​កោះតៃវ៉ាន់៖ ប្រមុខ​ការពារជាតិ​កោះ​តៃវ៉ាន់​បាន​និយាយ​នៅ​ថ្ងៃ​អង្គារ​នេះ នៅ​ពេល​ត្រូវ​បាន​សួរ​អំពី​លទ្ធភាព​នៃ​ប្រតិកម្ម​របស់​ទីក្រុង​ប៉េកាំង​ ចំពោះ​សេចក្ដីរាយការណ៍​អំពី​ជំនួប​រវាង​មេដឹកនាំ​កោះ​តៃវ៉ាន់លោកស្រី Tsai Ing-wen និង​ប្រធាន​សភា​អាមេរិក​លោក Kevin McCarthy ថា កោះ​តៃវ៉ាន់​នឹង​មិន​បណ្ដោយ​ឲ្យ​មាន​សកម្មភាព​បង្កហេតុ​ដដែល​ពី​ប្រទេស​ចិន​ទៀត​ទេ​។

​ប្រភព​ចំនួន​២ ​បាន​ប្រាប់​សារព័ត៌មាន Reuters កាលពី​ថ្ងៃ​ចន្ទ​ថា លោកស្រី Tsai គ្រោង​នឹង​ជួប​លោក McCarthy នៅ​សហរដ្ឋអាមេរិក​ក្នុង​ប៉ុន្មាន​សប្ដាហ៍​ខាងមុខ ជា​សកម្មភាព​មួយ​ដែល​អាច​ជំនួស​ដំណើរ​ទស្សនកិច្ច ​របស់​ប្រធាន​សភា​ខាង​គណបក្ស​សាធារណរដ្ឋ​ដែល​បាន​គ្រោង​ទុក ប៉ុន្តែ​នេះ​ជា​ដំណើរ​ដ៏​ចម្រូងចម្រាស​ទៅកាន់​ដី​កោះ​ស្វ័យ​គ្រប់គ្រង ដែល​អះអាង​សិទ្ធិ​ដោយ​ប្រទេស​ចិន​។​ ​ប្រទេស​ចិន​បាន​បង្កើត​ល្បែង​សង្គ្រាម​នៅ​ជុំវិញ​កោះ​តៃវ៉ាន់​កាលពី​ខែ​សីហា​ឆ្នាំមុន បន្ទាប់ពី​ដំណើរ​របស់​អតីត​ប្រធាន​សភា​មកពី​គណបក្ស​ប្រជាធិបតេយ្យ​លោកស្រី Nancy Pelosi​។ ថ្លែង​ទៅកាន់​ក្រុម​អ្នក​សារព័ត៌មាន​ក្នុង​សភា ប្រមុខ​ការពារ​ជាតិ​កោះ​តៃវ៉ាន់​លោក Chiu Kuo-cheng បាន​និយាយ​ថា លោក​ពុំ​បាន​ដឹង​ពី​គម្រោង​ជំនួប​រវាង​លោកស្រី Tsai និង​លោក McCarthy​ នោះ​ទេ​៕

អត្ថបទ៖ សុខមាន