ភ្នំពេញ៖ ក្នុងកិច្ចប្រជុំរបាយការណ៍ស្តីពីលទ្ធផលការងារគ្រប់គ្រងគ្រោះមហន្តរាយ ក្នុងខែកុម្ភៈ និងទិសដៅបន្តខែមីនា ឆ្នាំ២០២៣ របស់អគ្គលេខាធិការដ្ឋាននៃគណៈកម្មាធិការជាតិគ្រប់គ្រង​គ្រោះមហន្តរាយ (គ.ជ.គ.ម) នៅថ្ងៃ៧ ខែមីនា ឆ្នាំ២០២៣ ឯកឧត្តមទេសរដ្ឋមន្ត្រី គន់ គីម បានជំរុញ​ឲ្យពង្រឹងយន្តការបង្ការគ្រោះមហន្តរាយ ដើម្បីបញ្ជៀសការប៉ះពាល់ដល់ការអភិវឌ្ឍ និងវិនិយោគ។

ឯកឧត្តមទេសរដ្ឋមន្ត្រី បានកោតសសើរ និងវាយតម្លៃខ្ពស់ចំពោះថ្នាក់ដឹកនាំ (គ.ជ.គ.ម) ដែលបាន​ចុះអនុវត្តន៍​តួនាទីភារៈកិច្ចរបស់ខ្លួន និងមានឆន្ទៈខ្ពស់ ដើម្បីចុះសម្របសម្រួលលើការងារ​គ្រោះ​មហន្តរាយក្នុងបច្ចុប្បន្នភាព។ម្យ៉ាងវិញទៀត​ ទីណាកន្លែងណា​ ដែលមានហានិភ័យ គ្រោះមហន្តរាយ​កើតឡើងតែងតែចូលរួម​ជាប្រចាំត្រៀម​ឆ្លើយតប​និងសង្គ្រោះបន្ទាន់ ​ក្នុងហេតុការផ្សេងកើតឡើង​ផងដែរ។

ឯកឧត្តមទេសរដ្ឋមន្រ្តី លើកឡើងថា ​ឆ្លើយយតបនឹងបរិការណ៍នៃបញ្ហាគ្រោះមហន្តរាយ ការអភិវឌ្ឍ​ស្ថាប័នគ្រប់គ្រងគ្រោះមហន្តរាយឲ្យបានរឹងមាំ ពិសេសការពង្រឹង​លេខាធិការដ្ឋាន​គណៈកម្មាធិការ​គ្រប់គ្រងគ្រោះមហន្តរាយគ្រប់លំដាប់ថ្នាក់ជាបញ្ហាសំខាន់ ​តាមរយៈការចុះណែនាំ ​តម្រង់​ទិសជា​ការចាំបាច់ រួមជាមួយកិច្ចប្រជុំបូកសរុបការងារគ្រប់គ្រងគ្រោះមហន្តរាយប្រចាំឆ្នាំ ធ្វើឲ្យការយក​ចិត្តទុក​ដាក់លើយន្តការ និងរចនាសម្ព័ន្ធគណៈកម្មាធិការគ្រប់គ្រងគ្រោះមហន្តរាយថ្នាក់ក្រោមជាតិ ចាប់ផ្តើមឡើងវិញ ​ជាមួយការដាក់ចេញផែនការយុទ្ធសាស្ត្រកាត់បន្ថយហានិភ័យគ្រោះមហន្តរាយ និង​ការបញ្ជ្រាបការគ្រប់គ្រងគ្រោះមហន្តរាយ​ទៅក្នុងផែនការអភិវឌ្ឍ​ និងកម្មវិធីវិនិយោគរបស់​រដ្ឋបាលថ្នាក់ក្រោមជាតិបន្ថែមទៀតធ្វើឲ្យការងារគ្រប់គ្រងគ្រោះមហន្តរាយកាន់តែមានប្រសិទ្ធភាព និងឈានទៅការកសាងភាពធន់ទៅនឹងគ្រោះមហន្តរាយ។

ឯកឧត្តទេសរដ្ឋមន្ត្រី បន្តថា យោងតាមអនុក្រឹត្យចុះថ្ងៃទី១៤ ខែធ្នូ ឆ្នាំ២០១៩ ស្តីពីការរៀបចំ និង​ការប្រព្រឹត្តទៅរបស់គណៈកម្មាធិការគ្រប់គ្រងគ្រោះមហន្តរាយថ្នាក់ក្រោមជាតិ​ រដ្ឋបាលរាជធានី-ខេត្ត ​បានយកចិត្តទុកដាក់រៀបចំដាក់ចេញសេចក្ដីសម្រេចស្តីពីការរៀបចំគណៈកម្មាធិការគ្រប់គ្រង គ្រោះមហន្តរាយរាជធានី-ខេត្តរៀងៗខ្លួន ​រីឯរដ្ឋបាលក្រុង-ស្រុក ខណ្ឌ ឃុំ សង្កាត់ មួយចំនួន​នៅពុំទាន់បាន រៀបចំគណៈកម្មាធិការគ្រប់គ្រងគ្រោះមហន្តរាយនៅឡើយផងដែរ។

ជាក់ស្តែង បញ្ហាគ្រោះមហន្តរាយតែងកើតមានជារៀងរាល់ឆ្នាំ ​ញឹកញាប់ ​និងខ្លាំងជាងមុន ដោយសារ​មានការប្រែប្រួលអាកាសធាតុខុសប្រក្រតី បង្កឲ្យមានមុខសញ្ញាគ្រោះថ្នាក់​ដោយ​ធម្មជាតិ​កើតឡើងខុសពេលវេលា​ ហើយមុខសញ្ញាគ្រោះថ្នាក់ដោយមនុស្សក៏កើតមានបន្ថែមទៀត៕