អាមេរិក៖ ក្រុមនិយ័តករសុខភាពសហរដ្ឋអាមេរិក និងលោកប្រធានាធិបតី ចូ បៃដិន បាននិយាយកាលពីថ្ងៃអង្គារថា ប្រជាពលរដ្ឋដែលទទួលបានការចាក់វ៉ាក់សាំងបង្ការជំងឺ COVID-19 គ្រប់ចំនួនដូសអាចដើរហើរ ឬធ្វើសកម្មភាពខាងក្រៅដោយសុវត្ថិភាព ដូចជាការដើរហាត់ប្រាណ និងការដើរកម្សាន្តដោយមិនចាំបាច់ពាក់ម៉ាស់នោះទេ ប៉ុន្តែពួកគេនៅតែបន្តប្រើប្រាស់របាំងមុខនៅតាមសាធារណៈ ជាកន្លែងដែលពួកគេតម្រូវឲ្យពាក់។
រដ្ឋបាលលោក បៃដិន បានជំរុញផងដែរឲ្យពលរដ្ឋអាមេរិក មកទទួលយកការចាក់វ៉ាក់សាំងបង្ការវីរុសដ៏កាចសាហាវមួយនេះ។ យោងតាមការអះអាងរបស់មជ្ឈមណ្ឌលបង្ការ និងគ្រប់គ្រងជំងឺសហរដ្ឋអាមេរិកបានឲ្យដឹងថា សេចក្តីណែនាំសុខភាពថ្មីនេះបានធ្វើឡើង ស្របពេលដែលជាងពាក់កណ្តាលនៃពលរដ្ឋពេញវ័យនៅសហរដ្ឋអាមេរិក បច្ចុប្បន្នទទួលបានការចាក់វ៉ាក់សាំងបង្ការជំងឺ COVID-19 យ៉ាងហោច ១ដូស។ លោក បៃដិន បាននិយាយថា សេចក្តីណែនាំថ្មីនេះបានធ្វើឡើង ដោយសារលទ្ធផលទទួលបានពីជំហាន ដែលប្រទេសរបស់លោកចាត់វិធានការដើម្បីប្រយុទ្ធប្រឆាំងនឹងជំងឺ COVID-19។ លោកបាននិយាយថា ពួកយើងបានរីកចម្រើនដ៏គួរភ្ញាក់ផ្អើលមួយ ដោយសារតែអ្នកទាំងអស់គ្នា។ ករណីឆ្លងបានធ្លាក់ចុះដ៏គួរឲ្យភ្ញាក់ផ្អើល ហើយករណីស្លាប់នៅក្នុងចំណោមពលរដ្ឋវ័យចំណាស់បានធ្លាក់ចុះ ៨០% ស្របពេលដែលចំនួននៃការចាក់វ៉ាក់សាំងកើនឡើង។
លោក បៃដិន បន្តទៀតថា បើសិនជាអ្នករាល់គ្នាទទួលបានការចាក់វ៉ាក់សាំង អ្នកនឹងអាចធ្វើអ្វីបន្ថែមទៀត មានសុវត្ថិភាពជាងមុន ទាំងក្នុង និងក្រៅផ្ទះ ប៉ុន្តែលោកបានបញ្ជាក់ថា ម៉ាស់គួរតែពាក់នៅទីកន្លែងដែលមានមនុស្សច្រើន និងនៅតាមព្រឹត្តិការណ៍ក្នុងពហុកីឡដ្ឋាន។ សូមបញ្ជាក់ថា ករណីឆ្លងថ្មីជំងឺ COVID-19 បានធ្លាក់ចុះ ១៦% កាលពីសប្តាហ៍មុននៅសហរដ្ឋអាមេរិក ខណៈដែលពលរដ្ឋអាមេរិកជាង ១៤០លាននាក់ទទួលបានវ៉ាក់សាំងយ៉ាងហោច ១ដូសរបស់ក្រុមហ៊ុន Pfizer-BioNTech, Moderna ឬក្រុមហ៊ុន Johnson & Johnson៕
អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
