ភ្នំពេញ៖ ថ្លែង​ក្នុង​ពិធី​អបអរសាទរខួបទី១១២ ទិវាអន្តរជាតិនារី ៨មីនា ឆ្នាំ២០២៣ ក្រោមមូលបទ« ស្រ្តីរួម​គ្នា​រក្សា​សុខសន្តិភាព ដើម្បីកិច្ចអភិវឌ្ឍក្នុងយុគសម័យឌីជីថល» នៅថ្ងៃទី៧ ខែមីនា ឆ្នាំ២០២៣ ដែលមានប្រតិភូស្រ្តី មក​ពី​គ្រប់ក្រសួង ស្ថាប័ន នៅថ្នាក់ជាតិ និងក្រោមជាតិជាង២០០នាក់ សម្តេចពញាចក្រី ហេង សំរិន ប្រធានរដ្ឋសភា​នៃ​កម្ពុជា មានប្រសាសន៍ថា ប្រធានបទឆ្នាំនេះ គឺជាប្រធានបទមួយដ៏មានសារៈសំខាន់ និងសមស្រប​បំផុត​ទៅ​នឹង​បរិបទបច្ចុប្បន្ន ទាំងក្នុងក្របខណ្ឌសកល ក៏ដូចជាតំបន់ និងប្រទេសនីមួយៗ។

សម្តេចប្រធានរដ្ឋសភា មានប្រសាសន៍ទៀតថា ប្រធានបទនេះក៏បានបង្ហាញពីគុណតម្លៃរបស់ស្រ្តី ជា​ពិសេស​ស្រ្តីកម្ពុជា ដែលបានរួមចំណែកធំធេងទាំងកម្លាំងកាយចិត្ត ក្នុងការរក្សាសន្តិភាព និងការអភិវឌ្ឍសង្គមជាតិ។ ជាក់ស្តែងសន្តិភាពដែលកំពុងរីករាយសព្វថ្ងៃនេះ រកបានមកដោយលំបាកបំផុត ហេតុនេះប្រជាពលរដ្ឋ​ទាំងអស់​ដាច់ខាត ត្រូវរក្សាសន្តិភាពនេះឱ្យបានទោះក្នុងតម្លៃណាក៏ដោយ។

សម្តេចប្រធានរដ្ឋសភា បញ្ជាក់ថា កម្ពុជាសម្រេចបាននូវសមិទ្ធផលជាច្រើនក្នុងការលើកកម្ពស់ស្រ្តី ប៉ុន្តែក៏​នៅ​មាន​បញ្ហា​ប្រឈមជាច្រើន ដែលត្រូវបន្តរួមគ្នាដោះស្រាយ ក្នុងនោះរួមមានគម្លាតយេនឌ័រ ផ្នត់គំនិតសង្គមទៅលើស្រ្តី បញ្ហាហឹង្សាលើស្រ្តីនិងក្មេងស្រីជាដើម ដែលបញ្ហាទាំងនេះនៅតែដាក់គំនាបទៅលើស្រ្តី ក្នុងការចូលរួម​ក្នុង​វិស័យ​នយោបាយ ក៏ដូចជាវិស័យសេដ្ឋកិច្ច និងសង្គមឌីជីថល។

ដើម្បីចូលរួមលើកកម្ពស់សមភាពយេនឌ័រនៅកម្ពុជាឱ្យកាន់តែមានប្រសិទ្ធភាព សម្តេចប្រធានរដ្ឋសភា បាន​ស្នើ​ឲ្យបន្តយកចិត្តទុកដាក់លើកស្ទួយតម្លៃស្រ្តីខ្មែរ ក្នុងសង្គម លើកកម្ពស់ស្ថានភាពតួនាទី និងសិទ្ធិស្ត្រីនៅក្នុងសង្គម និងលុបបំបាត់រាល់ទស្សនៈ ឬឥរិយាបថរើសអើងចំពោះស្រ្តី និងជនងាយរងគ្រោះ ដើម្បីធានាស​ម្រេច​បាន​នូវ​សមភាព​យេនឌ័រនិងបរិយាបន្ន នៅក្នុងការអភិវឌ្ឍ។ បន្តយកចិត្តទុកដាក់បញ្រ្ជាបសមភាពយេនឌ័រ ទៅក្នុង​ក្របខណ្ឌគោលនយោបាយ និងកម្មវិធីជាតិ រួមទាំងកម្មវិធីកែទម្រង់ រដ្ឋបាលសាធារណៈ កម្មវិធីគ្រប់គ្រង​ហិរញ្ញវត្ថុសាធារណៈ កម្មវិធីកែទម្រង់វិមជ្ឈការ និងវិសហមជ្ឈការ កម្មវិធីកែទម្រង់ច្បាប់ និងប្រព័ន្ធយុត្តិធម៌ ក្របខណ្ឌគោលនយោបាយជាតិគាំពារសង្គម កម្មវិធីប្រែប្រួលអាកាសធាតុ និងការអភិវឌ្ឍន៍បៃតង ជាដើម។

ក្នុងនាមរដ្ឋសភា សម្តេចប្រធានរដ្ឋសភា បានថ្លែងអំណរគុណយ៉ាងជ្រាលជ្រៅចំពោះការតស៊ូ លះបង់ និងពលីរបស់ស្រ្តីកម្ពុជា មកពីគ្រប់មជ្ឈដ្ឋាន ដែលបានរួមវិភាគទានដ៏មានតម្លៃដល់សន្តិភាព ស្ថិរភាព និងវឌ្ឍនភាពសង្គម ជាពិសេសក្នុងបរិបទ នៃការរីករាលដាលនៃជំងឺកូវីដ-១៩ ដែលស្រ្តីបានតួនាទីយ៉ាង​សំខាន់​ក្នុងការចូលរួមទប់ស្កាត់ដោយជោគជ័យនូវការរីករាលដាលនៃជំងឺដ៏កាចសាហាវនេះ ៕ អត្ថបទ ៖ ឧត្ដម