អន្ដរជាតិ៖ រដ្ឋមន្រ្តីការបរទេសចិនលោក Qin Gang និយាយនៅថ្ងៃអង្គារនេះថា ចិនត្រូវតែពង្រឹងទំនាក់ទំនងជាមួយរុស្ស៊ី ស្រប​ពេល​ដែលពិភពលោកកាន់តែច្របូកច្របល់ជាងមុន។ ថ្លែងប្រាប់ក្រុមអ្នកសារព័ត៌មាននៅកិច្ចប្រជុំសភាប្រចាំឆ្នាំក្នុងទីក្រុងប៉េកាំង លោក Qin និយាយថា អន្តរកម្មជិតស្និត​រវាង​មេដឹកនាំទាំង ២ លោកប្រធានាធិបតី Xi Jinping និងលោកប្រធានាធិបតី Vladimir Putin បានផ្តល់ក្តីសង្ឃឹមសម្រាប់​ទំនាក់​ទំនង​ចិន-រុស្ស៊ី។

ពេលត្រូវបានសួរថាតើវាអាចទៅរួចដែរឬទេកាលដែលចិន និងរុស្ស៊ី បោះបង់ចោលប្រាក់ដុល្លារ និងប្រាក់អឺរ៉ូ ដើម្បី​ពាណិជ្ជកម្ម​ទ្វេភាគីនោះ លោក Qin​និយាយថា ប្រទេសគួរតែប្រើប្រាស់រូបិយប័ណ្ណណាក៏ដោយឲ្យតែសុវត្ថិភាព និងអាចទុក​ចិត្ត​បាន៕