ភ្នំពេញ៖ នៅថ្ងៃទី៦ ខែមីនា ឆ្នាំ២០២៣នេះ ឯកឧត្តមកិត្តិនីតិកោសលបណ្ឌិត អ៉ឹម ឈុនលឹម ប្រធានក្រុម​ប្រឹក្សាធម្មនុញ្ញ បានអញ្ជើញក្នុងពិធីអបអរសាទរទិវាអន្តរជាតិ ៨ មីនា ខួបទី១១២ ក្រោមមូលបទ “ស្រ្តីរួមគ្នា រក្សាសុខសន្តិភាព ដើម្បីកិច្ចអភិវឌ្ឍ ក្នុងយុគសម័យឌីជីថល” និងសន្និបាតបូកសរុបលទ្ធផលការងារឆ្នាំ២០២២ និងផែនការសកម្មភាពឆ្នាំ២០២៣របស់គណៈកម្មការកិច្ចការនារី។

ឯកឧត្តម អ៉ឹម ឈុនលឹម មានប្រសាសន៍ថា រាជរដ្ឋាភិបាលកម្ពុជាតែងតែចាត់ទុកស្ត្រីជាឆ្អឹងខ្នងនៃការអភិវឌ្ឍសេដ្ឋកិច្ច និង សង្គមជាតិ ដោយរក្សានូវប្រពៃណី ទំនៀមទម្លាប់ល្អរបស់សង្គមខ្មែរ ស្ត្រីខ្មែរនៅតែជា តួអង្គសំខាន់​និងចាំបាច់​មិនអាចខ្វះបាន នៅក្នុងដំណើរការប្រព្រឹត្តទៅនៃជីវភាពគ្រួសារ។ ឯកឧត្តម បន្តថា ស្ត្រីខ្មែរនៅតែរ៉ាប់រង​ការងារគេ​ហកិច្ច អប់រំទូន្មានកូនប្រុសស្រី និងមនុស្សជុំវិញខ្លួនឱ្យគិតនិងប្រព្រឹត្តនូវទង្វើជាកុសលដែលមានប្រយោជន៍ជូនជាតិ និងសង្គម។

ឯកឧត្តម ថ្លែងថា យ៉ាងនេះក្តី បុរសជាដៃគូ ជាឳពុក ជាជីតា ក៏គួរតែជួយសម្រាលបន្ទុកលើផ្នែកគេហកិច្ច និងជម្រុញ ស្ត្រីជាភរិយា កូនស្រី ចៅស្រីឱ្យមានឱកាសគ្រប់គ្រាន់ដើម្បីប្រើប្រាស់នូវកាលនុវត្ត ភាពរបស់ពួក​គាត់ក្នុង​ការ​អនុវត្តសិទ្ធិ អភិវឌ្ឍចំណេះដឹង ជំនាញនិងបច្ចេកទេស ដែលជា មូលដ្ឋាននៃការប្រកួតប្រជែង​ប្រកប​ដោយ​សក្តានុពល ​នៅក្នុងសង្គម និងក្នុងតំបន់។

នៅក្នុងដំណាក់នៃការរស់នៅតាមបែបគន្លងប្រក្រតីភាពថ្មីនេះ ប្រជាពលរដ្ឋកម្ពុជាទាំងមូល បានបោះ​ជំហាន​ចូលទៅ​ក្នុងយុគសម័យឌីជីថលលូបនីយកម្មស្ទើរគ្រប់វិស័យ។

ឯកឧត្តម ថ្លែងទៀតថា ស្ត្រីត្រូវតែបន្សាំខ្លួនទៅនឹងយុគសម័យនេះដែរ នៅពេលដែលស្រ្តីមានសក្តានុពលគ្រប់គ្រាន់ នៅក្នុងគ្រប់ទិដ្ឋភាពរួមទាំងវិស័យឌីជីថលផងនោះ ពួកគាត់ពិតជាអាចអភិវឌ្ឍខ្លួនឯងក្លាយជាដៃគូដ៏ចាំបាច់​ជាមួយ​បុរស ដើម្បីចូលរួមអភិវឌ្ឍសង្គម ជាតិ ប្រកបដោយចីរភាព ភាពធន់ និងបរិយាបន្ន។

ឯកឧត្តម អ៉ឹម ឈុនលឹម បញ្ជាក់ថា ដើម្បីចូលរួមលើកកម្ពស់ និងជំរុញគោលនយោបាយពង្រឹង​សមភាពយេនឌ័រ​របស់រាជរដ្ឋាភិបាល ក្រុមប្រឹក្សាធម្មនុញ្ញនៅតែបន្តលើកទឹកចិត្ត គាំទ្រយ៉ាងពេញទំហឹង និងសូមចាត់ទុកការ​ពង្រឹង​សមភាពយេនឌ័រ និងការបង្កើនភាពអង់អាចដល់ស្ត្រីជាការងារ អាទិភាពដែលត្រូវអនុវត្តបន្ត។

ឯកឧត្តម អ៉ឹម ឈុនលឹម បន្ថែមថា សមាជិក សមាជិកា និងមន្ត្រីរាជការក្នុងអគ្គលេខាធិការដ្ឋាន​ក្រុមប្រឹក្សា​ធម្មនុញ្ញទាំងអស់ត្រូវបន្តខិតខំប្រឹងប្រែងអភិវឌ្ឍចំណេះ ជំនាញ ព្រមទាំងបង្កើនការប្រើប្រាស់ជំនាញ ឌីជីថល ដើម្បីចូលរួមបំពេញភារកិច្ចស្នូលជូនស្ថាប័នឱ្យកាន់តែសកម្ម និងប្រសើរឡើង ក្នុងស្មារតីរួមគ្នារក្សាសុខដុមនីយកម្ម និងលើកស្ទួយគុណតម្លៃទាំងបីរបស់ស្ថាប័ន៕ អត្ថបទ ៖ ឧត្ដម