ភ្នំពេញ ៖ ឧត្តមសេនីយ៍ឯក លន់ សុផាត អគ្គស្នងការរងនគរបាលជាតិ បានធ្វើការក្រើនរំលឹក និងណែនាំ​ដល់​អង្គភាពអន្ដរាគមន៍ពិសេស ត្រូវពង្រឹង និងធ្វើការហ្វឹកហាត់បន្ថែមទៀតក្នុងកិច្ចការពារសន្តិសុខ សណ្តាប់ធ្នាប់ ជូនថ្នាក់ដឹកនាំ និងប្រទេសជាតិទាំងមូលបើទោះបីជាកន្លងទៅទទួលបានជោគជ័យក្នុងកិច្ចការពារប្រ កិច្ច ប្រជុំកំពូលអាស៊ាន និងអាស៊ានបូកក្តីនោះ។

 ក្នុងឱកាសអញ្ជើញផ្តល់រថយន្តចំនួនពីរគ្រឿង និងម៉ូតចំនួនបួនគ្រឿងដែលជាអំណោយរបស់ នាយឧត្តមសេនីយ៍ សន្តិបណ្ឌិត នេត សាវឿន ផ្តល់ជូនដល់អង្គភាពអន្តរាគមន៍ និងអង្គភាពតម្រួតការពារ នារសៀលថ្ងៃទី៨ ខែមីនា ឆ្នំា២០២៣នេះ ឧត្តមសេនីយ៍ឯក លន់ សុផាត បានលើកឡើងថា ក្នុងនាមមន្រ្តីនគរបាលអន្តរាគមន៍ ត្រូវពង្រឹង​សមត្ថភាពបន្ដទៀត ដោយត្រូវធ្វើការហ្វឹកហ្វឺនជាប្រចាំ ប្រមូលផ្ដុំកម្លាំងនៅអង្គភាព ព្រមទាំងរក្សាសាមគ្គីភាពផ្ទៃក្នុង ព្រោះជោគជ័យកន្លងមក គឺកើតចេញពីការសាមគ្គីភាពរបស់ប្រធានអង្គភាព និងមន្ដ្រីទាំងអស់ នៃអង្គភាព​អន្ដរាគមន៍​ពិសេស។

 លោកឧត្តមសេនីយ៍ឯក ក៏បានលើកឡើងផងដែរថាបើទោះបីទទួលបានជោគជ័យនូវការងារកន្លងមកក្ដី ក៏នៅមា​នចន្លោះប្រហោរមួយចំនួនកើតមានផងដែរ ប៉ុន្ដែភាពអវិជ្ជាមានទាំងអស់នោះ ត្រូវបានលុបបំបាត់ទៅដោយ តាមរយៈកិច្ចខិតខំប្រឹងប្រែងរបស់ប្រធានអង្គភាព និងមន្ដ្រីទាំងអស់ ព្រមទាំងទទួលបានការសាទរពីថ្នាក់ដឹកនាំ នៃអគ្គស្នងការដ្ឋាននគរបាលជាតិផងដែរ។

 យ៉ាងណាក៏ដោយលោកឧត្តមសេនីយ៍ឯក លន់ សុផាត ណែនាំបន្ថែមដល់អង្គភាពអន្តរាគមន៍ និងតម្រួតការពារ​ត្រូវត្រៀមលក្ខណៈឲ្យបានខ្ជាប់ខ្ជួន និងត្រៀមទទួលបទបញ្ជាពីថ្នាក់លើក្នុងកិច្ចការពារ សន្តិសុខសណ្តាប់ធ្នាប់ ចំពោះកម្ពុជាធ្វើជាម្ចាស់ផ្ទះក្នុងព្រឹត្តិការណ៍ប្រកួតកីឡាស៊ីហ្គេម និងអាស៊ាន ប៉ារ៉ា ហ្គេម ព្រឹត្តិការណ៍អង្គរសង្រ្កាន រួមទាំងព្រឹត្តិការណ៍បោះឆ្នោតសកលនាពេលខាងមុខនេះផងដែរ។

សូមបញ្ជាក់ថាក្នុងឱកាសនោះដែរលោកឧត្តមសេនីយ៍ឯកលន់ សុផាន ក៏បាននាំយកនូវអំណោយ​របស់​នាយឧត្តមសេនីយ៍ សន្ដិបណ្ឌិត នេត សាវឿន រួមមាន រថយន្ដ២គ្រឿង មួយគ្រឿងជូនអង្គភាពអន្ដរាគមន៍ពិសេស និងមួយគ្រឿងទៀតជូនអង្គភាពតម្រួតបទបញ្ជា,ម៉ូតូ៤គ្រឿង,ថវិកាចំនួន៥លានរៀល, អង្ករ៣តោន, មី១០កេស, ត្រីខ១០កេស ព្រមទាំងឧបត្ថម្ភថវិកាជូនមន្ដ្រីគ្រប់ៗរូប។ បន្ថែមពីនេះ ក្នុងឱកាសទិវានារីអន្ដរជាតិ៨មីនាលោកក៏​បានជូនពរដល់កងកម្លាំងនារីនៃអង្គភាពអន្ដរាគមន៍ពិសេសផងដែរ៕ អត្ថបទ ៖ ចក់