ភ្នំពេញ ៖ អាជ្ញាធររាជធានីអញ្ជើញម្ចាស់ ឬអ្នកកាន់កាប់សណ្ឋាគារ អាផាតម៊ិន និងម្ចាស់ខុនដូនៅក្នុងភូមិសាស្ត្រភ្នំពេញមកផ្សព្វផ្សាយច្បាប់ ដើម្បីទប់ស្កាត់បទល្មើសនានា ដែលអាចបង្កឡើងដោយជនបរទេស។

អាជ្ញាធររាជធានីភ្នំពេញ បានអញ្ជើញម្ចាស់ ឬអ្នកកាន់កាប់សណ្ឋាគារ អាផាតម៊ិន និងម្ចាស់ខុនដូ ក្នុងភូមិសាស្រ្តរាជធានីប្រមាណ ៤០០នាក់ មកប្រជុំ ដើម្បីផ្សព្វផ្សាយលើការងារគ្រប់គ្រងហត្ថពលកម្មបរទេស សំដៅយ៉ាងណាគ្រប់គ្រងជនបរទេសឱ្យបានល្អ ជៀសវាងមានការប្រព្រឹត្តបទល្មើសខុសច្បាប់ផ្សេងៗ នៅតាមទីតាំងដែលជនបរទេសស្នាក់នៅ។

កិច្ចប្រជុំផ្សព្វផ្សាយនេះបានធ្វើឡើង នារសៀល ថ្ងៃទី០៧ ខែមីនា ឆ្នាំ២០២៣ ក្រោមវត្តមាន លោកហួត ហៃ និងលោក ហ៊ុន សុរិទ្ធី អភិបាលរងរាជធានីភ្នំពេញ។

លោក ហួត ហៃ មានប្រសាសន៍ថា ការអញ្ជើញម្ចាស់ ឬអ្នកកាន់កាប់សណ្ឋាគារ អាផាតម៊ិន និងខុនដូក្នុងភូមិសាស្រ្តរាជធានីភ្នំពេញមកប្រជុំនេះ គឺអាជ្ញាធររាជធានីភ្នំពេញ មានគោលបំណងឱ្យម្ចាស់ ឬអ្នកកាន់កាប់ទាំងអស់គ្រប់គ្រងជនបរទេសឱ្យបានល្អ នៅក្នុងទីតាំងរបស់ខ្លួន ពិសេសរួមគ្នាដើម្បីប្រយុទ្ធប្រឆាំងការជួញដូរមនុស្សគ្រប់ទម្រង់ ទប់ស្កាត់ការលែងល្បែងស៊ីសងគ្រប់ប្រភេទតាមអនឡាញ និងទប់ស្កាត់ការលាងសំអាតប្រាក់។

លោក ហួត ហៃ បានបញ្ជាក់ថា ជាជំហានដំបូងនេះ អាជ្ញាធរគ្រាន់តែធ្វើការផ្សព្វផ្សាយច្បាប់ តែប៉ុណ្ណោះ ដោយរដ្ឋបាលរាជធានីភ្នំពេញ ទុករយៈពេលឱ្យម្ចាស់ ឬអ្នកកាន់កាប់សណ្ឋាគារ អាផាតម៊ិន និងម្ចាស់ខុនដូ ចំនួន៣ខែ គឺខែមេសា ឧសភានិងមិថុនា។

ក្រោយពេល៣ខែនេះ ក្រុមការងារដែលមានកងកម្លាំងសមត្ថកិច្ចទាំង២ប្រភេទ អាជ្ញាធរមូលដ្ឋាន និងក្រសួងមហាផ្ទៃ ក៏ដូចជាក្រសួងការងារនឹងចុះពិនិត្យដល់ទីតាំងអាជីវកម្មតែម្តង។ គ្រប់ជនបរទេសមកប្រកបរបរនានា មកវិនិយោគ ធ្វើការ និងស្នាក់នៅកម្ពុជា ត្រូវយល់ដឹងពីច្បាប់របស់កម្ពជា និងអនុវត្តឱ្យបានល្អ ជៀសវាងប្រព្រឹត្តបទល្មើសផ្សេងៗ ប្រាសចាកពីច្បាប់របស់កម្ពុជា។

លោក ហ៊ុន សុរិទ្ធី មានប្រសាសន៍ថា ចំពោះការងារនេះ មាន៣តំណាក់កាលដែលម្ចាស់ ឬអ្នកកាន់កាប់សណ្ឋាគារ អាផាតម៊ិន និងម្ចាស់ខុនដូ ត្រូវដឹង ក្នុងនោះទី១ គឺអាជ្ញាធរត្រូវណែនាំ និងផ្សព្វផ្សាយដើម្បីឱ្យបានដឹងពីច្បាប់យកទៅអនុវត្ត កុំអោយប្រព្រឹត្តខុសច្បាប់រហូតមានទោសទណ្ឌ។ ទី២ អនុវត្តវិធានការរដ្ឋបាល ដោយចុះពិនិត្យដល់ទីតាំង និងទី៣ វិធានការច្បាប់។ ទោះបីជាយ៉ាងណាក្តីលោកសុំឱ្យម្ចាស់ ឬអ្នកកាន់កាប់សណ្ឋាគារ អាផាតម៊ិន និងម្ចាស់ខុនដូទាំងអស់ត្រូវចូលរួមសហការជាមួយអាជ្ញាធរមានសមត្ថកិច្ច ដើម្បីយើងរួមគ្នាលុបបំបាត់ និងបង្ការទប់ស្កាត់បទល្មើសគ្រប់ប្រភេទបាន៕ អត្ថបទ៖ ប្រាក់ វ៉ាន់ដា ​