ក្រិក៖ មេធាវីនិយាយថា ប្រធានស្ថានីយរថភ្លើងទីក្រុង Larissa របស់ប្រទេសក្រិកត្រូវបានឃុំខ្លួនដោយរង់ចាំការកាត់ក្តី ក្រោមការចោទប្រកាន់ទាក់ទងទៅនឹងគ្រោះថ្នាក់រថភ្លើងបុកគ្នា បណ្ដាលឲ្យមានមនុស្សស្លាប់ច្រើនបំផុតនៅក្នុងកំណត់ត្រាប្រទេស។
ប្រធានស្ថានីយរូបនេះត្រូវបានចាប់ខ្លួនកាលពីថ្ងៃទី១ ខែមីនា បន្ទាប់ពីរថភ្លើងដឹកអ្នកដំណើរមួយគ្រឿងដឹកមនុស្សច្រើនជាង ៣៥០នាក់នៅលើរថភ្លើងបានបុកគ្នាជាមួយរថភ្លើងដឹកទំនិញ ១គ្រឿងផ្សេងទៀតនៅជិតទីក្រុង Larissa ភាគកណ្តាលប្រទេសក្រិក បណ្តាលឲ្យមនុស្សយ៉ាងហោចណាស់ ៥៧នាក់ស្លាប់ និងរងរបួសជាច្រើននាក់។ មេធាវីលោក Stefanos Patzartzidis បាននិយាយ បន្ទាប់ពីការសាកសួរជាច្រើនម៉ោងនៅតុលាការ ទីក្រុង Larissa ថា ដោយការសម្រេចចិត្តជាឯកច្ឆន្ទដូចដែលត្រូវបានរំពឹងទុក អង្គចៅក្រម និងអ្នកសាកសួរបានសម្រេចថា ជនជាប់ចោទនឹងត្រូវឃុំខ្លួនបណ្តោះអាសន្ន។ ជនជាប់ចោទនិយាយយ៉ាងច្បាស់ពីអ្វីដែលបានកើតឡើងដោយមិនភ័យខ្លាចថា ពាក្យរបស់លោកនឹងធ្វើឱ្យលោកមានទំនួលខុសត្រូវកាន់តែច្រើន។
កាលពីថ្ងៃព្រហស្បតិ៍មេធាវីលោក Patzartzidis បាននិយាយថា កូនក្តីរបស់លោកបានទទួលខុសត្រូវក្នុងឧប្បត្តិហេតុនេះ។ សហជីពផ្លូវរថភ្លើងប្រទេសក្រិកបានត្អូញត្អែរជាយូរមកហើយ ពីស្តង់ដារសុវត្ថិភាពរអិលលើផ្លូវរត់ដែលធ្វើឲ្យអ្នកដំណើរ និងកម្មករប្រឈមនឹងហានិភ័យ។ ទន្ទឹមនឹងនេះនាយករដ្ឋមន្ត្រីក្រិកលោក Kyriakos Mitsotakis បានសុំការអភ័យទោសពីចំពោះក្រុមគ្រួសារជនរងគ្រោះទាំង ៥៧នាក់ដែលបានស្លាប់ដោយឧប្បត្តិហេតុរថភ្លើងបុកគ្នា ហើយនៅក្នុងសារលើបណ្តាញសង្គមលោក Mitsotakis និយាយថា ក្នុងប្រទេសក្រិកឆ្នាំ២០២៣ រថភ្លើង ២គ្រឿងធ្វើដំណើរក្នុងទិសដៅផ្ទុយគ្នាមិនអាចរត់លើផ្លូវដែកតែមួយនោះទេ ហើយគ្មាននណាផ្តល់សញ្ញា។ នគរបាលនិយាយថា ការប៉ះទង្គិចគ្នារវាងក្រុមអ្នកតវ៉ាជាមួយនគរបាលបានផ្ទុះឡើង ខណៈមនុស្សតាមការប៉ាន់ប្រមាណ ១២០០នាក់បានចូលរួមក្នុងបាតុកម្មក្នុងរដ្ឋធានី Athens៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
