ភ្នំពេញ៖ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបានថ្លែងថា យោធិននារីកម្ពុជា ក្រៅពីកំពុងថែរក្សាសន្តិភាពនៅក្នុងប្រទេសក៏កំពុងជួយរកសន្តិភាពនៅអន្តរជាតិផងដែរ។

ក្នុងពិធីអបអរខួបលើកទី១១២ ទិវាអន្តរជាតិនារី ៨មីនា ឆ្នាំ២០២៣ ដែលធ្វើឡើងនៅថ្ងៃទី៧ ខែមីនា ក្រោមមូលបទ “ស្ត្រីរួមគ្នារក្សាសុខសន្តិភាព ដើម្បីកិច្ចអភិវឌ្ឍ ក្នុងយុគសម័យឌីជីថល” សម្ដេចពិជ័យសេនា មានប្រសាសន៍ថា រាល់សមិទ្ធផលជាច្រើន ដែលកំពុងកើតឡើងជាបន្តបន្ទាប់ នៅក្នុងប្រទេសនាពេលបច្ចុប្បន្ន គឺមិនអាចកាត់ផ្ដាច់បាននោះទេ នូវស្នាដៃ និងការចូលរួមរបស់ស្ដ្រី ដែលរាប់ទាំងវិស័យសេដ្ឋកិច្ចផងដែរ។

សម្ដេចបានបន្តថា ដោយឡែកយោធិននារីកម្ពុជា មានចិត្តអំណត់យ៉ាងខ្លាំង ក្នុងការការពារនូវបូរណ ភាពទឹកដី ថែរក្សាសន្តិភាពជូនប្រជាពលរដ្ឋឲ្យរស់នៅមានភាពសុខសាន្ត និងកងទ័ពមួកខៀវជាស្ត្រីរបស់កម្ពុជា កំពុងបំពេញបេសកកម្មនៅក្រៅប្រទេស ក្រោមឆ័ត្ររបស់អង្គការសហប្រជាជាតិ ក្នុងប្រទេសជាច្រើន ។

សម្ដេចពិជ័យសេនា បានជំរុញដល់បណ្ដាអង្គភាពក្រោមឱវាទក្រសួងការពារជាតិ ត្រូវបន្តលើកស្ទួយពង្រីកសមត្ថភាពរបស់យោធិនជាស្ត្រី ផ្ដល់ឱកាសក្នុងការងារ ពិសេសការតម្លើងតួនាទីឋានន្តរសក្តិ៍ ឲ្យសមតាមសមត្ថភាព និងរយៈពេលនៃការចូលបម្រើការងារ។

លោកជំទាវ ដាំ ដារិនី រដ្ឋលេខាធិការក្រសួងការពារជាតិ ទទួលបន្ទុកការងារយេនឌ័រ មានប្រសាសន៍ថា គិតដល់ឆ្នាំ២០២៣នេះ កម្លាំងកម្ពុជាសរុបចំនួន ៨ ៨៥៩នាក់ ក្នុងនោះនារី ចំនួន ៦៨១នាក់ បានចេញបំពេញបេសកកម្មចំនួន១១ ក្នុងប្រទេសចំនួន៩ លើជំនាញបោសសំអាតមីន វិស្វកម្ម សំណង់ផ្តេក-បញ្ឈរ អាវុធហត្ថ មន្ទីរពេទ្យកម្រិត២ វិស្វកម្ម ព្រលានយន្តហោះ កំទេចគ្រាប់ មិនទាន់ផ្ទុះ នាយទា ហាន សេនាធិការ និងសង្កេតការណ៍យោធា។ បច្ចុប្បន្នកម្លាំងកម្ពុជាចំនួន ៧៨៨នាក់ ក្នុងនោះ នារី ចំនួន ១៣០នាក់ កំពុងបំពេញបេសកកម្ម នៅប្រទេសចំនួន៤ រួមមាន សាធារណរដ្ឋស៊ូដង់ខាងត្បូង លីបង់ អាហ្វ្រិកកណ្តាល និងម៉ាលី។

លោកជំទាវបានបន្ថែមថា យោធិននារីក្រៅពីកំពុងសិក្សាតាមសាលានៅក្នុងប្រទេស ក៏កំពុងសិក្សានៅក្រៅប្រទេសផងដែរ ក្នុងនោះមានប្រទេសម៉ាឡេស៊ី ម៉ុងហ្គោលី ថៃ សាធារណរដ្ឋកូរ៉េ ប្រេស៊ីល អ៊ីតាលី អូស្រ្តាលី ឡាវ និងប្រទេសវៀតណាមជាដើម៕ អត្ថបទ ៖ បាន សុខរិទ្ធិ