​អ៊ីស្រាអែល៖ ទាហាន​អ៊ីស្រាអែល​កាលពី​ថ្ងៃ​អង្គារ​បានសម្លាប់​ជន​ប៉ា​ឡេ​ស្ទី​ន ៦នាក់​នៅ​ក្រុង Jenin ជា​ការ​វាយឆ្មក់​ចុងក្រោយ​នៃ​អំពើ​ហិង្សា​នៅ​ក្នុង​តំបន់ West Bank។ ក្រសួងសុខាភិបាល​ប៉ា​ឡេ​ស្ទី​នបាន​និយាយ​ថា មនុស្ស ​៦​នាក់​បាន​ស្លាប់ ម្នាក់​មាន​អាយុ​ ៤៩​ឆ្នាំ និង​អ្នក​ផ្សេងទៀត​មាន​អាយុ​ជាង ​២០​ឆ្នាំ​នៅ​ក្នុង​ការ​ប៉ះទង្គិច​គ្នា​ដោយ​ការ​បាញ់​កាំភ្លើង​។

លោក Nabil Abu Rudeineh អ្នកនាំពាក្យ​របស់​ប្រធានាធិបតី​ប៉ា​ឡេ​ស្ទី​ន​លោក Mahmud Abbas បាន​ហៅ​ការប្រើប្រាស់​គ្រាប់​រ៉ុក្កែត​នៅ​ក្នុង​ជំរំ​ជន​ភៀស​ខ្លួន​នៅ​ក្រុង Jenin ជាហេតុ​ការណ៍​ប៉ះទង្គិច​គ្នា​ញឹកញាប់​នៅ​ភាគ​ខាងជើង​តំបន់ West Bank ជា​សកម្មភាព​នៃ​សង្គ្រាម​។​ ​អ្នក​ឃើញ​ហេតុការណ៍​និយាយ​ថា ទាហាន​អ៊ីស្រាអែល​បាន​ចូល​ទៅ​ក្នុង​ជំរំ ហើយ​ហ៊ុមព័ទ្ធ​លំនៅឋាន​មួយ​កន្លែង​ ខណៈ​ក្រុម​សកម្ម​ប្រយុទ្ធ​បាន​វាយ​ប្រយុទ្ធ​តបត​វិញ ដោយ​កងទ័ព​អ៊ីស្រាអែល​រាយការណ៍​ថា ​ឧបករណ៍​បំផ្ទុះ​ត្រូវ​បាន​គប់​មក​លើ​ពួកគេ​។ កងពល​នៅ​ក្រុង Jenin ជា​ក្រុម​សកម្មប្រយុទ្ធ​នៅក្នុង​ជំរំ​បាន​និយាយ​នៅ​លើ​បណ្តាញ Telegram ថា ខ្មាន់កាំភ្លើង​របស់​ពួកគេ​បាន​ប្រយុទ្ធ​ក្នុងការ​ប៉ះទង្គិច​គ្នា​ដោយ​ហិង្សា​ជាមួយ​កងកម្លាំង​អ៊ីស្រាអែល​។

​ក្រសួងសុខាភិបាល​ប៉ា​ឡេ​ស្ទី​ន​បាន​និយាយថា យ៉ាងហោចណាស់​មាន​ជន​ប៉ា​ឡេ​ស្ទី​ន​ ២៦​នាក់​បាន​រង​របួស​ក្នុងអំឡុងពេល​ការ​វាយឆ្មក់​កាលពី​ថ្ងៃ​អង្គារដែល​ក្នុងនោះ​មាន ៣នាក់​របួសធ្ងន់​។ នាយករដ្ឋមន្ត្រី​លោក Benjamin Netanyahu បាន​សរសើរ​កងកម្លាំង​អ៊ីស្រាអែល​លើ​ប្រតិបត្តិការ​របស់​ពួកគេ ​នៅក្នុង​ជំរំ​ជនភៀសខ្លួន​នៅ​ក្រុង Jenin តំបន់ West Bank​។ ការ​វាយឆ្មក់​បានបញ្ចប់​ដោយ​បណ្តាល​ឲ្យ​ជន​ប៉ា​ឡេ​ស្ទី​ន​យ៉ាងតិច ​៦​នាក់​ស្លាប់ រួមទាំង​ខ្មាន់កាំភ្លើង​ក្រុម​ហា​ម៉ា​សម្នាក់​ដែល​ត្រូវបាន​គេ​សង្ស័យថា ​បាន​បាញ់សម្លាប់​បងប្អូន​ប្រុស​ជនជាតិ​អ៊ីស្រាអែល ២​នាក់​នៅ​ជិត​ក្រុង Huwara កាលពី​សប្តាហ៍​មុន​៕

អត្ថបទ៖ ប៊ុនថន