ភ្នំពេញ៖ នាឱកាសចាប់ផ្ដើមពិធីបុណ្យទន្លេលើកទី៧នៅខេត្តកំពង់ធំ ក្រសួងទេសចរណ៍ និងរដ្ឋបាលខេត្តកំពង់ធំ បានដឹកនាំសកម្មភាពដាំដើមឈើប្រមាណជាង ១០០ដើម នៅសួន​អាពាហ៍ពិពាហ៍ ស្ថិតនៅក្នុងឃុំ ត្រពាំងឫស្សី ស្រុកកំពង់ស្វាយ ខេត្តកំពង់ធំ ដើម្បីជំរុញ​ស្មារតី​ដាំដើមឈើ ថែរក្សាការពារព្រៃឈើ ​និងចូលរួមទប់ស្កាត់ការកាប់បំផ្លាញព្រៃឈើ និងបទល្មើសព្រៃឈើជាដើម។

ក្នុងសកម្មភាពដាំដើមឈើ ដែលបានធ្វើឡើង នៅព្រឹកថ្ងៃទី៨ ខែមីនា នេះ លោក អ៊ុន បុត្ត អភិបាលរងខេត្តកំពង់ធំ បានលើកឡើងថា ការដាំដើមឈើ នាឱកាសនេះ គឺជាសកម្មភាពបង្ហាញ​ឱ្យឃើញពីការស្រឡាញ់បរិស្ថាន ស្រឡាញ់សហគមន៍ ។ ការដាំដើមឈើមួយដើម ​នៅថ្ងៃនេះ ស្មើនឹងការ​សន្សំទ្រព្យ ដ៏ធំធេងសម្រាប់ការរស់នៅរបស់កូនចៅជំនាន់ក្រោយ ។

លោកបានបញ្ជាក់ថា «សកម្មភាពដាំដើមឈើ នៅថ្ងៃនេះ ​នឹងក្លាយទៅជាចលករជួយ​ជំរុញ​មហាជន​ឱ្យបន្តចូលរួមដាំដើមឈើឡើងវិញ ​និងចូលរួមថែរក្សាការពារព្រៃឈើ ដែលមានស្រាប់​សម្រាប់​បច្ចុប្បន្ន និងទៅអនាគត» ។

ឯកឧត្តម តុប សុភ័ក រដ្ឋលេខាធិការក្រសួងទេសចរណ៍ ​បានលើកឡើងថា​ កម្ពុជា គឺជាប្រទេស ដែល​សម្បូរទៅដោយសម្បត្តិវប្បធម៌ ​សម្បត្តិធនធានធម្មជាតិ ដែលអំណោយផលដល់ការបង្កើត​នូវសក្ដានុ ពលអេកូទេសចរណ៍ ដែលជាគោលដៅ និងផលិតផលទេសចរណ៍មួយដ៏ទាក់ទាញ។

ឯកឧត្តម ​បានលើកទឹកចិត្តប្រជាពលរដ្ឋ ពិសេសគូស្វាមីភរិយាថ្មី ​អាចមកដាំដើមឈើនៅសួន អាពាហ៍ពិពាហ៍នេះឱ្យបានគ្រប់គ្នា ​ព្រោះការដាំដើមឈើនេះ ​មិនមែនសម្រាប់តែទេសចរនោះទេ ពិសេស ​គឺសម្រាប់គូស្វាមីភរិយាថ្មី អាចដាំក្រោយពេលរៀបការហើយ ​ហើយថែរក្សាឱ្យបានរស់រាន លូតលាស់ធំ ធាត់ ទុកសម្រាប់កូនចៅជំនាន់ក្រោយ ។ «ដើមឈើ អាចខ្វះមនុស្សបាន តែ​មនុស្ស​មិនអាចខ្វះដើមឈើ បានទេ» ពោលគឺនៅកន្លែងណា​ ក៏មនុស្សត្រូវការដើមឈើដែរ ។ «ដើមឈើជួយទាក់ទាញភ្ញៀវទេសចរ ​ជំរុញឱ្យសេដ្ឋកិច្ចសហគមន៍កាន់តែប្រសើរឡើង ទីណាមាន​ដើមឈើ ទីនោះមានទេសចរ» ។

កូនឈើ ដែលបានដាំនាឱកាសនេះ គឺមានចំនួនសរុបប្រមាណជាង១០០ដើម​ ភាគច្រើន​ជា​ប្រភេទ​ដើមធ្នង់ ​បេង ​និងនាងនួន​ ដែលសុទ្ធតែជាប្រភេទឈើប្រណីត ៕អត្ថបទ៖ លី សាងស៊ីន