កំពង់ធំ ៖ ដើម្បីពង្រឹងគុណភាពសេវាកម្មទេសចរណ៍ឆ្ពោះទៅអបអរពិធីបុណ្យទន្លេលើកទី៧ នៅខេត្តកំពង់ធំ គណៈកម្មការអន្តរក្រសួងដើម្បីរៀបចំពិធីបុណ្យទន្លេលើកទី៧ និងក្រសួងទេសចរណ៍បានរៀបចំសិក្ខាសាលាផ្សព្វផ្សាយ និងណែនាំដល់ម្ចាស់និងតំណាងមូលដ្ឋានអាជីវកម្មទេសចរណ៍ឱ្យចូលរួមពង្រឹងគុណភាពសេវាកម្មជូនភ្ញៀវទេសចរណ៍ជាតិ និងអន្តរជាតិ។

ព្រឹកថ្ងៃទី៨ ខែមីនា ឆ្នាំ២០២៣ ក្រសួងទេសចរណ៍ រៀបចំសិក្ខាសាលាស្ដីពីការពង្រឹង គុណភាព សេវាកម្មទេសចរណ៍ ឆ្ពោះទៅអបអរពិធីបុណ្យទន្លេលើកទី៧ ។ សិក្ខាសាលានេះធ្វើឡើង អមជាមួយនិងពិធីចែកបណ្ណសរសើរ និង លិខិត សរសើរដល់មូលដ្ឋានអាជីវកម្មទេសចរណ៍ដែលមានស្នាដៃល្អ ក្រោមអធិបតីភាពឯកឧត្តម ទិត ចន្ថា រដ្ឋលេខាធិការ ប្រចាំការក្រសួងទេសចរណ៍ និង លោក ជា វ៉ាន់ចាន់ អភិបាលរងខេត្តកំពង់ធំ ព្រមទាំងមានការចូលរួមពីរដ្ឋលេខាធិការ អនុរដ្ឋលេខាធិការ អគ្គនាយក និងថ្នាក់ដឹកនាំក្រសួងទេសចរណ៍ អង្គភាពពាក់ព័ន្ធចំណុះរដ្ឋបាលខេត្ត និងប្រតិបត្តិករ ទេសចរណ៍សរុបប្រមាណ៣៥០នាក់។

ក្នុងឱកាសនោះដែរ ឯកឧត្តម ទិត ចន្ថា រដ្ឋលេខាធិការប្រចាំការក្រសួងទេសចរណ៍ ណែនាំឱ្យមូលដ្ឋាន អាជីវកម្ម ទេសចរណ៍ត្រូវពង្រឹងគុណភាពសេវាកម្មទេសចរណ៍ ដោយសេវាកម្មត្រូវតែល្អស្ថិតក្នុងកម្រិតស្ដង់ដា និងប្រកប ដោយទំនុកចិត្តសម្រាប់ភ្ញៀវទេសចរ ស្របតាមយុទ្ធនាការ «សេវាមួយ ស្ដង់ដាមួយ»។ ទន្ទឹមនឹងនេះ អាជីវកម្ម ទាំងអស់ក៏ត្រូវពង្រឹងសមត្ថភាពប្រកួតប្រជែងរបស់ខ្លួន ដោយផ្ដើមចេញពីការអនុវត្តប្រចាំថ្ងៃ និងបំពេញតាម តម្រូវការ ភ្ញៀវបច្ចុប្បន្នចូលចិត្តកន្លែងស្អាត មានសេវាល្អ គុណភាព និងអនាម័យ។ ឯកឧត្តម ស្នើដល់រដ្ឋបាលខេត្តកំពង់ធំ អាជ្ញាធរគ្រប់លំដាប់ថ្នាក់ និងភាគីឯកជនទាំងអស់ត្រូវរួមគ្នាថែរក្សាសន្ដិសុខ សណ្ដាប់ធ្នាប់សាធារណៈ បង្គន់សាធារណៈ និងសោភ័ណភាពទីក្រុងឱ្យបានល្អក្នុងឱកាសពិធីបុណ្យទន្លេនេះ ដោយឈរ លើមូលដ្ឋាន ក្រុងស្ទឹងសែន ជាជ័យ លាភីផ្ការំដួល២ទង នៃចលនាប្រឡងប្រណាំងទីក្រុងស្អាតថ្នាក់ជាតិនាពេលកន្លងទៅនេះ។ អង្គសិក្ខាសាលាបានឱ្យដឹងថា ពិធីបុណ្យទន្លេមានគោលបំណងបំផុសចលនាមហាជនឱ្យចូលរួមក្នុងការងារអភិរក្ស និងអភិវឌ្ឍធនធានទន្លេប្រកបដោយនិរន្តរភាព និងចូលរួមសម្រេចយុទ្ធសាស្ត្រពិពិធកម្មទេសចរណ៍ តាមរយៈការ បង្កើតព្រឹត្តិការណ៍ទេសចរណ៍ថ្មីៗ សម្រាប់ខេត្តតាមដងទន្លេនៅកម្ពុជាតាំងពីឆ្នាំ២០១៤ ដូចមានបញ្ជាក់ ក្នុង អនុក្រឹត្យ លេខ ២៦៥ អនក្រ.បក ចុះថ្ងៃទី១១ ខែតុលា ឆ្នាំ២០១២ ស្ដីពីពិធីបុណ្យទន្លេ។

ជាមួយគ្នានេះ លោក ជា វ៉ាន់ចាន់ អភិបាលរងខេត្កំពង់ធំ បញ្ជាក់ថា ដើម្បីជាការលើក​ទឹកចិត្ត​ដល់​អាជីវកម្មទេសចរណ៍​ក្នុងខេត្តកំពង់ធំ រដ្ឋបាលខេត្តកំពង់ធំ ដោយមានមន្ទីរទេសចរណ៍ជាសេនាធិការ បានណែនាំនិងវាយ​តម្លៃផ្ដល់​បណ្ណ​សរសើរ និងលិខិតសរសើរដល់សេវាកម្មទេសចរណ៍ដែលបានខិតខំរៀបចំទីតាំង និងបម្រើសេវាកម្មប្រកប​ដោយ​គុណភាពទាំង៩០អាជីវកម្ម (បណ្ណសរសើរចំនួន៣៦អាជីវកម្ម និងលិខិតសរសើរចំនួន៥៤អាជីវកម្ម) ដែលបាន​អនុវត្ត​តាមសារាចរណែនាំលេខ ០៤៣ សជណ.អគឧ.ចុះថ្ងៃទី២៧ ខែមករា ឆ្នាំ២០២៣ ដែលមានការ​ណែនាំ​ចំនួន១០ចំណុច​ ដែលសំខាន់នៃការការណែនាំមាន២ គឺទី១.ឯកសណ្ឋានបុគ្គលិកសេវាកម្មត្រឹមត្រូវទៅតាមផ្នែកនីមួយៗ និងទី២​តម្លៃសេវាកម្មសមរម្យ មិនដំឡើងថ្លៃហួសហេតុ និងមានបញ្ជាក់រាល់លក្ខខណ្ឌ អនុវត្តផ្សេងៗបានច្បាស់លាស់៕