ឧត្តរមានជ័យ៖ ដើម្បីរួមចំណែកធ្វើឲ្យសម្រេចបាននូវចក្ខុវិស័យរបស់រាជរដ្ឋាភិបាលកម្ពុជា ក្នុងការលើកកម្ពស់សមត្ថភាពយេនឌ័រ ជាពិសេសភាពអង់អាចរបស់ស្ត្រីទាំងអស់ នៅថ្ងៃទី៩ខែមីនា ឆ្នាំ២០២៣នេះ មន្ទីរកិច្ចការនារីខេត្តឧត្ដរមានជ័យ បានរៀបចំពិធីអបអរសាទរ ទិវានារីអន្តរជាតិ ០៨ មីនា ខួបលើកទី១១២ ក្រោមប្រធានបទ "ស្រ្តីរួមគ្នារក្សាសុខសន្តិភាពដើម្បីកិច្ចអភិវឌ្ឍន៍​ក្នុង​យុគសម័យឌីជីថល សមភាពយេនឌ័រ"។

ក្នុងពិធីនោះដែរ ឯកឧត្តម ប៉ែន កុសល្យ អភិបាលខេត្តឧត្ដរមានជ័យ បាន​មាន​ប្រសាសន៍ថា គោលបំណងនៃកម្មពិធីនេះ ​គឺដើម្បីរំលេចពីតម្លៃនៃសុខសន្តិភាព និងការលើកកម្ពស់ វប្បធម៌ ដែលរាជរដ្ឋាភិបាលបាននឹងកំពុងគាំទ្រ គិតគូរយកចិត្តទុកដាក់ខ្ពស់ ជំរុញឲ្យមានការចូលរួម ពី​គ្រប់ស្ថាប័ន ទាំងបុរស និងស្ត្រី ដើម្បីវឌ្ឍនៈភាពសង្គម ឆ្ពោះទៅលើកកម្ពស់សិទ្ធិ​ ស្ថានភាព ជីវភាព ឋានៈ តួនាទី ​របស់ស្ត្រី​ ក៏ដូចជាសុខមាលភាពសង្គមផងដែរ។

ឯកឧត្ដម ប៉ែន កុសល្យ បន្តថា ក្រោមការដឹកនាំប្រកបដោយភាពឈ្លាសវៃ ​និងគតិបណ្ឌិតខ្ពស់ របស់​សម្ដេចតេជោ ហ៊ុន សែន ​នាយករដ្ឋមន្ត្រីនៃកម្ពុជា បានដាក់ចេញនូវយុទ្ធសាស្ត្រចតុកោណ ដោយ​ផ្ដោត​សំខាន់​ទៅលើគោលនយោបាយសមភាព”យេនឌ័រ” ដែលចាត់ទុកស្ត្រីគឺជាឆ្អឹងខ្នង​នៃ​សេដ្ឋកិច្ចជាតិ និងសង្គមជាតិ ដ៏​សំខាន់ក្នុងការចូលរួមសកម្មភាពផ្សេងៗ​ក្នុងដំណើរឆ្ពោះទៅមុខ និង​លើកកម្ពស់ស្ថានភាព សិទ្ធិ ឋានៈ និងតួនាទីរបស់ស្ត្រីនៅកម្ពុជា ​ដើម្បីឲ្យ​មានសមភាពពិតប្រាកដ​រវាងបុរស និងស្ត្រីដែលជាបំណងប្រាថ្នា​របស់បុគ្គលគ្រប់រូប​ គ្រប់វិស័យ គ្រប់ទីកន្លែង ពិសេសស្ត្រី គឺជាភ្នាក់ងារនាំមកនូវការផ្លាស់ប្ដូរ​ឥរិយាបទ​ក្នុងគ្រួសារតាមរយៈ​ ការអប់រំទូន្មានកូន ចៅឲ្យបានល្អ មិន​ប្រព្រឹត្តអំពើឧបាយមុខ ​និងការប្រើហិង្សាគ្រប់រូបភាពនោះឡើយ ​ដើម្បីធ្វើការ ​ទប់ស្កាត់ និង កាត់​បន្ថយ នូវរាល់អំពើហិង្សា ​ព្រមទាំងដោះស្រាយរាល់បញ្ហា ​ជម្លោះ នានា​ ប្រកបទៅដោយ សន្តិវិធីក្នុងការ​ងារសង្គមផងដែរ ។

យ៉ាងណាម៉ិញឯកឧត្ដម ក៏បានស្នើរដល់ស្រ្តីនៅក្នុងខេត្តឧត្តរមានជ័យ ត្រូវបង្កើនការខិតខំប្រឹង​ប្រែងរៀន​សូត្រសំដៅពង្រឹងលើកម្ពស់សមត្ថភាព ​យេនឌ័រ ​និងចំណេះដឹងរបស់ខ្លួន ឲ្យបានច្រើន​បន្ថែមទៀតដើម្បីក្លាយជាអ្នកដឹកនាំប្រកបទៅដោយវឌ្ឍនៈ ​និងជំហររឹងមាំ សម្រាប់ចូលរួម​ក្នុងការកសាងសង្គមជាតិបន្ថែមឲ្យ​មានភាពរីកចំរើនបន្តទៀតផងដែរ៕ អត្ថបទ៖ ឃិន សារិទ្ធ