​អ៊ីរ៉ង់៖ យោង​តាម​របាយការណ៍​បញ្ចេញ​ដោយ​អង្គការ​ឃ្លាំមើល​អាវុធ​នុយក្លេអ៊ែរ​ របស់​អង្គការ​សហប្រជាជាតិ​កាលពី​ថ្ងៃ​ពុធ អ៊ីរ៉ង់​បាន​ចាប់ផ្ដើម​ចម្រាញ់​សារធាតុ​អ៊ុយ​រ៉ានី​ញ៉ូ​ម ​ជិត​ដល់​កម្រិត​អាច​ផលិត​គ្រាប់​បែក​នុយក្លេអ៊ែរ​បាន​ហើយ ដែល​នឹង​ធ្វើ​ឲ្យ​ទីក្រុង​តេ​អេ​រ៉ង់​ជិត​ក្លាយ​ជា​មហាអំណាច​នុយក្លេអ៊ែរ​។

​ទីភ្នាក់ងារ​ថាមពល​អា​តូ​មិ​ក​អន្តរជាតិ ឬ IAEA បាន​និយាយ​នៅ​ក្នុង​របាយការណ៍​រប​ស់​ខ្លួន​ថា អ៊ីរ៉ង់​បាន​ផលិត​ភាគល្អិត​នៃ​អ៊ុយ​រ៉ានី​ញ៉ូ​ម​ដែល​ត្រូវ​បាន​ចម្រាញ់​រហូតដល់ ​83.7% នៅ​រោងចក្រ​ចម្រាញ់​សារធាតុ​អ៊ុយ​រ៉ានី​ញ៉ូ​ម Fordo នៅ​ភាគ​ខាងត្បូង​ទីក្រុង​តេ​អេ​រ៉ង់​។ ​នៅ​ក្នុង​សេចក្ដីថ្លែងការណ៍​ដាច់​ដោយ​ឡែក​មួយ ប្រទេស​ជា​សម្ព័ន្ធមិត្ត​របស់​សហ​រដ្ឋ​អាមេរិក​មាន​បារាំង អាល្លឺម៉ង់ និង​ចក្រភព​អង់គ្លេស​បាន​ចេញ​ការព្រមាន​ដ៏​ម៉ឺងម៉ាត់​មួយ​ ជុំវិញ​សកម្មភាព​នុយក្លេអ៊ែរ​របស់​ប្រទេស​អ៊ីរ៉ង់​។

​លោកស្រី Corinne Kitsell ឯកអគ្គរដ្ឋទូត​អង់គ្លេស និង​លោក Götz Schmidt-Bremme ឯកអគ្គរដ្ឋទូតអាល្លឺម៉ង់​ប្រចាំ​អង្គការ​ឃ្លាំមើល​នុយក្លេអ៊ែរ បាន​និយាយ​នៅ​ក្នុង​សេចក្តីថ្លែងការណ៍​ថា របកគំហើញ​ពេញ​លេញ​ដែល​រៀបរាប់​ដោយ​របាយការណ៍ ​របស់​អគ្គនាយក​ភ្នាក់ងារ​នេះ​គួរ​ឱ្យ​ព្រួយបារម្ភ ព្រោះ​អ៊ីរ៉ង់​នៅតែ​បន្ត​ការ​បង្កើន​វត្ថុ​ធាតុ​សម្រាប់​ផលិត​នុយក្លេអ៊ែរ​ដែល​មិន​ធ្លាប់​មាន​ពី​មុន​មក និង​ធ្ងន់ធ្ងរ​៕

អត្ថបទ៖ សុខមាន