ភ្នំពេញ ៖ ឯកឧត្តម ឃួង ស្រេង អភិបាលរាជធានីភ្នំពេញបានជម្រាបជូន សម្ដេចតេជោ ហ៊ុន សែន នៅថ្ងៃទី០៦ ខែមីនា ឆ្នាំ២០២៣នេះថា សម្រាប់បុណ្យចូលឆ្នាំថ្មីប្រពៃណីជាតិនាពេលខាងមុខនេះ សាលារាជធានីភ្នំពេញបានត្រៀមរថយន្តក្រុងចំនួន ៤០០ គ្រឿង ដើម្បីដឹកពលរដ្ឋដោយមិនគិតថ្លៃ។

ឯកឧត្តម ឃួង ស្រេង បញ្ជាក់ថា សាលារាជធានីភ្នំពេញ ទើបតែបានជំនួយពីសាធារណរដ្ឋកូរ៉េនូវរថយន្តក្រុងចំនួន២០០គ្រឿងទៀតនាពេលថ្មីៗនេះ។ ដូចនេះនឹងបន្ថែមជើងរត់ទៀតនៅឆ្នាំនេះ ជាពិសេសខ្សែរត់ទៅកាន់ខេត្តសៀមរាប និងបន្ទាយមានជ័យ សម្រាប់រត់តាមផ្លូវជាតិលេខ៥ និងផ្លូវជាតិលេខ៦ ដើម្បីជួយសម្រាលការលំបាក និងការចំណាយរបស់ពលរដ្ឋ។

សូមជម្រាបថា ក្នុងឱកាសអញ្ជើញជាអធិបតីក្នុងពិធីប្រគល់វិញ្ញាបនបត្រ និងសញ្ញាបត្រជូនសិស្ស និស្សិតវិទ្យាស្ថានខ្មែរជំនាន់ថ្មីសរុបជិត ២ពាន់នាក់ នៅមជ្ឈមណ្ឌលសន្និបាត និងពិព័រណ៍ជ្រោយចង្វារ នាថ្ងៃទី៦ ខែមីនា ឆ្នាំ២០២៣ សម្តេចតេជោ ហ៊ុន សែន នាយករដ្ឋមន្ត្រី បានឱ្យសាលារាជធានីភ្នំពេញបន្តរៀបចំរថយន្តក្រុងសាធារណៈសម្រាប់ដឹកជញ្ជូនប្រជាពលរដ្ឋក្នុងឱកាសបុណ្យចូលឆ្នាំថ្មីប្រពៃណីជាតិខ្មែរខាងមុខដោយឥតគិតថ្លៃទៅតាមបណ្តាខេត្ត-ក្រុងនានា ក្នុងនោះត្រូវបន្ថែមខ្សែរត់ រថយន្តក្រុងជាង ២០០ គ្រឿងទៀតលើចំនួនដែលមានស្រាប់ផងដែរ៕

អត្ថបទ ៖ ប្រាក់ វ៉ាន់ដា