ភ្នំពេញ៖ នាយឧត្តមសេនីយ៍សន្ដិបណ្ឌិត នេត សាវឿន អគ្គស្នងការនគរបាលជាតិ បានដាស់តឿន និងក្រើនរំលឹកដល់គ្រប់ស្នងការរាជធានី-ខេត្ត និងគ្រប់នាយកដ្ឋានទាំងអស់ ដែលចំណុះឲ្យអគ្គស្នងការដ្ឋាននគរបាលជាតិ ត្រូវតែការពារឲ្យបានដាច់ខាតនូវសុខ សន្ដិភាព និងខឿនសន្ដិសុខជាតិ ធានាស្ថេរភាពសង្គម និងបន្ត បង្រ្កាបរាល់បទល្មើសឲ្យបានសកម្មបន្ថែម​ទៀត ដើម្បីភាពសុខសាន្តរបស់ប្រជាពលរដ្ឋ។

ក្នុងឱកាសអញ្ជើញដឹកនាំកិច្ចប្រជុំ រៀបចំផ្សព្វផ្សាយការងារឆ្នាំ២០២៣ របស់ក្រសួងមហាផ្ទៃ និង​អគ្គស្នងការដ្ឋាននគរបាលជាតិ និងអបអរសាទរខួបលើកទី១១២ ទិវាអន្ដរជាតិនារី ០៨ មីនា ឆ្នាំ២០២៣ នារសៀលថ្ងៃទី៧ ខែមីនា ឆ្នាំ២០២៣នេះ ​ឯកឧត្តម នាយឧត្តមសេនីយ៍ នេត សាវឿន បាន​លើកឡើងថា គ្រប់ស្នងការទាំងអស់ «ត្រូវការពារឲ្យបានដាច់ខាតនូវសុខ សន្ដិភាព និងខឿន​សន្ដិសុខជាតិ ធានាស្ថេរភាពសង្គម​ បន្ដប្រយុទ្ធប្រឆាំងបទល្មើស កាត់បន្ថយបទល្មើស បង្កើន​ភាពកក់ក្ដៅ កាត់បន្ថយការភ័យខ្លាចរបស់ប្រជាពលរដ្ឋ ក្នុងនោះរួមមាន ទាំងបទល្មើសព្រហ្មទណ្ឌ គ្រឿងញៀន ការប្រយុទ្ធប្រឆាំងអំពើជួញដូរមនុស្ស ស្ដ្រី និងកុមារតាមគ្រប់ទម្រង់ ពិសេសយក​ចិត្តទុកដាក់​លើបញ្ហាតាមប្រព័ន្ធបច្ចេកវិទ្យាព័ត៌មានជាដើម»។

នាយឧត្តមសេនីយ៍ បានបន្តទៀតថា ការពង្រឹងការងារសណ្ដាប់ធ្នាប់ ចរាចរណ៍ និងអគ្គិភ័យ។ គោលដៅធំបំផុតកាត់បន្ថយគ្រោះថ្នាក់ ហើយការងារអាទិភាព គឺជំរុញការអប់រំឲ្យមានការចូលរួមពី ព្រោះកងកម្លាំងមិនអាចធ្វើតែឯកឯងបានទេ ពោលត្រូវតែមានការសហការជាមួយស្ថាប័នពាក់ព័ន្ធ និងប្រជាពលរដ្ឋ។

ទាក់ទងនិងការងារព្រំដែន នាយឧត្តមសេនីយយ៍ ក៏បានប្រាប់ដល់គ្រប់ស្នងការខេត្តនៅតាម​បណ្តោយ​ព្រំដែនទាំងអស់ត្រូវបន្ដកិច្ចសហការជាមួយកងទ័ពការពារព្រំដែន ​ការពារអធិបតេយ្យជាតិ ពិសេស​ពង្រឹងប្រព័ន្ធការពារតាមព្រំដែន បង្កើនកិច្ចសហការទប់ស្កាត់បទល្មើស លើកកម្ពស់​សមត្ថភាព​ការហ្វឹកហាត់ និងការពង្រឹងស្មារតីសហការជាមួយប្រទេសជិតខាងជាដើម។

សម្រាប់ការងារនគរបាលប៉ុស្ដិ៍រដ្ឋបាល ​នាយឧត្តមសេនីយ៍ នេត សាវឿន បានលើកឡើងថា ត្រូវអនុវត្តឲ្យបានពេញលេញប្រកបដោយប្រសិទ្ធភាពនូវការងារនគរបាល ​និងសហគមន៍។ ការងារនេះជារឿងសំខាន់ ​ព្រោះជាចលករដ៏សំខាន់ជំរុញការអនុវត្តគោលនយោបាយជាតិ ភូមិ ឃុំសង្កាត់ មានសុវត្ថិភាព។

លើសពីនេះ ត្រូវជំរុញការបណ្ដុះបណ្ដាលមន្ដ្រីនគរបាលប៉ុស្ដិ៍ ​ការឧបត្ថម្ភគាំទ្រ និងផ្លាស់ប្ដូរ​ឥរិយាបថក្នុងការបម្រើសេវាជូនប្រជាពលរដ្ឋឲ្យបានសកម្មបន្ថែមទៀតផងដែរ។

ជាមួយគ្នានោះដែរ នាយឧត្តមសេនីយ៍ ក៏បានរំលឹកដល់ស្នងការទាំងអស់ត្រូវពង្រឹងការងារ​ប្រចាំបញ្ជា និងអន្ដរាគមន៍ ត្រូវត្រៀមលក្ខណៈសម្បត្តិជាប្រចាំដើម្បីចេញសង្គ្រោះ​នៅពេល​មានហេតុការណ៍ និងគ្រប់គ្រងស្ថានការណ៍​ នៅពេលមានហេតុការណ៍កើតឡើង។ ក្នុងនោះត្រូវរៀបចំក្រុមតាមដានប្រព័ន្ធ​ទំនាក់ទំនង​សង្គម ក្រុមប្រតិកម្មរហ័ស ដើម្បីឆ្លើយតប​ដោះស្រាយ និងសំណូមប្រជាពលរដ្ឋ ខណៈនៅអគ្គស្នងការដ្ឋាននគរបាលជាតិ មាន​មជ្ឈមណ្ឌល​ប្រចាំបញ្ជា​ លេខទូរស័ព្ទ ១១៧ រង់ចាំទទួលបណ្ដឹង និងការសួរនាំពី​ប្រជាពលរដ្ឋ​ជាដើម៕អត្ថបទ៖ បាន ចក់