ភ្នំពេញ ៖ កងទ័ពកម្ពុជាចំនួន២,៨៣១នាក់ រួមជាមួយនិងកងទ័ពចិនចំនួន២៥៧នាក់ នឹងធ្វើសមយុទ្ធរួមគ្នាដោយ មានលក្ខណៈទ្រង់ទ្រាយធំក្នុងគោលបំណងការពារនូវសន្តិសុខចំពោះព្រឹត្តិការណ៍ធំៗ និងរបៀបជួយប្រជា ពលរដ្ឋ​ដែល​ជួបគ្រោះមហន្តរាយនានាដែលកើតចេញពីយថាហេតុណាមួយនោះ។ នេះបើតាមការបញ្ជាក់ របស់​ឧត្តមសេនីយ៍ ថោង សូលីម៉ូ អ្នកនាំពាក្យអគ្គបញ្ជាការនៃកងយោធពលខេមរភូមិន្ទ ដែលបានប្រាប់ ទូរទស្សនBTVកាលពីថ្ងៃទី៨ខែមីនាម្សិលមិញនេះ។

លោកឧត្តមសេនីយ៍ទោ បានបញ្ជាក់ថា កងទ័ពកម្ពុជា និងចិន បានឯកភាពគ្នាធ្វើសមយុទ្ធរួមគ្នានៅថ្ងៃទី២៣ ខែមីនា រហូតដល់ថ្ងៃទី៥ ខែមេសា ឆ្នាំ២០២៣ខាងមុខនេះនៅមជ្ឃមណ្ឌល​ហ្វឹកហ្វឺនរបស់កងរាជអាវុធហត្ថ(ភ្នំជុំរីករាយ)ស្ថិតនៅក្នុងភូមិសាស្ត្រ ឃុំពាម ស្រុកសាមគ្គីមានជ័យ ខេត្តកំពង់ឆ្នាំង ដោយសមយុទ្ធនេះ​គឺជាការផ្សារ​ភ្ជាប់​កិច្ច​សហប្រតិបត្តិការរវាងកងទ័ពប្រទេសទាំងពីរក្នុងការលើកកម្ពស់ទំនាក់ទំនងល្អ បង្កើនចំណងសាមគ្គីភាព មេត្រីភាព ការបណ្ដុះបណ្តាលចំណេះដឹង ចំណេះធ្វើ ផ្លាស់ប្ដូរបទពិសោធន៍ ចេះសម្របសម្រួល ចេះរស់នៅនិងធ្វើការងាររួមគ្នា ជាមួយជាតិសាសន៍ជាច្រើនក្នុងពេលធ្វើប្រតិបត្តិការរួមគ្នា ក៏ដូចជាឆ្លើយតប ទៅនឹងបញ្ហាប្រឈម​នានាដែល​មិនមែន​ជាប្រពៃណីជាដើម។

លោកឧត្តមសេនីយ៍ទោ បាន បញ្ជាក់បន្ថែមទៀតថា «សមយុទ្ធឆ្នាំនេះមានឈ្មោះថា នាគមាស ២០២៣ ក្រោម​ប្រធានបទ « ប្រតិបត្តិការការពារសន្តិសុខក្នុងព្រឹត្តិការណ៍ធំៗ និងការជួយសង្គ្រោះ​មនុស្សធម៌​នៃកងទ័ព​ប្រទេស​ទាំងពីរ កម្ពុជា-ចិន»។ ពិធីបើកសមយុទ្ធនេះជាផ្លូវការនៅថ្ងៃទី២៣ ខែមីនានេះ ក្រោមអធិបតីភាពឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងជា មេបញ្ជាការកងទ័ពជើងគោក តំណាង​សម្តេចពិជ័យសេនាទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការ ពារជាតិកម្ពុជា។

បើតាមអ្នកនាំពាក្យរបស់អគ្គបញ្ជាការនៃកងយោធពលខេមរភូមិន្ទរូបនេះ បានឲ្យដឹងផងដែរថា សមយុទ្ធ​នាគមាស​រវាងកម្ពុជា-ចិន យើងបានចាប់ផ្ដើមធ្វើតាំងពីឆ្នាំ២០១៦ រហូតមកដល់ពេលនេះយើងធ្វើរួមគ្នាបានចំនួន ៤លើក​រួចមកហើយ គឺនៅក្នុងឆ្នាំ២០១៦ ,២០១៨, ២០១៩ និងឆ្នាំ ២០២០ ។ យើងផ្អាកចំនួនបីដង គឺនៅឆ្នាំ ២០១៧ ដោយជាប់រវល់ក្នុងយុទ្ធនាការបង្ក្រាបគ្រឿងញៀន និងការបោះឆ្នោតក្រុមប្រឹក្សាឃុំសង្កាត់។ ឆ្នាំ ២០២១ និង​ឆ្នាំ២០២២ដោយសារតែប្រទេសទាំងពីរ ប្រឈមនឹងការឆ្លងរីករាលដាលជំងឺកូវីដ-១៩។

ជាមួយគ្នានោះដែរ លោក ថោង សូលីម៉ូ អ្នកនាំពាក្យអគ្គបញ្ជាការនៃកងយោធពលខេមរភូមិន្ទ ក៏បាន​ប្រកាស​ជូន​ដំណឹង​ដល់បងប្អូនប្រជាពលរដ្ឋកុំឲ្យមានការភ្ញាក់ផ្អើល និងស្លន់ស្លោរពេលដែលកងទ័ព កម្ពុជា និងចិនធ្វើការ​ដឹកសម្ភារៈតាមបណ្តោយផ្លូវជាតិលេខ៥ដើម្បីរៀបចំធ្វើសមយុទ្ធ នៅថ្ងៃទី២០នាពេលខាងមុខនេះផងដែរ៕

អត្ថបទ ៖ បាន ចក់​