ភ្នំពេញ៖ ឯកឧត្តម ប្រាជ្ញ ច័ន្ទ ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) បានឱ្យដឹងថា នាពេលបច្ចុប្បន្ននេះ គណបក្សនយោបាយនីមួយៗ ​បានដាក់បេក្ខភាពនារី កាន់តែ​ច្រើនឡើង ក្នុងការឈរ ឈ្មោះជាបេក្ខភាពតំណាងរាស្ត្រ និងក្រុមប្រឹក្សាឃុំ-សង្កាត់ជាដើម ។

ក្នុងពិធីអបអរខួបអនុស្សាវរីយ៍ លើកទី១១២ ទិវានារីអន្តរជាតិ ៨មីនា ឆ្នាំ២០២៣ ដែលធ្វើឡើង នៅថ្ងៃទី៨ ខែមីនានេះ ឯកឧត្តម ប្រាជ្ញ ច័ន្ទ បានលើកឡើងថា គ.ជ.ប បានយកចិត្តទុកដាក់ជុំវិញ​សកម្មភាពទាំងឡាយរបស់ស្ត្រី ​លើការងារបោះឆ្នោត ក្នុងនោះ​ បានលើកទឹកចិត្ត គណបក្ស​នយោបាយ លើការដាក់បេក្ខភាពជានារី ទោះ គ.ជ.ប មិនមែនជាអ្នកសម្រេចទៅលើបេក្ខជន ប៉ុន្តែឃើញថា ​គណបក្សនយោ បាយនីមួយៗ បានស្នើដាក់បេក្ខភាពនារី ក្នុងសមមាត្រមួយដ៏គួរសម ។

ឯកឧត្តម ហង់ ពុទ្ធា អ្នកនាំពាក្យ គ.ជ.ប បានលើកឡើងថា ពីមួយអាណត្តិទៅមួយអាណត្តិ គណបក្ស​នយោបាយនីមួយៗ បានយកចិត្តទុកដាក់កាន់តែច្រើនឡើងលើស្ត្រី ដែលមានសមត្ថភាព ដោយ ផ្ដល់ឱកាសឲ្យពួកគេបានឈរឈ្មោះប្រកួតប្រជែងក្នុងការបោះឆ្នោតនានា ។

ឯកឧត្តម​ បានបញ្ជាក់ថា សម្រាប់បេក្ខស្ត្រីនេះ គ.ជ.ប ​បានតម្រូវឱ្យគណបក្សទាំងអស់ ត្រូវដាក់ បេក្ខជន​ជាស្ត្រីយ៉ាងហោចណាស់ ចំនួន២ភាគរយ ​តែមានគណបក្សមួយចំនួន បានដាក់បេក្ខភាព​ជាស្ត្រី លើស២ភាគរយ ទៅទៀត ។

ឯកឧត្តម ប្រាជ្ញ ច័ន្ទ បានឱ្យដឹងថា ស្ថាប័ន គ.ជ.ប បច្ចុប្បន្ន ​មានបុគ្គលិកបម្រើការចំនួនជាង ៧៥១នាក់​ ក្នុងនោះស្ត្រី ​មានជិត២០០នាក់​ (ស្មើនឹងជាង២០ភាគរយ) ក្នុងនោះ​ ចំនួន១៥០នាក់ មាន កម្រិតវប្បធម៌ថ្នាក់ឧត្តមសិក្សា ៕អត្ថបទ បាន សុខរិទ្ធិ