ភ្នំពេញ៖ មនី្ទរពេទ្យមិត្តភាពខ្មែរ-សូវៀត ក្រសួងសុខាភិបាល បានខិតខំអភិវឌ្ឍន៍ហេដ្ឋារចនាសម្ព័ន្ធ សម្ភារៈបរិក្ខារវេជ្ជសាស្រ្តទំនើបៗ ក្នុងស្មារតីជំរុញឲ្យមានការផ្តល់សេវាកាន់តែមានប្រសិទ្ធភាព​ជូនប្រជាពលរដ្ឋទូទាំងប្រទេស។

លោកវេជ្ជបណ្ឌិត វ៉ា ម៉េង ឯកទេសជំងឺសួត បានបញ្ចប់ការសិក្សាមកពីប្រទេសបារាំង និងជានាយផ្នែករង ក្តោបក្តាប់រួម នៃមជ្ឈមណ្ឌលឯកទេសជំងឺសួត ថ្លែងប្រាប់BTV ព័ត៌មាន នាព្រឹកថ្ងៃទី៩ ខែមីនា ឆ្នាំ២០២៣នេះថា ជាចក្ខុវិស័យរបស់ឯកឧត្តមសាស្រ្តាចារ្យ ងី ម៉េង នាយកមនី្ទរពេទ្យមិត្តភាពខ្មែរ-សូវៀត បានតម្រង់ទិសឲ្យថ្នាក់ដឹងនាំ បុគ្គលិក លោកគ្រូពេទ្យ អ្នកគ្រូពេទ្យ ដោះស្រាយយ៉ាងណាផ្តល់សេវាសុខាភិបាល ជូនប្រជាពលរដ្ឋ ទទួលបានការកាត់​បន្ថយភាពឈឺចាប់ពីជំងឺរ៉ាំរ៉ៃ កាត់បន្ថយការសម្រាកក្នុងពេទ្យយូរ មានន័យថា ចូលរួម​កាត់បន្ថយការ​ចំណាយរបស់ប្រជាពលរដ្ឋបានយ៉ាងល្អ ពេលនោះអត្រានៃភាពក្រីក្ររបស់ប្រជាពលរដ្ឋ នឹងស្របទៅតាមចក្ខុវិស័យរបស់រាជរដ្ឋាភិបាលដែលលោកចង់បាន។

ទន្ទឹមនឹងនោះមជ្ឈមណ្ឌលឯកទេសជំងឺសួត ក៏បានរៀបចំបន្ទប់វះកាត់ជំងឺសួត-ទ្រូង នៅក្នុងអគារនៃ​មជ្ឈមណ្ឌលផ្ទាល់ ដើម្បីងាយស្រួលក្នុងការសហការពិនិត្យ ព្យាបាល និងពិភាក្សាគ្នារវាងគ្រូពេទ្យ​ឯកទេសសួត និងគ្រូពេទ្យវះកាត់ ក៏ដូចជាគ្រូពេទ្យឯកទេសសណ្តំក្នុងស្មារតី​​ជំរុញឲ្យមាន​ការផ្តល់សេវា និងប្រសិទ្ធភាពព្យាបាលយ៉ាងល្អជូនដល់អ្នកជំងឺ។

បើតាមយោងតាមរបាយការណ៍សមិទ្ធផលសុខាភិបាល ឆ្នាំ២០១៨-២០២២ បង្ហាញនៅថ្ងៃនេះថា ពីឆ្នាំ២០១៨-២០២២ មណ្ឌលសុខភាពបានកើន៨៣កន្លែង និងមន្ទីរពេទ្យកើន៩កន្លែង ក្នុងនោះមន្ទីរពេទ្យ បង្កើត/បន្ថែមថ្មីមាន៖ មន្ទីរពេទ្យខេត្តត្បូងឃ្មុំ មន្ទីរពេទ្យហ្លួងម៉ែ មន្ទីរពេទ្យជាតិ តេជោសន្តិភាព និងមន្ទីរពេទ្យព្រះសីហនុ មណ្ឌលនៃក្តីសង្ឃឹម (ចំណុះ ២៨ គ្រែ ជាប់មន្ទីរពេទ្យបង្អែករាជធានីភ្នំពេញ) ដែលបានផ្ទេរពីអង្គការក្រៅរដ្ឋាភិបាល មកឱ្យក្រសួងសុខាភិបាលគ្រប់គ្រងកាលពីចុងឆ្នាំ២០២២ និងមន្ទីរពេទ្យបង្អែកស្រុក ៥ទៀត ដែលត្រូវបានតម្លើងមុខងារពីមណ្ឌលសុខភាពមានគ្រែឱ្យទៅជាមន្ទីរពេទ្យបង្អែក៖ ១.) មន្ទីរពេទ្យបង្អែកបវិល ក្នុងស្រុកប្រតិបត្តិថ្មគោល ខេត្តបាត់ដំបង, ២.) មន្ទីរពេទ្យបង្អែកសំបូរ ក្នុងស្រុកប្រតិបត្តិក្រចេះ ខេត្តក្រចេះ, ៣.) មន្ទីរពេទ្យបង្អែកព្រែកប្រសព្វ ក្នុងស្រុកប្រតិបត្តិ ឆ្លូង ខេត្តក្រចេះ, ៤.) មន្ទីរពេទ្យបង្អែកកែវសីមា ក្នុងស្រុកប្រតិបត្តិសែនមនោរម្យ ខេត្តមណ្ឌលគីរី និង ៥.) មន្ទីរពេទ្យបង្អែកជាំក្សាន្ត ក្នុងស្រុកប្រតិបត្តិព្រះវិហារ ខេត្តព្រះវិហារ។ គិតត្រឹមខែធ្នូឆ្នាំ២០២២ មណ្ឌលសុខភាពបានកើនឡើង ដល់១.២៨៨កន្លែង និងប៉ុស្តិ៍សុខភាព១២៥កន្លែង ដោយរាប់បញ្ចូលទាំងប៉ុស្តិ៍សុខភាពដែលស្ថិតនៅក្នុងពន្ធនាគារទូទាំងប្រទេស។ រីឯមន្ទីរពេទ្យបង្អែកបានកើនឡើងដល់១៣២ កន្លែង ក្នុងនោះមានមន្ទីរពេទ្យជាតិ ១២ កន្លែង ដោយរាប់បញ្ចូលមន្ទីរពេទ្យហ្លួងម៉ែ មន្ទីរពេទ្យព្រះសីហនុនៃក្តីសង្ឃឹម និងមន្ទីរពេទ្យជាតិតេជោសន្តិភាព ស្ថិតនៅក្នុងរាជធានីភ្នំពេញ មន្ទីរពេទ្យរាជធានី-ខេត្ត ២៥ កន្លែង និងមន្ទីរពេទ្យបង្អែក-ក្រុង-ស្រុក-ខណ្ឌ ៩៥ កន្លែង៕ អត្ថបទ រដ្ឋា