ភ្នំពេញ៖ តាមរយៈតេឡេក្រាមផ្លូវការរបស់សម្តេចតេជោ ហ៊ុន សែន នៅល្ងាចថ្ងៃទី០៨ ខែមីនា ឆ្នាំ២០២៣នេះ ដោយភ្ជាប់នូវវីដេអូភាគ នៃភាពយន្តភាគរឿង«កូនប្រុសក្រោមពន្លឺព្រះចន្ទពេញបូណ៍មី» សម្តេចតេជោនាយករដ្ឋមន្ត្រី បានរំលឹកពីអតីតកាល ស្ត្រីនៅកម្ពុជាបានក្លាយជាចំណាប់ខ្មាំងនៃសង្គ្រាមត្រូវស្លាប់ និងរបួសត្រូវព្រាត់ប្រាស់គ្រួសារ ហើយយុវនារីយ៉ាងច្រើន បានលះបង់យុវវ័យបំរើកងទ័ព ប៉ុន្តែ បច្ចុប្បន្ននារីទាំងអស់រស់ក្រោមដំបូលសន្តិភាព អាចដើរលេងកំសាន្តនិងជួបជុំគ្រួសារនៅថ្ងៃឈប់សំរាក ថ្ងៃទិវាអន្តរជាតិនារី៨មីនានេះ។ 

តាមរយៈសំណេរទាំងស្រុងរបស់សម្តេចតេជោ បានលើកឡើងថា « ទោះរឿងនេះ មិនទាន់ត្រូវបានចាក់បញ្ចាំងក៏មែនពិត តែដោយថ្ងៃនេះជាទិវាសិទ្ធនារីអន្តរជាតិដែលនារីកម្ពុជាកំពុងរស់នៅក្រោមដំបូលសន្តិភាពមានថ្ងៃឈប់សម្រាកដើរលេងកម្សាន្ត និងជួបជុំគ្រួសារ។ល។

ខ្ញុំចង់បង្ហាញនូវការលំបាករបស់នារីក្នុងសម័យសង្គ្រាមតាមរយៈឈុតមួយ នៃភាគទី១២ នៃរឿងកូនប្រុសក្រោមពន្លឺព្រះចន្ទពេញបូណ៍មីដែលកាលពេលនោះយុវនារីយ៉ាងច្រើនបានលះបង់យុវវ័យបំរើឲ្យភាគីចម្បាំងទាំងសងខាង។

ស្ត្រីទាំងអស់នៅទូទាំងប្រទេសបានក្លាយជាចំណាប់ខ្មាំងនៃសង្គ្រាមត្រូវស្លាប់ និងរបួសត្រូវព្រាត់ប្រាស់រវាងម្តាយ ជីដូនជាមួយកូនស្រីនិងចៅស្រី។ » 

សម្តេចតេជោ បានបញ្ជាក់ទៀតថា « លាហើយសង្រ្គាម ស្វាគមន៍សន្តិភាពនិងការអភិវឌ្ឍ។ យើងត្រូវរួមគ្នាការពារសន្តិភាពឲ្យខាងតែបាន។»