ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានប្រកាសដោយដាច់ណាត់ថា នឹងមិនប្រើប៊ិច ដើម្បីចុះហត្ថលេខាលើកលែងទោសដល់អ្នកនយោបាយណាដែលមានទោសកំហុសព្រហ្មទណ្ឌ ឬដែលបានជេរប្រមាថខ្លាំងក្លាដល់ក្រុមគ្រួសារសម្តេចនោះឡើយ។

ថ្លែងក្នុងឱកាសអញ្ជើញជាអធិបតីប្រារព្ធពិធីអបអរសាទរទិវានារី អន្តរជាតិ ៨ មីនា ខួបលើកទី១១២ នៅវិមានសន្តិភាព នាព្រឹកថ្ងៃទី៧ ខែមីនា ឆ្នាំ២០២៣នេះ សម្តេចតេជោ ហ៊ុន សែន បានលើកឡើង ថា ខណៈដែលសម្តេចកំពុងកាន់ទុក្ខ មានក្រុម​អន្ធពាល​បានជេរប្រមាថដល់ភរិយា និងក្រុមគ្រួសារ​សម្តេច ដោយការប្រមាថទាំងនេះហើយ គឺគ្មានហេតុផលណាមួយដែលសម្តេចនឹងត្រូវលើក​លែង​ឲ្យពួកទាំងនោះទេ ហើយក៏កុំដេក​ស្រមៃ​ និងសង្ឃឹមថាសម្តេចចុះហត្ថលេខាលើកលែងទោស​ដល់ពួកគេទាំងនោះផងដែរដែរ។

ជាមួយគ្នានោះដែរ សម្តេចតេជោ ហ៊ុន សែន ក៏បានប្រាប់ដល់បណ្តាឯកអគ្គរាជទូត និងរដ្ឋទូតនានា ប្រចាំនៅកម្ពុជាផងដែរថា ប្រសិនបើសម្តេចលើកលែងទោស និងយោគយល់ដល់ក្រុមទាំងនោះ ប្រៀបបានសម្តេចដូចជា​តិរិច្ឆាន ខណៈសម្តេចបានចាត់ទុកក្រុមជនអន្ធពាលទាំងនោះអាក្រក់​ជួជាតិ ហួស ពីសត្វធាតុទៅទៀត។ សម្តេចតេជោ ក៏បានផ្តាំទៅកាន់អង្គទូតទាំងនោះផងដែរថា សូមកុំចោទប្រកាន់ថា សម្តេចជាជនផ្តាច់ការ ហើយគ្មានការលើកលែងដល់អ្នកដទៃនោះ។ ការដែលសម្តេចមិនលើកលែង និង យោគយល់គឺដោយសារក្រុមមនុស្សទាំងនោះទេ ដែលមិនយោគយល់ដល់សម្តេច បើទោះបីសម្តេចកំពុងកាន់ទុក្ខចំពោះប្អូនថ្លៃស្រី​សម្តេចដែលបានទទួលមរណភាពក៏ដោយនោះ។

ខណៈនោះដែរ សម្តេចតេជោ ហ៊ុន សែន ក៏បានចោទសួរដល់អង្គទូត និងបរទេសមួយចំនួនដែល​បាន​កាន់ជើងដល់ក្រុមជេរប្រមាថសម្តេចផងដែរថា ប្រសិនបើក្រុមគ្រួសាររបស់ពួកអ្នកត្រូវបាន​គេជេរ​ប្រមាថដូចក្រុមគ្រួសារសម្តេចពេលដែលកំពុងមានទុក្ខតើក្រុមអ្នកយល់យ៉ាងណាដែរ?៕

អត្ថបទបាន ចក់