្រឆាំងរដ្ឋាភិបាលទំនងជាពុំទទួលបានជំនួយសង្គ្រោះគ្រប់គ្រាន់នោះទេ។ ធនាគារពិភពលោកបាននិយាយថា ការរញ្ជួយដីដែលបានវាយប្រហារប្រទេសស៊ីរីកាលពីខែមុន បានបណ្តាលឱ្យមានខាតបង់តាមការប៉ាន់ប្រមាណមាន ៥.១ពាន់លានដុល្លារក្នុងការបំផ្លាញដោយផ្ទាល់។ តួលេខនេះប្រហែល ១០ភាគរយនៃផលិតផលក្នុងស្រុកសរុបរបស់ប្រទេស៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
