ភ្នំពេញ៖ ថវិកាចំនួន ៥០០លានរៀល ដែលស្មើនឹង ១២ ៥០០០ដុល្លារ ទទួលបានការបត់បេះដូងក្រដាសនឹងផ្ដល់ជូនឧបត្ថម្ភដល់ ក្រុមកីឡាករកីឡាការិនី មានពិការភាពកម្ពុជា។ ថវិកានេះ ជាការឧបត្ថម្ភពី ក្រុមហ៊ុនឯកជនចំនួន ៥ ដែលនឹងឧបត្ថម្ភជាថវិកា ក្នុងបេះដូងមួយស្មើនឹងថវិកាចំនួន ៥០០រៀល។

កម្ពុជាក្រោមការផ្ដួចផ្ដើមពីសហភាពសហព័ន្ធយុវជនកម្ពុជា​ ក្នុងយុទ្ធនាការ BeyondTheGames នឹង​បំបែកកំណត់ត្រាពិភពលោកបេះដូងច្រើនជាងគេ ​នៅថ្ងៃទី១២ ខែមេសាខាងមុខ ក្នុងព្រឹត្តិការណ៍​អង្គរសង្រ្កាន្ត។ គម្រោងបំបែកកំណត់ត្រាពិភពលោកនេះ គឺកំណត់ការបត់បេះដូងក្រដាស​ឱ្យបានចំនួន ១លាន។ ​ក្រៅពីការគ្រោងបំបែកកំណត់ត្រាពិភពលោក បេះដូងចំនួន ១លាននេះ ក៏នឹង​ទទួលបានថវិកាបរិច្ចាកចំនួនសរុប ៥០០លានរៀលពីក្រុមហ៊ុនឯកជនចំនួន ៥ ដើម្បីផ្ដល់ជូន​ឧបត្ថម្ភដល់ ក្រុមកីឡាករមានពិការភាព តាមរយៈគណៈកម្មាធិការជាតិប៉ារ៉ាឡាំពិកកម្ពុជា។ នេះជាការលើកឡើងរបស់ ឯកឧត្តម សុខ សប្បាយណា ប្រធានប្រតិបត្តយុទ្ធនាការ BeyondTheGames។

ឯកឧត្តមប្រធានប្រតិបត្តិបញ្ជាក់ថា ក្រុមហ៊ុនចំនួន ៥ ដែលនឹងឧបត្ថម្ភថវិកាសម្រាប់បេះដូង ១លាននេះ មានដូចជា The Many Foundation ធនាគារ ABA ក្រុមហ៊ុន SMART សាប៊ូ CLEAR និង V-ACTIVE។ ក្រុមហ៊ុនទាំង ៥នេះ នឹងឧបត្ថម្ភថវិកាស្មើគ្នា ដោយផ្ដល់ថវិកាចំនួន ៥០០រៀល សម្រាប់បេះដូង។ ចំពោះអ្នកបត់បេះដូង ជាប្រជាពលរដ្ឋទូទៅគឺមិនតម្រូវឱ្យបរិច្ចាកនោះឡើយ ។

ចំពោះការប្រកាសផ្ដល់ថវិកាជួយ ក្រុមកីឡាករកីឡាការិនីមានពិការភាពដូចនេះ ឯកឧត្តម យី វាសនា អគ្គលេខាធិការ គណៈកម្មាធិការជាតិប៉ារ៉ាឡាំពិកកម្ពុជា ជំនួសមុខឱ្យអត្តពលិកមាន​ពិការភាពទាំងអស់ បង្ហាញនូវក្ដីរីករាយនិងពេញចិត្តជាខ្លាំង។

ឯកឧត្តមថា ថវិកាទាំងនេះនឹងប្រើប្រាស់លើគោលដៅជាច្រើន ដោយនឹងផ្ដល់ជូនផ្ទាល់ទៅ​អត្តពលិក ក៏ដូចជាប្រើប្រាស់ក្នុងការអភិវឌ្ឍនានាដើម្បីបន្សល់ទុកជា កេរ្តិ៍មរតក។

គួរបញ្ជាក់ថា ក្រុមកីឡាករ កីឡាការិនី មានពិការភាពរបស់កម្ពុជា នឹងចូលរួមប្រកួតក្នុងព្រឹត្តការណ៍ អាស៊ានប៉ារ៉ាហ្គេម ដែលកម្ពុជា ​នឹងធ្វើជាម្ចាស់ផ្ទះ។ ​ព្រឹត្តិការណ៍កីឡាដ៏ធំនេះ គឺនឹងប្រព្រឹត្តិ​ទៅក្រោយបញ្ចប់ ព្រឹត្តិការណ៍ស៊ីហ្គេម ដែលកម្ពុជា ធ្វើជាម្ចាស់ផ្ទះផងដែរ។ បច្ចុប្បន្នកីឡរកម្ពុជា ទាំង​កីឡាករតហរផមប្រកួតស៊ីហ្គេម និងកីឡាករមានពិការភាព ត្រៀមប្រកួតប៉ារ៉ាហ្គេម គឺមានភាព​មមាញឹកជាខ្លាំងក្នុងការហ្វឹកហាត់​ ក្នុងគោលដៅសំខាន់រួមមួយគឺ ដណ្ដើមយកមេដាយឱ្យបានច្រើន​ជូនជាតិកម្ពុជា សម្រាប់ការធ្វើជាម្ចាស់ផ្ទះ ​រៀបចំព្រឹត្តិការណ៍កីឡា​ ស៊ីហ្គេម និងអាស៊ានប៉ារ៉ាហ្គេម​ជាលើកដំបូងក្នុងប្រវត្តិសាស្រ្តកម្ពុជា៕ អត្ថបទ៖ គឹមហុក