ភ្នំពេញ៖ ព្រឹកថ្ងៃទី០៨ ខែមីនានេះ លោកទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន និងជាប្រធានសហព័ន្ធបាល់បោះរទេះជនពិការកម្ពុជា បានចុះសួរសុខទុក្ខ និងជួប​សំណេះ​សំណាល​ជាមួយអត្តពលិកកីឡាបាល់បោះរទេះជនពិការកម្ពុជា ​និងអត្តពលិកប៉ារ៉ាហ្គេមទាំងអស់ ដែលកំពុងទទួលការហ្វឹកហាត់នៅមជ្ឈមណ្ឌលជាតិតេជោ​ (បឹងបៃតង) ក្នុងឱកាសទិវាសិទ្ធិនារីអន្តរជាតិ ៨មីនា ២០២៣។

ក្នុងឱកាសនោះ​ឯកឧត្តម ទេសរដ្ឋមន្រ្តី បានជម្រុញឲ្យអត្តពលិកជនពិការទាំងអស់ ត្រូវបង្កើន​ការ​ហ្វឹកហាត់ឲ្យកាន់តែខ្លាំងក្លាបន្ថែមទៀត ទាំងកម្លាំងកាយ ​កម្លាំងចិត្ត ​និងបច្ចេកទេស ជាពិសេស​ត្រូវបង្កើនស្មារតីជាក្រុម និងសាមគ្គីភាព ដើម្បីត្រៀមចូលរួមប្រកួតអាស៊ានប៉ារ៉ាហ្គេមលើកទី១២ ដែលកម្ពុជានឹងធ្វើជាម្ចាស់ផ្ទះក្នុងឆ្នាំ២០២៣នេះ។

ឯកឧត្តម ទេសរដ្ឋមន្រ្តី បានកោតសរសើរដល់ក្រុមនារីបាល់បោះរទេះជនពិការកម្ពុជា ដែលបាន​ដណ្តើមមេដាយមាសជូនជាតិមាតុភូមិ ព្រមទាំងជូនពរឲ្យក្រុមអត្តពលិកបាល់បោះរទេះជនពិការ ទទួលបានជោគជ័យ​ជាបន្តបន្ទាប់ទៀត​ ក្នុងការប្រកួតអាស៊ានប៉ារ៉ាហ្គេមខាងមុខនេះ។ក្នុងឱកាសចុះសួរសុខទុក្ខ ​ឯកឧត្តម ទេសរដ្ឋមន្ដ្រី ​បាននាំយកនូវទឹកសុទ្ធ ៤០០ យូរ និង ១០០ កេសធំ, នំភីហ្សា និងថវិកាមួយចំនួន ​ប្រគល់ជូនដល់ក្រុមអត្តពលិកប៉ារ៉ាហ្គេម ផងដែរ៕