​អាមេរិក៖ រដ្ឋមន្ត្រី​ក្រសួងការពារជាតិ​សហរដ្ឋអាមេរិក​លោក Lloyd Austin បាន​ធ្វើ​ទស្សនកិច្ច​ទៅកាន់​ប្រទេស​អ៊ីរ៉ាក់​ដោយ​មិនបាន​ប្រកាស​ជាមុន​កាលពី​ថ្ងៃ​អង្គារ ទី​៧ ខែមីនា ដែល​មាន​រយៈពេល​ជិត​ ២០​ឆ្នាំ​បន្ទាប់ពី​ការ​លុកលុយ​ដឹកនាំ​ដោយ​សហរដ្ឋអាមេរិកផ្តួល​រំលំ​របប​លោក Saddam Hussein ដោយ​លោក Austin បាន​និយាយ​ថា ទីក្រុង​វ៉ាស៊ីនតោន​បាន​ប្តេជ្ញា​រក្សា​វត្តមាន​យោធា​របស់​ខ្លួន​នៅ​ក្នុង​ប្រទេសនេះ​។

ការឈ្លានពាន​កាលពី​ឆ្នាំ២០០៣ បណ្ដាល​ឲ្យ​ជន​ស៊ីវិល​អ៊ីរ៉ាក់​រាប់​ម៉ឺន​នាក់​ស្លាប់ និង​បាន​បង្កើត​អស្ថិរភាព​ដែល​នៅ​ទីបំផុត​បាន​ត្រួសត្រាយ​ផ្លូវ​ សម្រាប់​ការ​លេច​ឡើង​ក្រុម​សកម្មប្រយុទ្ធ​រដ្ឋ​អ៊ីស្លាម បន្ទាប់ពី​សហរដ្ឋអាមេរិក​បាន​ដក​កងកម្លាំង​របស់​ខ្លួន​ចេញ​នៅ​ឆ្នាំ​២០១១​។ លោក Austin បាន​ប្រាប់​អ្នកសារព័ត៌មាន​ បន្ទាប់​ពី​ជួប​ជាមួយ​នាយករដ្ឋមន្ត្រី​អ៊ីរ៉ាក់លោក Mohammed al-Sudani ថា កងកម្លាំង​អាមេរិក​បាន​ត្រៀមខ្លួន​ដើម្បី​បន្ត​នៅ​ក្នុង​ប្រទេស​អ៊ីរ៉ាក់ តាម​ការស្នើសុំ​របស់រ​ដ្ឋា​ភិ​បាល​អ៊ីរ៉ាក់​។ កងកម្លាំង​ទាំងនេះ​កំពុង​ធ្វើ​ប្រតិបត្តិការ​នៅក្នុង​ការមិន​ប្រយុទ្ធ ផ្តល់យោបល់ និង​មាន​តួនាទី​គាំទ្រ​ដល់​ការប្រយុទ្ធ​ដែល​ដឹកនាំ​ដោយ​អ៊ីរ៉ាក់​ប្រឆាំង​អំពើ​ភេរវកម្ម​។

បច្ចុប្បន្នសហរដ្ឋអាមេរិក​មាន​កងទ័ព ២,៥០០​នាក់​នៅក្នុង​ប្រទេស​អ៊ីរ៉ាក់ និង ៩០០​នាក់​ទៀត​នៅក្នុង​ប្រទេស​ស៊ី​រីដើម្បី​ជួយ​ណែនាំ និង​ជួយ​ដល់​កងទ័ព​ក្នុង​តំបន់​ប្រយុទ្ធប្រឆាំង​ក្រុម​រដ្ឋ​ឥស្លាម ដែល​កាលពី​ឆ្នាំ២០១៤ ដណ្តើមបាន​ទឹកដី​ជាច្រើន​នៅក្នុង​ប្រទេស​ទាំងពីរ​។ កងជីវពល​ដែល​គាំទ្រ​ដោយ​អ៊ីរ៉ង់​នៅក្នុង​ប្រទេស​អ៊ីរ៉ាក់ ម្តងម្កាល​បាន​បាញ់​គ្រាប់រ៉ុក្កែត​ដាក់​លើ​គោលដៅ​ទៅលើ​កងកម្លាំង​សហរដ្ឋអាមេរិក និង​ស្ថានទូតនៅ​ទីក្រុង​បា​កដាដ​។ សហរដ្ឋអាមេរិក និង​អ៊ីរ៉ង់បាន​ខិតជិត​ដល់​ជម្លោះ​ដ៏​ពេញលេញ​កាលពី​ឆ្នាំ២០២០ បន្ទាប់ពី​កងកម្លាំង​សហរដ្ឋអាមេរិក​បានសម្លាប់​មេបញ្ជាការ​ឆ្មាំ​បដិវត្តន៍​អ៊ីរ៉ង់ឧ​ត្ត​ម​សេនីយ៍ Qassem Soleimani ក្នុងការ​វាយប្រហារ​ដោយ​យាន​ដ្រូ​ន​។ ជន​ស៊ីវិល​អ៊ីរ៉ាក់​ចន្លោះ​ពី ១៨៥,០០០ ទៅ ២០៨,០០០​នាក់បាន​ស្លាប់​នៅក្នុង​សង្គ្រាម​នោះ៕

អត្ថបទ៖ ប៊ុនថន