ត្បូងឃ្មុំ៖ រដ្ឋបាលខេត្តត្បូងឃ្មុំ បានប្រកាសនៅថ្ងៃនេះថា ស្ត្រីជនជាតិខ្មែរម្នាក់អាយុ ៤៦ឆ្នាំ បានស្លាប់ដោយសារជំងឺកូវីដ-១៩កាលពីថ្ងៃម្សិលមិញនេះ។
ក្នុងសេចក្ដីប្រកាសព័ត៌មាន រដ្ឋបាលខេត្តត្បូងឃ្មុំបានបញ្ជាក់ថា ស្ត្រីវ័យ ៤៦ឆ្នាំ ដែលរស់នៅក្នុងឃុំជីរោទិ៍ទី១ ក្នុងស្រុកត្បូងឃ្មុំ បានស្លាប់បាត់បង់ជីវិតនៅឯមន្ទីរពេទ្យបង្អែកព្រះនរោត្ដម សីហនុ នៅយប់មិញនេះ។
បើតាមរដ្ឋបាលខេត្តត្បូងឃ្មុំ ស្ត្រីរូបនេះ បានបង្ហាញអាការៈក្ដៅខ្លួន ក្អក ហត់តិចចាប់តាំងពីថ្ងៃទី២០ ខែមេសា ហើយត្រូវបានព្យាបាលដោយលេបថ្នាំដែលផ្ដល់ឱ្យដោយស្វាមីរបស់គាត់ដែលជាគ្រូពេទ្យប្រចាំនៅមណ្ឌលសុខភាពជីរោទី៍ទី១។
សេចក្ដីប្រកាសព័ត៌មានរបស់រដ្ឋបាលខេត្តត្បូងឃ្មុំ បញ្ជាក់ថា ស្ត្រីរូបនេះត្រូវបានបញ្ជូនទៅសម្រាកព្យាបាលនៅមន្ទីរពេទ្យបង្អែកខេត្តកាលពីថ្ងៃម្សិលមិញនេះ ហើយលទ្ធផលតេស្តសំណាករបស់គាត់ បង្ហាញថា គាត់បានឆ្លងមេរោគកូវីដ-១៩។
រដ្ឋបាលខេត្តត្បូងឃ្មុំ និយាយថា ស្ត្រីរូបនេះ បានស្លាប់ បន្ទាប់ពីរលាកសួតធ្ងន់ធ្ងរដែលបណ្ដាលមកពីមេរោគកូវីដ-១៩៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
