ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអំពាវនាវឱ្យមានការគោរព​សិទ្ធិគ្នា​រវាងស្រ្ដី និងបុរសក្រោយពេលមានករណីឃាតកម្ម និងហិង្សាមួយចំនួនបានកើតឡើងចំពោះស្រ្ដី។ សម្ដេចតេជោ អំពាវនាវថា បើសិនជាក្រុមគ្រួសាររស់នៅមិនចុះសម្រុងជាមួយគ្នា ត្រូវដោះស្រាយ​គ្នាដោយសន្ដិវិធី ដើម្បីរក្សាកិត្តិយសគ្រួសារ ​និងសីលធម៌នៅក្នុងសង្គម។

សម្តេចតេជោ ហ៊ុន សែន បានថ្លែងបែបនេះ ក្នុងឱកាស អញ្ជើញជាអធិបតីប្រារព្ធ​ពិធី​អបអរសាទរ​ទិវានារីអន្តរជាតិ ៨ មីនា ខួបលើកទី១១២ ក្រោមប្រធានបទ «ស្ត្រីរួមគ្នា រក្សាសុខសន្តិភាពដើម្បី​កិច្ចអភិវឌ្ឍក្នុងយុគសម័យឌីជីថល» នាព្រឹកថ្ងៃទី៧ ខែមីនា ឆ្នាំ២០២៣នេះនៅវិមានសន្តិភាព។

នៅប្រទេសកម្ពុជា កុំថាតែសិទ្ធិនារី ឬបុរស គឺត្រូវបានបាត់បង់អស់ក្នុងរបបប្រល័យពូជសាសន៍ ប៉ុលពត។​ ប៉ុន្ដែសិទ្ធិសេរីភាពរបស់ប្រជាពលរដ្ឋខ្មែរ បានកើតមានជាថ្មីឡើងវិញ ក្រោយការផ្ដួល​រំលំរបបដ៏យង់ឃ្នង ប៉ុលពតនៅថ្ងៃទី៧ ខែមករា ឆ្នាំ១៩៧៩។ ចាប់តាំងពីថ្ងៃរំដោះ ៧ មករា រហូតដល់ពេលបច្ចុប្បន្ន រាជរដ្ឋា ភិបាលកម្ពុជាតែងបានយកចិត្តទុកដាក់លើក​កម្ពស់សិទ្ធិសេរីភាព​របស់ប្រជាពលរដ្ឋ ជាពិសេសសិទ្ធិស្រ្តីដោយបានចាត់ទុក«ស្រ្តីជាឆ្អឹងខ្នង​នៃសង្គម​និងសេដ្ឋកិច្ចជាតិ»។

សម្តេចតេជោ ហ៊ុន សែន បានបញ្ជាក់ថា គោលដៅធំ និងជាអាទិភាពដែលរាជរដ្ឋាភិបាល និង​គ្រប់​ស្ថាប័នពាក់ព័ន្ធត្រូវ ​និងបាននឹងកំពុងធ្វើ គឺត្រូវការពង្រឹងអំណាចស្រ្ដីក្នុងវិស័យ​សេដ្ឋកិច្ច​ឱ្យ​បានកាន់​តែធំធេងថែមទៀតតាមរយៈការពង្រឹងអំណាចដល់ស្រ្ដីនូវគ្រប់​ការងារជាពិសេស​អំណាច​គ្រប់គ្រង​សេដ្ឋកិច្ចគ្រួសារ។

គួរបញ្ជាក់ថា តាមរយៈការយកចិត្តទុកដាក់ ​និងជំរុញការលើកកម្ពស់ដល់សិទ្ធិស្រ្តីរបស់​រាជរដ្ឋា​ភិបាល​បែបនេះ បច្ចុប្បន្នស្រ្ដីខ្មែរបានចូលបម្រើការងារនៅតាមក្រសួង​ស្ថាប័ន​រដ្ឋកាន់តែច្រើន។ ជាមួយគ្នានេះស្ត្រីបាននឹងកំពុងដើរតួនាទី​យ៉ាងសំខាន់សម្រាប់ជំរុញសេដ្ឋកិច្ចជាតិ​តាមរយៈការ​បម្រើការងារលើវិស័យជាច្រើនផងដែរ៕ អត្ថបទ៖ វ៉ន ដារ៉ា