ព្រះវិហារ៖ នៅព្រឹកថ្ងៃទី០៧ ខែមីនា ឆ្នាំ២០២៣នេះ ឯកឧត្តម គីម រិទ្ធី អភិបាលខេត្តព្រះវិហារ បានអនុញ្ញាតអោយ ឯកឧត្តម ឃុំសន ខុនប៉ាសើត អគ្គកុងស៊ុល នៃសាធារណរដ្ឋ​ប្រជាធិបតេយ្យ​ប្រជាមានិតឡាវ ប្រចាំខេត្តស្ទឹងត្រែង និងលោកជំទាវ ចូលជួបសម្ដែងការគួរសម ក្នុងឱកាសដែល​ឯកឧត្តមនឹងត្រូវបញ្ចប់អាណត្តិបេសកកម្មការទូត ជាអគ្គកុងស៊ុល នៅខែមិថុនា ឆ្នាំ២០២៣ ខាងមុខនេះ។

ក្នុងជំនួបនាពេលនេះ ភាគីទាំងពីរបានលើកឡើងអំពីទំនាក់ទំនងកិច្ចសហប្រតិបត្តិការល្អរវាង ប្រទេសទាំងពីរគឺព្រះរាជាណាចក្រកម្ពុជា និងសាធារណរដ្ឋប្រជាធិបតេយ្យប្រជាមានិតឡាវ ពិសេស​នៅ​តាមបណ្តាខេត្ត ដែលនៅជាប់ព្រំប្រទល់។

ជាមួយនេះ ភាគីទាំងពីរ ​ក៏បានប្តេជ្ញាចិត្តក្នុងការបន្តរក្សានូវទំនាក់ទំនង និងកិច្ចសហប្រតិបត្តិការល្អ​ដើម្បីរក្សាសុខសន្តិភាព ស្ថិរភាព​ ការអភិវឌ្ឍសេដ្ឋកិច្ចរីកចម្រើន និងភាពសុខសាន្តសម្រាប់​ប្រជាជនរស់​នៅតាមបណ្ដោយព្រំដែន នៃប្រទេសទាំងពីរ។

លើសពីនេះទៀត ឯកឧត្តមអគ្គកុងស៊ុល បានសម្តែងនូវមនោសញ្ចេតនាយ៉ាងជ្រាលជ្រៅ​ព្រមទាំង​ថ្លែងអំណរគុណ និងចងចាំទុកជានិច្ចចំពោះការស្រលាញ់រាប់អានរបស់ថ្នាក់ដឹកនាំ និងប្រជាជន​ក្នុងខេត្ត ហើយទោះបីជិតបញ្ចប់បេសកកម្មទៅវិញក្តី ​ក៏ឯកឧត្តមចងចាំជានិច្ចចំពោះទំនាក់ទំនង​ល្អការសាមគ្គីភាពរវាង ​ខេត្តនៅជាប់ព្រំប្រទល់ ​និងក្នុងតំបន់។

បន្ថែមពីនេះ ឯកឧត្តម ក៏បានថ្លែងកោតសរសើរចំពោះការ អភិវឌ្ឍន៍រីកចម្រើនលើ​គ្រប់វិស័យ​របស់​ខេត្តព្រះវិហារ​ ក៏ដូចជាព្រះរាជាណាចក្រកម្ពុជាទាំងមូលផងដែរ៕