ភ្នំពេញ៖ ដើម្បីចូលរួមអបអរទិវា៨ ឧសភា ឆ្នាំ២០២១ នៅព្រឹកថ្ងៃទី២៨ ខែមេសានេះ មានសប្បុរសជនចំនួនពីរផ្សេងគ្នា បានចូលរួមផ្តល់ជំនួយសប្បុរសធម៌ ដល់កាកបាទ ក្រហមកម្ពុជា ទី១.ក្រុមហ៊ុន DUVAL GROUP ឧបត្ថម្ភថវិកាចំនួន ១ម៉ឺនដុល្លារ និងម៉ាស់ចំនួន ៣ម៉ឺនម៉ាស់, ទី២ លោក ភុំ ភិរម្យ និងលោកស្រី ឡេង ម៉េងអាំង ឧបត្ថម្ភថវិកា ចំនួន ១០លានរៀល អង្ករ ៨តោន ទឹកបរិសុទ្ធ ១០០កេស ម៉ាស់១០កេស និងអាល់កុល១០ប៊ីដុង។ ដែលពិធីប្រគល់ និងទទួលនេះ ធ្វើឡើងនៅអាគារទីស្នាក់ការកណ្តាលកាកបាទក្រហមកម្ពុជា។

នៅក្នុងឱកាសទទួលជំនួយពីសប្បុរសជននោះដែរ លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា មាននាំប្រសាសន៍សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងសូមថ្លែង អំណរគុណយ៉ាងជ្រាលជ្រៅបំផុត ចំពោះម្ចាស់ជំនួយទាំងពីរខាងលើ ដែលបានចូលរួមឧបត្ថម្ភ នូវថវិកា អង្ករ ម៉ាស់ និងទឹកអាល់កុល ដល់កាកបាទក្រហមកម្ពុជា។ 

ដើម្បីអបអរទិវាពិភពលោកកាកបាទ ក្រហម និងអឌ្ឍចន្ទក្រហម ៨ឧសភា ឆ្នាំ២០២១នេះ ក្រោមប្រធានបទ “រួមគ្នាជាមួយកាកបាទក្រហមកម្ពុជា ប្រយុទ្ធនឹងជំងឺកូវីដ-១៩ និងកសាងភាពធន់របស់សង្គមជាតិ”។

ម្ចាស់ជំនួយទាំងពីរខាងលើ សូមថ្លែងអំណរគុណយ៉ាងជ្រាវជ្រៅដល់ កាកបាទក្រហមកម្ពុជា ដែលបានផ្តល់ឱកាសដល់ក្រុមហ៊ុន បានរួមចំណែកជាមួយរាជរដ្ឋាភិបាល ក្នុងការដោះស្រាយទុក្ខលំបាកដល់ប្រជាពលរដ្ឋ ក្នុងន័យរួមគ្នាប្រយុទ្ធជាមួយ និងជំងឹកូវីដ ១៩ នៅក្នុងប្រទេសកម្ពុជា និងសាកល លោក។

ទន្ទឹមនឹងនេះ លោកជំទាវអគ្គលេខាធិការរងទី១ កាកបាទក្រហមកម្ពុជា បានអោយដឹងទៀតថា នៅក្នុងឱកាសខួបទី១៥៨ ទិវា៨ឧសភា ឆ្នាំ២០២១នេះដែរកាកបាទក្រហមកម្ពុជា សូមអំពាវនាវដល់សម្តេច ឯកឧត្តម លោកជំទាវ អ្នកឧកញ៉ា ឧកញ៉ា លោក លោកស្រី អ្នកនាងកញ្ញា សប្បុរសជន មកពីគ្រប់មជ្ឈដ្ឋានទាំងក្នុងវិស័យរដ្ឋ និងវិស័យឯកជន មេត្តាឧបត្ថម្ភគាំទ្រ ដោយសទ្ធាជ្រះថ្លាដល់កាកបាទក្រហមកម្ពុជា ដើម្បីបន្តផ្តល់សេវាកម្មមនុស្សធម៌ ប្រយុទ្ធនឹងជំងឺកូវីដ-១៩ និងកសាងភាពធន់របស់សង្គមជាតិ។

ជាមួយគ្នានេះ លោកជំទាវក៏មិនភ្លេចទេនូវសារបន្ថែម របស់សម្តេចតេជោនាយករដ្ឋមន្រ្តីនូវពាក្យថា ៣កុំ និង ៣ការពារ និងសូមឱ្យប្រជាពលរដ្ឋទាំងអស់ចូលរួមអនុវត្តវិធាន របស់ក្រសួងសុខាភិបាល និងការចត្តាឡីស័កឱ្យបានម៉ឺងម៉ាត់ ដែលជាវិធានការការពារទប់ស្កាត់នូវការឆ្លងជំងឺកូវីត១៩ កាន់តែខ្លាំងឡើងៗនៅក្នុង សហគមន៍៕ អត្ថបទ៖ សំ ងីម