ភ្នំពេញ ៖ ឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិបានថ្លែងថា កងកម្លាំងនគរបាលជាតិ ដែលត្រូវធានាឲ្យបានជាដាច់ខាតនូវសុវត្ថិភាព សន្ដិសុខ សណ្ដាប់ធ្នាប់ និងរបៀបរៀបរយនោះគឺ ព្រឹត្តិការណ៍​សំខាន់ៗ​ចំនួន៣គឺជាព្រឹត្តិការណ៍អង្គរសង្ក្រាន្ដ, ម្ចាស់ផ្ទះស៊ីហ្គេម និងអាស៊ានប៉ារ៉ាហ្គេម និងការបោះឆ្នោត​ជ្រើស​តាំង​តំណាងរាស្ដ្រនីតិកាលទី៧ ដោយព្រឹត្តិការណ៍ទាំងបីនេះនឹងចាប់ផ្តើមបន្តកន្ទុយគ្នានៅឆ្នាំ ២០២៣នេះ។

ក្នុងឱកាសអញ្ជើញបើកវគ្គបណ្ដុះបណ្ដាលកម្រិតបឋមវិជ្ជាជីវៈនគរបាល និងវគ្គបណ្ដុះបណ្ដាល​ជំនាញបច្ចេកទេស​អក្សរសម្ងាត់ នៅសាលានគរបាលជាតិមិត្តភាពកម្ពុជា-វៀតណាម ដែលមានសិក្ខាកាមសរុបចំនួន២៣៧នាក់នោះ ឧត្តមសេនីយ៍ឯក ឆាយ គឹមខឿន បានគូសបញ្ជាក់ថា កងកម្លាំងនគរបាលជាតិ គឺជាអង្គភាពស្នួលក្នុងការងារការពារ សន្ដិសុខ សណ្ដាប់ធ្នាប់ ដូច្នេះគប្បីត្រូវត្រៀមលក្ខណៈជានិច្ច ដើម្បីរង់ចាំបទបញ្ជាពីថ្នាក់លើ។

លោកឧត្តមសេនីយ៍ឯក ឆាយ គឹមខឿន ក៏បានលើកឡើងអំពីសមិទ្ធផលកន្លងទៅ​របស់អគ្គស្នង​ការដ្ឋាននគរបាល​ជាតិ​ គឺចូលរួមថែរក្សាការពារសន្ដិភាព ធានាបានស្ថេរភាពនយោបាយ ពិសេសសន្ដិសុខផ្ទៃក្នុង ការពារ​បាន​ប្រក្រតី​ភាពរបស់ស្ថាប័នកំពូលៗ រួមទាំងស្ថាប័នព្រះមហាក្សត្រ។ ក្នុងនោះការពារកិច្ចប្រជុំកំពូលអាស៊ាន កិច្ចប្រជុំកំពូល​ពាក់ព័ន្ធ និងកិច្ចការពារព្រឹត្តិការណ៍នយោបាយជាតិការបោះឆ្នោតជ្រើសរើសក្រុមប្រឹក្សាឃុំសង្កាត់ ក៏ត្រូវធានា​បានយ៉ាងល្អផងដែរ។

យ៉ាងណាក៏ដោយ លោកឧត្តមសេនីយ៍ឯក ឆាយ គឹមខឿន ក៏បានផ្តាំផ្ញើ និងណែនាំដល់សិក្ខាកាមទាំងពីរមុខជំនាញ ត្រូវយកចិត្តទុកដាក់ខិតខំរៀនសូត្រ គ្រេបយកចំណេះវិជ្ជាដើម្បីត្រឡប់ទៅអង្គភាពវិញ ធ្វើយ៉ាងណាឲ្យតម្លាភាព និងត្រូវម៉ឺនម៉ាត់ម៉ត់ចត់ ដែរខ្លួនយើងជាមន្ត្រីអនុវត្តច្បាប់ និងជាកងកម្លាំងឲ្យស្រប​ទៅនឹងសម័យ​បច្ចេកវិទ្យា​នាពេល​បច្ចុប្បន្ន និងអនាគត។ លោកក៏បានលើកឡើងពីការរីកចម្រើនផ្នែកបច្ចេកវិទ្យា ព័ត៌មានវិទ្យា ក្នុងនាមកង​កម្លាំងត្រូវ​សិក្សាស្រាវជ្រាវឲ្យទាន់សភាពការណ៍ និងសម័យកាល ក្នុងនោះប្រព័ន្ធផ្សព្វផ្សាយសង្គម (Social Media) ក៏រីកចម្រើន​ណាស់ដែរ ស្នើសុំឲ្យមើលដោយការគិតពិចារណា ថ្លឹងថ្លែងឲ្យបានហ្មត់ចត់។

លោកឧត្តមសេនីយ៍ឯក អគ្គស្នងការរង ក៏បានណែនាំថ្នាក់ដឹកនាំ និងមន្ត្រីក្រោមឱវាទទាំងអស់របស់សាលា រួមមាន៖ ពង្រឹងសាមគ្គីភាពផ្ទៃក្នុង, លើកទឹកចិត្តឲ្យថ្នាក់ដឹកនាំ និងមន្ត្រីទាំងអស់បន្តខិតខំបំពេញតួនាទី ក្នុងនាម​ជា​មជ្ឈមណ្ឌល​​​មួយសម្រាប់បណ្តុះបណ្តាលធនធានមនុស្ស ដើម្បីបំប៉ន និងបន្ថែមជំនាញដល់មន្ត្រីនគរបាលទើបចូលថ្មី និងនគរបាលដែរត្រូវបំពេញជំនាញបន្ថែម ស្របពេលសម័យបច្ចេកវិទ្យានាពេលបច្ចុប្បន្ន គោលបំណង​បម្រើ​ប្រយោជន៍​ជាតិ៕ អត្ថបទ ៖ បានចក់​