កំពង់ឆ្នាំង៖ កំពង់ផែពហុបំណង និងមណ្ឌលភ័ស្តុភារកម្មកំពង់ឆ្នាំង បាននឹងកំពុងចាប់ផ្ដើមសាងសង់រយៈពេលជាងមួយខែមកហើយ កំពង់ផែទឹកសាបនេះ នៅចំកណ្ដាលប្រទេសកម្ពុជា ដែលនឹងក្លាយជាកំពង់ផែដ៏មានសក្ដានុពល និងជំរុញដល់ការ​ដឹកជញ្ជូនទំនិញ និងកសិផលក្នុងស្រុកទៅកាន់អន្តរជាតិ។

កំពង់ផែពហុបំណង និងមណ្ឌលភ័ស្តុភារកម្មកំពង់ឆ្នាំង បាននឹងកំពុងសាងសង់ឡើងលើផ្ទៃដីជាង ១០០ហិកតា នៅភូមិកែងតាសុខ ឃុំកំពង់ហៅ ស្រុកកំពង់លែង ខេត្តកំពង់ឆ្នាំង។ កំពង់ផែនេះ នឹងជំរុញឱ្យការដឹកជញ្ជូនតាមផ្លូវទឹករបស់កម្ពុជាកាន់តែមានប្រសិទ្ធិភាពខ្ពស់មួយកម្រិតទៀត ហើយក៏នឹងក្លាយជាច្រកសេដ្ឋកិច្ចមួយដ៏សំខាន់តភ្ជាប់ទឹក និងសមុទ្រ លើវិស័យដឹកជញ្ជូន​តាមផ្លូវទឹក ពិសេសគឺនាំទំនិញ និងកសិផលក្នុងស្រុកពីតំបន់មួយទៅតំបន់មួយ និងឆ្ពោះទៅកាន់អន្តរជាតិ។

សូមជម្រាបថា កំពង់ផែពហុបំណងនេះនឹងសាង់សង់នូវកំពង់ផែដឹកជញ្ជូនទំនិញ ដោយប្រមូលផលកសិកម្ម កសិឧស្សាហកម្មចំរុះពីតំបន់ផ្សេងៗចែកចាយបន្តក្នុងទីផ្សារក្នុងស្រុក និងអន្តរជាតិ បង្កើតមណ្ឌលសន្និធិប្រេង ដែលមានពោងស្តុកប្រេងដើម្បីចែកចាយក្នុងប្រទេស បង្កើត​រមណីយដ្ឋាន​ធម្មជាតិ និងលំនៅឋានទំនើប និងប្រែក្លាយជាតំបន់សេដ្ឋកិច្ចពិសេសផងដែរ៕អត្ថបទ ៖ ប្រាក់ វ៉ាន់ដា