ភ្នំពេញ៖ ក្រុមយុវជន អង្គការ សមាគម សង្គមស៊ីវិលចំនួន ១៨ ស្ថាប័ន ដែលធ្លាប់ធ្វើសកម្មភាព​ប្រឆាំង​រាជរដ្ឋាភិបាល និងគាំទ្រនិន្នាការក្រុមប្រឆាំង ឥឡូវបែរមកប្រមូលផ្ដុំគ្នាចងក្រង​ជា​បណ្ដុំអង្គការសង្គមស៊ីវិលមួយ ​ដើម្បីធ្វើការងារគាំទ្រដល់សកម្មភាពរាជរដ្ឋាភិបាល ក្នុងការរួមចំណែកជួយដល់ការងារអភិវឌ្ឍសង្គមជាតិកម្ពុជា លើគ្រប់វិស័យដូចជាការងារសង្គម បរិស្ថាន ជាដើម ​បន្ទាប់ពីពួកគេឈប់ចាញ់ការឃោសនារបស់ក្រុមប្រឆាំង។

តាមរយៈបទសម្ភាសន៍ជាមួយ BTV កាលពីពេលថ្មីៗនេះលោក មួង សូនី អ្នកសម្របសម្រួល​ទីស្នាក់ការកណ្ដាលបណ្ដុំអង្គការសង្គមស៊ីវិល ​និងប្រធានក្រុមយុវជន ១០០ រាត្រី ថ្លែងថា ដោយមើលឃើញកិច្ចខិតខំប្រឹងប្រែងរបស់រាជរដ្ឋាភិបាលជាពិសេសសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជាឥតឈប់ឈរទាំងយប់ទាំងថ្ងៃដើម្បីបុព្វហេតុជាតិ ដូច្នេះដើម្បីរួម​ចំណែក​ក្នុងការអភិវឌ្ឍសង្គមជាតិពួកគេបានសម្រេចប្រមូលផ្ដុំបណ្ដា​ ក្រុមយុវជន អង្គការ សមាគម សង្គមស៊ីវិលនានា ​ចងក្រងជាបណ្ដុំអង្គការសមាគមសង្គមស៊ីវិលមួយ ចូលរួមគាំទ្រសកម្មភាពរាជរដ្ឋាភិបាល។

លោកបញ្ជាក់ថា រាជរដ្ឋាភិបាលសព្វថ្ងៃបានស្រោចស្រង់ដឹកនាំឱ្យកម្ពុជាឱ្យងើបមុខលើឆាកអន្តរជាតិ បង្ហាញពីភាពរីកចម្រើនលើគ្រប់វិស័យ ​រក្សាបាននូវសុខសន្តិភាព ​ឯករាជ្យភាព អធិបតេយ្យ បូរណភាពទឹកដីយ៉ាងពេញលេញ។

ចំណែកលោក ហេង សំណាង ប្រធាបបណ្តុំទីស្នាក់ការកណ្តាល យុវជន អង្គការ សមាគម និងសង្គមស៊ីវិល ប្រកាសអំពាវនាវឲ្យបណ្តាល ​អង្គការ សមាគម ​ចូលរួមបណ្តុំជាមួយគ្នា ដោយ​មិនប្រកាន់និន្នាការ។

លោកថ្លែងថា កន្លងមកប្រជាពលរដ្ឋកម្ពុជាធ្លាប់គ្រោះដោយសារសង្គ្រាមស៊ីវិល​រស់នៅក្នុង​ភាពភ័យខ្លាច អត់ឃ្លាន និងបែកបាក់គ្រួសារ​ ហេដ្ឋារចនាសម្ព័ន្ធត្រូវបានបំផ្លាញគ្រប់ទីកន្លែង ដែល​ប្រវត្តិសាស្រ្ដនេះ បានដក់ជាប់ក្នុងក្រអៅបេះដូងពលរដ្ឋខ្មែរគ្រប់រូបមិនអាចបំភ្លេងបាន និង​មិនចង់ឱ្យកើតមានសារជាថ្មីនោះទេ។

លោកបន្តថា ប្រវត្តិដ៏ជូរចត់កន្លងមកនេះជាមេរៀនសម្រាប់យុវជនគួរគិតគូរឱ្យបានវែងឆ្ងាយ ដើម្បី​បញ្ជៀសការបែកបាក់គ្នាដោយសារអ្នកនយោបាយជ្រុល​និយមរបស់ក្រុមប្រឆាំង ឬបរទេស​ខិលខូចជាដើម។

ក្រុមយុវជនសង្គមស៊ីវិលទាំងអស់គ្នាបានអំពាវនាវដល់បណ្តាអង្គការសង្គមស៊ីវិល ​សារព័ត៌មានជាតិ និងអន្តរជាតិ យុវជនខ្មែរ ​ប្រជាពលរដ្ឋខ្មែរទាំងអស់មេត្តាចូលរួមបន្តរក្សា ​និងការពារសន្តិភាព ស្ថិរភាព​ និងការអភិវឌ្ឍ ដើម្បីជនជាតិខ្មែរជំនាន់ក្រោយអាចបន្តរស់នៅសុខសាន្ត​ជាមួយ​នឹងសន្តិភាពជានិច្ចនិរន្ត៕អត្ថបទ៖ វ៉ន ដារ៉ា