ភ្នំពេញ៖ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានបញ្ជាក់តាមរយៈហ្វេសប៊ុកផ្លូវការនាថ្ងៃទី៨ ខែមីនា ឆ្នាំ២០២៣នេះ ថា កាលពីថ្ងៃទី៧ ខែមីនា ម្សិលមិញនេះ ជាថ្ងៃដែលយុទ្ធនាការ BeyondTheGames បានបង្កើតវេទិកាជាផ្លូវការក្នុងមហិច្ឆតា បត់ «បេះដូងច្រើនជាងគេលើពិភពលោក» ចំនួន១លានបេះដូងដោយប្រជាជនកម្ពុជា ដែលការបត់បេះ​ដូងនេះ គឺជាការចូលរួមចំណែករបស់ ស.ស.យ.ក. ដើម្បីអបអរសាទរភាពជាម្ចាស់ផ្ទះរបស់កម្ពុជា ក្នុងការរៀបចំព្រឹត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២។

ឯកឧត្តមថ្លែងថា បេះដូង១ដែលត្រូវបានបត់ សមមាត្រជាថវិកាចំនួន ៥០០រៀល ដែលក្នុង១លាន​បេះដូងសរុបជាថវិកា ៥០០ លានរៀល ឬប្រមាណ ១២៥,០០០ដុល្លារ ដោយមានដៃគូបរិច្ចាគចំនួន ៥ ស្ថាប័នស្ម័គ្រចិត្តចូលរួមបរិច្ចាគជំនួស ដើម្បីយកថវិកា​ទាំងនេះប្រគល់ជូនកីឡាករ កីឡាការិនី​ដែលមានពិការភាព តាមរយៈគណៈកម្មាធិការជាតិ​ប៉ារ៉ាឡាំពិកកម្ពុជា។

ឯកឧត្ដមថ្លែងថា៖«ខ្ញុំមានក្តីរំភើប និងមិននឹកស្មានថា កន្លងមកនេះ ការបត់បេះដូងនេះ​មានការចូលរួមយ៉ាងសស្រាក់ស្រាំពីគ្រប់មជ្ឈដ្ឋានទូទាំងប្រទេស»។

ឯកឧត្តម ហ៊ុន ម៉ានី បញ្ជាក់ថា គោលបំណងនៃការបត់បេះដូងនេះ មិនមែនគ្រាន់តែផ្ដោតសំខាន់ទៅការបំបែកឯតទគ្គកម្មពិភពលោកតែមួយមុខនោះទេ តែការបត់បេះដូងនេះ បានបង្ហាញអំពីក្ដីស្រលាញ់ ការផ្ដល់កំលាំងចិត្ត និងការគាំទ្រដោយគ្មានលក្ខខណ្ឌរបស់ប្រជាជនខ្មែរ ដើម្បីបុព្វហេតុរួមសម្រាប់ប្រទេសជាតិមាតុភូមិ។ លើសពីនេះទៅទៀត នេះជាការបង្ហាញអំពីសាមគ្គីភាព និងការរួបរួមគ្នារបស់ប្រជាជនខ្មែរ ដើម្បីជាការគាំទ្រដល់កីឡាករ កីឡាការិនី តាមរយៈសកម្មភាពជាក់ស្ដែង ក៏ដូចជាបង្ហាញឱ្យពិភពលោកបានឃើញថា​ប្រទេសកម្ពុជាតូច តែបេះដូងរបស់ប្រជាជនកម្ពុជាធំទូលាយ (Cambodia: Small Country, Big Heart)។

ឯកឧត្ដមបញ្ជាក់ថា យុទ្ធនាការនេះ គឺមានគោលបំណង និងគោលដៅច្បាស់លាស់ មុននឹង​ឈានដល់ការសម្រេចចិត្តធ្វើរឿងនេះ។ អ្វីដែលជាបំណងប្រាថ្នារបស់យើងក្នុងកម្មវិធីនេះ មិនខុសពីអ្វីដែលយើងធ្លាប់បានធ្វើកន្លងមកនោះទេ គឺការបង្កើតឱ្យមានជាវេទិកា និងការ​បណ្តុះស្មារតីនៃការរួបរួមគ្នា សាមគ្គីគ្នា ធ្វើសកម្មភាពនានាដែលស្របជាមួយការរីក​លូតលាស់ក្នុងសង្គមជាមួយគ្នា សម្រាប់ជាប្រយោជន៍វិជ្ជមានដល់កម្ពុជា៕