ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានជំរុញពង្រឹង​កិច្ចសហប្រតិបត្តិការលើវិស័យស្បៀង កសិកម្ម និងព្រៃឈើ ដើម្បីការពង្រឹងសន្តិសុខស្បៀង​ក្នុងតំបន់, ការសម្រួលនិងលើកកម្ពស់​ពាណិជ្ជកម្មកសិកម្ម និងព្រៃឈើ និងការគ្រប់គ្រង​និង​អភិរក្សធនធានធម្មជាតិ​សម្រាប់ការអភិវឌ្ឍប្រកបដោយចិរភាព។

រដ្ឋមន្រ្តីកសិកម្ម លើកឡើងបែបនេះ ក្នុងកិច្ចប្រជុំរួមគ្នាមួយជាមួយថ្នាក់ដឹកនាំក្រសួង នៅថ្ងៃទី៦ មីនា ឆ្នាំ២០២៣នេះ ដែលមានគោលបំណង​ដើម្បីពិនិត្យលើកិច្ចការអាស៊ាន​ស្ថិតក្រោមកិច្ច​សហប្រតិបត្តិការ​លើវិស័យកសិកម្ម ​និងព្រៃឈើអាស៊ាន នៅទីស្តីការក្រសួង។

នៅក្នុងកិច្ចប្រជុំនេះ ​ឯកឧត្តមរដ្ឋមន្រ្តី បានណែនាំឱ្យអគ្គនាយកដ្ឋានចំនួន៥ រួមមាន៖ អគ្គនាយកដ្ឋាន​កសិកម្ម, អគ្គនាយកដ្ឋានសុខភាពសត្វ និងផលិតកម្មសត្វ, រដ្ឋបាលព្រៃឈើ, រដ្ឋបាលជលផល និងអគ្គនាយកដ្ឋានកៅស៊ូ ត្រូវស្វែងយល់ពីរបៀបធ្វើការជាមួយអង្គការ​ពាណិជ្ជកម្ម​ពិភពលោក (WTO)ឱ្យបានល្អ ដោយតម្កល់ផលប្រយោជន៍ជាតិជាធំ។

កិច្ចសហប្រតិបត្តិការលើវិស័យស្បៀង កសិកម្ម និងព្រៃឈើ (១៩៩៣) ផ្តោតលើអាទិភាពចំនួន៧ ក្នុងនោះរួមមាន៖ ការពង្រឹងសន្តិសុខស្បៀងក្នុងតំបន់, ការសម្រួលនិងលើកកម្ពស់ពាណិជ្ជកម្ម​កសិកម្ម​និងព្រៃឈើ, អនុផលព្រៃឈើក្នុងនិងក្រៅអាស៊ាន, ការបង្កើតនិងផ្ទេរបច្ចេកវិទ្យាដើម្បី​បង្កើន​ផលិតភាពនិងអភិវឌ្ឍកសិធុរកិច្ច, ការអភិវឌ្ឍសហគមន៍កសិកម្មនិងធនធានមនុស្ស, ការវិនិយោគ​និងការចូលរួមរបស់វិស័យឯកជន, ការគ្រប់គ្រង​និងអភិរក្សធនធានធម្មជាតិសម្រាប់ការ​អភិវឌ្ឍ​ប្រកបដោយចិរភាព និងការពង្រឹងកិច្ចសហប្រតិបត្តិការអាស៊ាន​និងអភិក្រមរួមគ្នា​ក្នុងការ​ដោះស្រាយ​បញ្ហាតំបន់និងអន្តរជាតិ។

យោងតាម​លទ្ធផល​នៃកិច្ចប្រជុំ ​ឯកឧត្តម ឌិត ទីណា បាន​សម្រេចប្រគល់ភារកិច្ចជូននាយកដ្ឋាន​សហប្រតិបត្តិការអន្តរជាតិ​ តាមដាននិងពិនិត្យលើ MOU​ ទាំងអស់ឱ្យមានប្រសិទ្ធភាព និងរុញ​ឱ្យចេញ​ជាការអនុវត្ត។

ជាមួយគ្នានេះដែរ នាយកដ្ឋានសហប្រតិបត្តិការអន្តរជាតិ ​ត្រូវរាយការណ៍​និងមានរបាយការណ៍ រាល់​សកម្មភាពបេសកកម្មដោយមានខ្លឹមសារ​ពិតប្រាកដនិងច្បាស់លាស់។ ​លើសពីនេះទៀត ត្រូវ​ពិនិត្យ​ជ្រើសរើសមន្ត្រីដែលមានសមត្ថភាព ​និងឆន្ទៈការងារពិតប្រាកដ ដើម្បី​ប្រសិទ្ធភាព​ការងារ​ល្អប្រសើរ៕ អត្ថបទ៖ ឈិត បូរ៉ាវី