​ភ្នំពេញ ៖ ឯកឧត្ដម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម បាន​ដឹក​នាំ​គណៈប្រតិភូ​កម្ពុជា​ទទួល​​ជួប​​ពិភាក្សា​ការងារ​ជាមួយ លោកជំទាវ Tanja Fajon ឧបនាយករដ្ឋមន្រ្តី និង​ជា​រដ្ឋមន្រ្តី​ក្រសួង​ការបរទេស​ នៅ​ទី​ក្រុង​ដូហា ដើម្បីពង្រឹង និង​ពង្រីក​កិច្ចសហប្រតិបត្តិការ​ពាក់ព័ន្ធ​និង​វិស័យ​ពាណិជ្ជកម្ម សេដ្ឋកិច្ច វិនិយោគ ធនធានទឹក និងទេសចរណ៍ រវាងប្រទេសកម្ពុជា និង​សាធារណៈរដ្ឋស្លូវានី។

​ប្រភពពីក្រសួងពាណិជ្ជកម្ម នៅល្ងាចថ្ងៃទី៨ មីនា ឆ្នាំ២០២៣នេះ បានឲ្យដឹងថា នៅក្នុង​កិច្ចពិភាក្សា​នេះ​ឯកឧត្តមរដ្ឋមន្រ្តី​បាន​ជម្រាបជូនភ្ញៀវអំពីសមិទ្ធិផលថ្មីៗដែលកម្ពុជាសម្រេចបានក្នុងនាមជាម្ចាស់​ផ្ទះដឹកនាំ​កិច្ចប្រជុំ​កំពូលអាស៊ាន និងកិច្ចប្រជុំពាក់ព័ន្ធកាលពីឆ្នាំ២០២២ ដែលមានការ​ចូលរួម​ពីថ្នាក់​ដឹកនាំកំពូលធំៗ​ជាច្រើន​មកពី​ទូទាំង​សកលលោក។ ឯកឧត្តម ក៏បានជម្រាបជូនភ្ញៀវបន្ថែម អំពី​សមិទ្ធផល​ដែលកម្ពុជា​សម្រេចបាន​នាពេល​ប៉ុន្មាន​ឆ្នាំចុងក្រោយនេះ ដែលក្នុងនោះរួមមាន៖ កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ (RCEP), កិច្ចព្រមព្រៀង ពាណិជ្ជកម្ម​សេរីកម្ពុជា-ចិន (CCFTA), កិច្ចព្រមព្រៀងពាណិជ្ជកម្មសេរីកម្ពុជា-កូរ៉េខាង (CKFTA) និង​កម្ពុជា​កំពុងត្រៀមនឹងចុះហត្ថលេខាលើ​កិច្ចព្រមព្រៀង​ភាពជាដៃ​គូសេដ្ឋកិច្ចគ្រប់ជ្រុងជ្រោយរវាងកម្ពុជា និង​អេមីរ៉ាតអារ៉ាប់រួមនាពេល (Cambodia-UAE CEPA)ផងដែរ។

ជាកិច្ចឆ្លើយតប លោកជំទាវឧបនាយករដ្ឋមន្រ្តី បានលើកឡើងថា បន្ទាប់ពីវិបត្តិនៃជំងឺរាតត្បាតកូវិត-១៩ មាន​ការ​ថមថយ ប្រទេសនៅក្នុងសហភាពអ៊ឺរ៉ុបមួយចំនួនបាននឹងកំពុងផ្តោត​ការចាប់​អារម្មណ៍​មកកាន់តំបន់​អាស៊ីអាគ្នេយ៍ ដែល​ក្នុងនោះ​សាធារណរដ្ឋស្លូវានីបានផ្តោតការចាប់អារម្មណ៍ និងការ​កោតសរសើរ​ខ្លាំង​ចំពោះការអភិវឌ្ឍន៍ និងរីកចម្រើនរបស់ប្រទេសកម្ពុជា តាមរយៈសុខសន្តិភាព ស្ថេរភាពនយោបាយ និង​សមិទ្ធិផល​សម្រេច​បានធំៗ​ជាច្រើន និងជាបន្តបន្ទាប់។ បន្ថែមពីនេះ លោកជំទាវ ក៏បានបង្ហាញអំពី​គោលបំណង​ក្នុងការពង្រឹងកិច្ចប្រតិបត្តិការ​ជាមួយប្រទេសកម្ពុជា​លើវិស័យ​ពាក់ព័ន្ធមួយ​ចំនួនដូចជា៖ វិស័យពាណិជ្ជកម្ម វិនិយោគ សុខាភិបាល ធនធានទឹក ការប្រែប្រួលអាកាសធាតុ សមភាពស្រ្តី និង​វិស័យទេសចរណ៍ ដើម្បីអាចផ្តល់នូវផល​ប្រយោជន៍​ទៅវិញទៅ​មកសម្រាប់ប្រជាជននៃប្រទេសទាំងពីរផងដែរ។

 ក្រសួងពាណិជ្ជកម្ម បានបញ្ជាក់ថា ជាកិច្ចបញ្ចប់ លោកជំទាវឧបនាយករដ្ឋមន្រ្តី ក៏បានកត់សម្គាល់ និងវាយតម្លៃខ្ពស់​ចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្រោមការដឹកនាំដ៏ឈ្លាសវៃរបស់សម្តេចនាយករដ្ឋមន្រ្តីតេជោ ហ៊ុន សែន ដែលបានប្ដេជ្ញាចិត្តក្នុងការបន្តថែរក្សាស្ថិរភាព​នយោបាយ វិបុលភាព និងស្ថិរភាពម៉ាក្រូសេដ្ឋកិច្ច។ លោកជំទាវ ក៏បានបង្ហាញអំពីគោល​បំណង​ក្នុងការបំពេញទស្សនកិច្ចផ្លូវការមកកាន់ប្រទេសកម្ពុជា និងបាន​គោរពអញ្ជើញ ឯកឧត្តមរដ្ឋមន្រ្តី ទៅបំពេញទស្សនកិច្ចផ្លូវការនៅសាធារណរដ្ឋស្លូវាគីផងដែរ៕ អត្ថបទ​៖ ឈិត បូរ៉ាវី​