ភ្នំពេញ៖ ក្រុមយុវជន អង្គការ សមាគម សង្គមស៊ីវិល នៅថ្ងៃទី៦ ខែមីនា ឆ្នាំ២០២៣នេះ បានចេញសេចក្ដីថ្លែងការណ៍ ប្រឆាំងដាច់ខាត ចំពោះបុគ្គលណាដែលធ្វើសកម្មភាព នាំឲ្យមានវិនាសកម្ម ដល់ប្រទេសកម្ពុជា។

ក្រុមយុវជន អង្គការ សមាគម សង្គមស៊ីវិល ទាំងអស់បញ្ជាក់ថា ពួកគេពិតជាមានមោទនៈភាព ចំពោះការខិតខំប្រឹងប្រែងឥតឈប់ឈរទាំងយប់ទាំងថ្ងៃ ដើម្បីបុព្វហេតុជាតិ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា។

រាជរដ្ឋាភិបាលសព្វថ្ងៃ បានស្រោចស្រង់ដឹកនាំឱ្យកម្ពុជាបានងើបមុខលើឆាកអន្តរជាតិបង្ហាញពីភាពរីកចម្រើនលើគ្រប់វិស័យ រក្សាបាននូវសុខសន្តិភាព ឯករាជ្យភាព អធិបតេយ្យ បូរណភាពទឹកដី យ៉ាងពេញលេញ។

ក្រុមយុវជនបញ្ជាក់ថាកន្លងមកប្រជាពលរដ្ឋកម្ពុជាធ្លាប់គ្រោះដោយសារសង្គ្រាមស៊ីវិល រស់នៅក្នុងភាពភ័យខ្លាច អត់ឃ្លាន និងបែកបាក់គ្រួសារ ហេដ្ឋារចនាសម្ព័ន្ធត្រូវបានបំផ្លាញគ្រប់ទីកន្លែង ដែលបានដឹតដាមក្នុងក្រអៅបេះដូងប្រជាពលរដ្ឋខ្មែរគ្រប់រូបមិនអាចបំភ្លេងបាននិងមិនចង់ឱ្យកើតមានសារជាថ្មីនោះទេ។ ប្រវត្តិដ៏ជូរចត់កន្លងមកនេះអាចជាមេរៀនសម្រាប់យើងជាយុវជនគួរគិតគូរឱ្យបានវែងឆ្ងាយ ដើម្បីបញ្ជៀសការបែកបាក់គ្នាដោយសារអ្នកនយោបាយជ្រុលនិយមឬបរទេសខិលខូចជាដើម។ ក្រុមយុវជនសង្គមស៊ីវិល ប្រកាសឆាំងដាច់ខាត បុគ្គលណារូបភាពណា ដែលនាំឲ្យមានវិនាសកម្មដល់ប្រទេសជាតិខ្លួន សារជាថ្មីម្តងទៀត។

បើយើងធ្វេសប្រហែល សន្តិភាព និងការអភិវឌ្ឍ ដែលកំពុងមានក្នុងពេលបច្ចុប្បន្ននេះអាចនឹងបាត់បង់ហើយប្រទេសជាតិធ្លាក់ក្នុងសង្គ្រាមម្ដងទៀតជាក់ជាមិនខាន។ ក្រុមយុវជនសង្គមស៊ីវិលទាំងអស់គ្នាបានអំពាវនាវដល់បណ្តាអង្គការសង្គមស៊ីវិល សារព័ត៌មានជាតិ និងអន្តរជាតិ យុវជនខ្មែរ ប្រជាពលរដ្ឋខ្មែរទាំងអស់មេត្តាចូលរួមបន្តរក្សា និងការពារសន្តិភាព ស្ថិរភាព និងការអភិវឌ្ឍន៍ ដើម្បីជនជាតិខ្មែរជំនាន់ក្រោយអាចបន្តរស់នៅសុខសាន្តជាមួយនឹងសន្តិភាពជានិច្ចនិរន្ត៍៕ អត្ថបទ៖ វ៉ន ដារ៉ា