​ម៉ិកស៊ិក៖ មន្ត្រី​ប្រទេស​ម៉ិ​ក​ស៊ិ​ក​ និង​សហរដ្ឋអាមេរិក​និយាយថា​ ជនជាតិ​អាមេរិក ​២​នាក់​ក្នុងចំណោម ៤​នាក់​ដែល​ត្រូវ​បាន​ចាប់ជំរិត​នៅ​ប្រទេស​ម៉ិ​ក​ស៊ិ​ក​កាលពី​សប្តាហ៍​មុន​បាន​ស្លាប់ ហើយ​ពីរ​នាក់​ទៀត​នៅ​រស់ ដែល​ពេលនេះ​បាន​ត្រឡប់​មក​សហរដ្ឋអាមេរិក​វិញ​។

ពលរដ្ឋ​អាមេរិក​ ៤​នាក់​ដែល​ត្រូវ​បាន​ចាប់ជំរិត​ដោយ​ជន​ប្រដាប់​អាវុធ​កាលពី​ថ្ងៃទី​៣ ខែមីនា ខណៈ​កំពុង​បើកបរ​រថយន្ត​ចូល​ទៅ​ក្នុង​ទីក្រុង Matamoros រដ្ឋ Tamaulizas ប្រទេស​ម៉ិ​ក​ស៊ិ​ក​ឆ្លងកាត់​ព្រំដែន​ពីរ​ដ្ឋ Texas។ បុរស​ម្នាក់​ដែល​គេ​ស្គាល់​ឈ្មោះថា José មកពី​រដ្ឋ Tamaulizas ត្រូវ​បាន​ចាប់ខ្លួន​។ អ្នក​នាំ​ពាក្យ​ក្រុមប្រឹក្សាសន្តិសុខ​ជាតិ​សេត​វិមាន លោក John Kirby និយាយ​ថា យើង​ចូលរួម​រំលែក​មរណទុក្ខ​ចំពោះ​មិត្តភក្តិ​ និង​ក្រុម​គ្រួសារ​របស់​អ្នក​ដែល​ត្រូវ​បាន​សម្លាប់​នៅ​ក្នុង​ការវាយប្រហារ​នេះ​។​ ​អគ្គមេធាវី​រដ្ឋលោក​ Mouseiros Mojica និយាយ​នៅ​លើ​បណ្តាញ Twitter ថា ជនរងគ្រោះ​ដែល​រួច​ផុត​ពី​ការ​ស្លាប់ ​២​នាក់​ត្រូវ​បាន​ប្រគល់​ទៅ​ឲ្យ​សហរដ្ឋអាមេរិក​ ក្នុង​កិច្ច​សហប្រតិបត្តិការ​ជាមួយ​ស្ថាន​កុងស៊ុល​ក្នុង​ទីក្រុង Matamoros​។ ពួកគេ​ត្រូវ​បាន​នាំទៅ​ក្រោម​ការ​អម​ការពារ​ប្រដាប់​អាវុធ​ ដោយ​ក្បួន​យោធា​ប្រទេស​ម៉ិ​ក​ស៊ិ​ក​។

​ការិយាល័យ​ស៊ើបអង្កេត FBI បាន​បញ្ជាក់​ថា ​ជនជាតិ​អាមេរិក ២​នាក់​ត្រូវបាន​គេ​រកឃើញថា​បាន​ស្លាប់ ហើយ​ពីរ​នាក់​ទៀត​ត្រូវបាន​គេ​នាំទៅ​កាន់​មន្ទីរពេទ្យ​ដើម្បី​ព្យាបាល​។ FBI និយាយ​ថា ជន​រង​គ្រោះ​ដែល​នៅ​រស់​ម្នាក់​មាន​របួសធ្ងន់​អំឡុង​ការវាយប្រហារ​។ សេចក្តីថ្លែងការណ៍​មួយ​បាន​និយាយ​ថា ទីភ្នាក់ងារ​ FBI នឹង​ធ្វើ​ការ​ជាមួយ​ដៃគូ​អន្តរជាតិ​ និង​ភ្នាក់ងារ​អនុវត្ត​ច្បាប់​ផ្សេងទៀត ដើម្បី​នាំ​យក​អ្នក​ទទួល​ខុសត្រូវ​ចំពោះ​ការវាយប្រហារ​ដ៏​រន្ធត់ ​និង​អំពើ​ហិង្សា​ដ៏​ឃោរ​ឃៅ​នេះ​មក​កាត់ទោស​សម្រាប់​បទឧក្រិដ្ឋ​របស់​ពួកគេ៕

អត្ថបទ៖ ប៊ុនថន