ព្រះវិហារ៖ ឯកឧត្តម គីម រិទ្ធី អភិបាលខេត្តព្រះវិហារ បានបញ្ជាក់ថា ខេត្តព្រះវិហារមកទល់បច្ចុប្បន្នមានបណ្ដាញ ផ្ដល់ឈាមគ្រប់គ្រាន់ សម្រាប់ផ្គត់ផ្គង់ជូនមន្ទីរពេទ្យ និងមានលទ្ធភាពផ្គត់ផ្គង់ឈាមដល់ បណ្ដាខេត្តផ្សេងៗ។

ការថ្លែងបញ្ជាក់បែបនេះ បានធ្វើឡើងក្នុងឱកាសដែលឯកឧត្តម គីម រិទ្ធី អភិបាលខេត្តព្រះវិហារ បានអញ្ជើញជាអធិបតីភាព ក្នុងពិធីបរិច្ចាកឈាមដោយស្ម័គ្រចិត្ត ក្រោមប្រធានបទ “ផ្ដល់ឈាម ផ្ដល់ក្ដី ស្រលាញ់” ដែលធ្វើឡើងនៅបរិវេណសាលាស្រុកជ័យសែន កាលពីព្រឹកថ្ងៃទី ០៦ ខែមីនា ម្សិលមិញ។

ឯកឧត្តម គីម រិទ្ធី មានប្រសាសន៍បន្ថែមទៀតថា កាលពីពេលកន្លងមក ខេត្តព្រះវិហារ គឺជា ខេត្តខ្វះឈាម តែក្នុងរយៈពេល ៤-៥ខែមកនេះ បន្ទាប់ពីមានការចូលរួមបរិច្ចាកឈាមពី សំណាក់​បងប្អូនប្រជាពលរដ្ឋ មន្ដ្រីរាជការ ព្រះសង្ឃ កងកម្លាំងប្រដាប់អាវុធ តាមរយៈ យុទ្ធនាការការផ្ដល់​ឈាមប្ដូរវេន តាមបណ្ដាក្រុង-ស្រុកជាបន្ដបន្ទាប់ ​បានធ្វើឱ្យខេត្ត ព្រះវិហារជាខេត្តដែលមាន​ឈាមគ្រប់គ្រាន់ ហើយលើសពីនេះក៏អាចផ្គត់ផ្គង់ដល់បណ្ដា ខេត្តផ្សេងៗថែមទៀតផង។

ក្នុងឱកាសនោះដែរ ឯកឧត្ដម ក៏បានសម្តែងនូវការរីករាយសប្បាយចិត្តនិងថ្លែងអំណរគុណ​ចំពោះវត្ត​មានអ្នកស្ម័គ្រចិត្តទាំងអស់ ដែលបានចូលរួម បរិច្ចាគឈាម ​នាពេលនេះ​ ដែលជាផ្នែកមួយ នៃការ​លើកកម្ពស់ វិស័យមនុស្សធម៌ ក្រោមពាក្យស្លោក ផ្តល់ឈាម គឺផ្តល់ក្តីស្រលាញ់។

ឯកឧត្តម ក៏បានបន្តទៀតថា ការផ្តល់ឈាមដោយស្ម័គ្រ ​ចិត្តជាប្រភពឈាមតែមួយគត់ ដែលអាច​ផ្តល់ឈាមប្រកបដោយចីរភាព ដើម្បីផ្គត់ផ្គង់ដល់ ​មន្ទីរពេទ្យខេត្តព្រះវិហារយើង ក្នុងការយកទៅ​ជួយសង្គ្រោះអាយុជីវិតជនរងគ្រោះទូទៅ ​ដែលបណ្តាលមកពីកត្តាផ្សេងៗជាច្រើន ដែលពួកគាត់​មានតម្រូវការឈាម។

តាមការបញ្ជាក់ពីពេទ្យជំនាញបានអះអាងថា​ ការអ្នកបរិច្ចាគឈាម គឺទទួលបាន ការពិនិត្យសុខភាព និងវិភាគឈាមដោយឥតគិតថ្លៃ ហើយ​លក្ខខណ្ឌ​នៃការផ្តល់ឈាម​ គឺ ត្រូវមានអាយុចាប់ពី ​១៨ឆ្នាំ ដល់ ៥៥ឆ្នាំ ​មានទម្ងន់តិចបំផុត ៤៥គីឡូក្រាម ក្នុងនោះ ចំពោះស្ត្រីអាចផ្តល់ឈាមបានក្នុងរយៈពេល ៤ខែម្តង ​ចំណែកឯបុរសអាចផ្តល់ឈាមបាន​ ក្នុងរយៈពេល ៣ខែម្តង ៕