ភ្នំពេញ៖ សមាគមធនាគារនៅកម្ពុជា និងក្រុមហ៊ុន ជីប ម៉ុង ក្រោមកិច្ចសហការជាមួយមជ្ឈមណ្ឌលជាតិផ្ដល់ឈាម នាថ្ងៃទី៨ ខែមីនា ឆ្នាំ២០២៣ បានរៀបចំយុទ្ធនាការបរិច្ចាគឈាមស្ម័គ្រចិត្ត ដើម្បីផ្ដល់ជីវិតទីពីរ ដល់អ្នកត្រូវការសង្គ្រោះជីវិតបន្ទាន់ ដោយទទួលបានការគាំទ្រពីអ្នកស័្មគ្រចិត្តប្រមាណជាង ២០០នាក់ នៅផ្សារទំនើប ជីប ម៉ុង ២៧១មេហ្គាម៉ល។

​យុទ្ធនាការ «បរិច្ចាគឈាម សង្គ្រោះជីវិត» នេះបានធ្វើឡើងដើម្បីអបអរសាទរខួបអនុស្សាវរីយ៍លើកទី១១២ ទិវាអន្តរជាតិនារី ៨មីនា ឆ្នាំ២០២៣។

លោក Han Peng Kwang ហេរញ្ញិក សមាគមធនាគារនៅកម្ពុជា បានថ្លែងអំណរគុណដល់អ្នកស្ម័គ្រចិត្ត និងសប្បុរសជនទាំងអស់ ដែលបានចូលរួមក្នុងយុទ្ធនាការបរិច្ចាគឈាមសង្គ្រោះជីវិតនេះ។ សកម្មភាពនេះ បានបង្ហាញពីកាយវិការមនុស្សធម៌ ក្នុងការចូលរួមជួយសង្គ្រោះជីវិតមនុស្ស និងបានចូលរួមចំណែកក្នុងលើកកម្ពស់ការយល់ដឹងពីអត្ថប្រយោជន៍ នៃការបរិច្ចាគឈាមផងដែរ។

ចំណែកអ្នកស្រី ងិន លីដា ប្រធានផ្នែកទំនាក់ទំនងសាធារណៈ នៃក្រុមហ៊ុន ជីប ម៉ុង មានប្រសាសន៍ថា ការចាប់ដៃគ្នារៀបចំកិច្ចបរិច្ចាគឈាមលើកនេះ គឺឈរលើគោលដៅរួមគ្នារបស់ ជីប ម៉ុង និងសមាគមធនាគារនៅកម្ពុជា ក្នុងការរួមចំណែកជួយសង្គមជាតិ តាមរយៈការលើកកម្ពស់ចលនាមនុស្សធម៌នៃការបរិច្ចាគឈាមស្ម័គ្រចិត្ត ដើម្បីបំពេញតម្រូវការឈាម និងផុសស្មារតីប្រជាពលរដ្ឋបន្តចែករំលែកក្ដីស្រឡាញ់ និងជួយគ្នាទៅវិញទៅមក ដោយមិនប្រកាន់ពូជសាសន៍ ឬសាសនាអ្វីឡើយ។

ទន្ទឹមគ្នានោះដែរ លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្ដល់ឈាម ក៏បានអំពាវនាវឱ្យមានការគាំទ្របន្តទៀតតាមគ្រប់រូបភាពក្នុងយុទ្ធនាការផ្សេងៗក្នុងពេលខាងមុខ។ កិច្ចបរិច្ចាគឈាមមិនប៉ះពាល់ដល់សុខភាពទេ ហើយឈាមមានប្រភពតែមួយគត់ គឺពីមនុស្ស មិនមានរោងចក្រឱសថណាផលិតបានទេ។ សូមកុំរង់ចាំដល់វេលាមួយនៅពេលដែលយើងចង់ធ្វើអំណោយឈាម បែរជាហួសពេល។

ឆ្លៀតក្នុងឱកាសនោះឯកឧត្តម អ៊ូ ចាន់តារា អគ្គលេខាធិការ ធនាគារជាតិនៃកម្ពុជា តំណាងដ៏ខ្ពង់ខ្ពស់ ឯកឧត្តម ជា ចាន់តូ ទេសាភិបាល ធនាគារជាតិនៃកម្ពុជា បានបញ្ជាក់ថា យុទ្ធនាការនេះ គឺដើម្បីចូលរួមអបអរសាទរខួបអនុស្សាវរីយ៍លើកទី១១២ ទិវាអន្តរជាតិនារី ៨មីនា ឆ្នាំ២០២៣ ក៏បានលើកទឹកចិត្តដល់យុវជន និងសាធារណជនទាំងអស់ បន្តជួយគាំទ្រ និងចូលរួមក្នុងសកម្មភាពមនុស្សធម៌នេះបន្តទៀត។

សូមបញ្ជាក់ដែរថា តម្រូវការឈាមប្រចាំថ្ងៃសរុបមានជាង២៥០ប្លោកនៅរាជធានីភ្នំពេញ។ តម្រូវការឈាមទូទាំងប្រទេសមានប្រមាណជិត១០ម៉ឺនប្លោក ដែលលើសពីឆ្នាំមុនៗជិត២០% ហើយមជ្ឈមណ្ឌលជាតិផ្តល់ឈាម បានគ្របដណ្តប់ជាង៧០%នៃការផ្គត់ផ្គង់ឈាមទូទាំងប្រទេស។ ចំណែកការទទួលបានឈាមតាមរយៈសប្បុរសជនដោយមិនគិតកម្រៃនិងដោយស័្មគ្រចិត្តឆ្លើយតបបានប្រហែលតែ ១០% តម្រូវការក្នុងប្រទេសប៉ុណ្ណោះ ខណៈដែលប្រទេសជិតខាងការបរិច្ចាគឈាមដោយស្ម័គ្រចិត្តអាចផ្គត់ផ្គង់រហូតដល់លើសពី ៩០%នៃតម្រូវការ។ នេះបើយោងតាមទិន្នន័យរបស់អង្គការសុខភាពពិភពលោក៕ អត្ថបទ រដ្ឋា