​ប្រណាំង​រថយន្ត៖ ​រដូវ​កាល​ថ្មី ២០២៣ Formula One ពិភពលោក​បានចាប់ផ្តើម​ហើយ​ចេញពី​ទីលាន​ដំបូង​នៅ​ប្រទេស​បា​រ៉ែ​ន​។ ​​ក្រុម​ការពារ​តំណែង​ជើងឯក​ពិភពលោក Red Bull ក៏ដូចជា​អ្នកការពារ​តំណែង​ជើងឯក​ពិភពលោក Max Verstappen នៅតែ​គ្រប់គ្រង​ជ័យជំនះ​នៅ​បា​រ៉ែ​ន​តាមរយៈ​ការបញ្ចប់​ទី​លេខ ១ និង​លេខ ២ ដោយ​មិត្ត​រួម​ក្រុម Sergio Perez​។

​​អ្វីដែល​ជាការ​កត់សំគាល់​នៅ​ជុំ​ដំបូង​នេះ​គឺអតីត​ជើងឯក​ពិភពលោក Fernando Alonso បានធ្វើ​ឱ្យ​មាន​ការចាប់​អារម្មណ៍​ក្នុងការ​ប្រកួត​នៅ​បា​រ៉ែ​ន​នេះ​ជាមួយនឹង​រថយន្ត Aston Martin របស់គេ​។ ​​កីឡាករ​វ័យ ៤១ឆ្នាំ​រូបនេះ​ធ្វើបាន​លឿន​ជាងគេ​ក្នុងពេល​សាកល្បង​កាលពី​ថ្ងៃ​សុក្រ តែ​ធ្វើ​មិន​បានល្អ​នៅពេល​ប្រណាំង​យក​ទី​ចេញដំណើរ​នៅ​ថ្ងៃ​សៅរ៍​។ ​​តែ​ការប្រកួត​ម្សិលមិញ Alonso ដែល​ចេញពី​លំដាប់ថ្នាក់​លេខ ៧ បាន​វ៉ា​ជែង​គូប្រកួត​រហូត​ឡើងមក​ដល់​លេខ ៣ នៅ​ទីបញ្ចប់​ដើម្បី​ឈរលើ​វេទិកា​កិត្តិយស​ជា​លើកដំបូង​តាំងពី​ឆ្នាំ​២០១៣ ពោលគឺ ១០​ឆ្នាំមុន​។

​​អតីត​កីឡាករ​របស់​ក្រុម Renault រូបនេះ​បាន​វ៉ា​ផុត​ជើងឯក​ពិភពលោក ៧ សម័យ Lewis Hamilton ដែលជា​ការ​វ៉ា​ជែង​ដ៏​ស្វិតស្វាញ​រវាង​អ្នកបើកបរ​ជើងចាស់​ទាំងពីរ​នាក់ មុនពេល​ដែល​វ៉ា​ផុត George Russell និង​ចុងក្រោយ​វ៉ា​ផុត​កីឡាករ​របស់ Ferrari, Carlos Sainz ដើម្បី​បាន​ចំណាត់ថ្នាក់​លេខ ៣​។ ​​ចំណែកឯ​ជើងឯក​រង​ឆ្នាំមុន Charles Leclerc បាន​ត្រឹម​ខកបំណង​ប៉ុណ្ណោះ​ ដោយ​មិនអាច​បញ្ចប់​ការប្រកួត​បាន​ដោយសារ​បញ្ហា​គ្រឿង​ម៉ាស៊ីន​។ ​សម្រាប់​ទីលាន​ទី ២ បន្ទាប់ពី​បា​រ៉ែ​ន​នេះ Formula One នឹង​បន្តដំណើរ​ទៅ​ប្រទេស​អារ៉ាប៊ីសាអ៊ូឌីត​នៅ​ថ្ងៃទី២០ ខែមីនា​នេះ​៕

​អត្ថបទ​៖​នាង សុភា​វុ​ធ