កណ្ដាល៖ មន្ទីរអប់រំ យុវជន និងកីឡាខេត្តកណ្ដាល បានប្រកាសរៀបចំការប្រកួតកីឡាសិស្សបឋមសិក្សាជ្រើសជើងឯកប្រចាំខេត្តឆ្នាំ២០២៣ រយៈពេល ១សប្ដាហ៍ចាប់ពីថ្ងៃទី១០ ដល់ថ្ងៃទី១៦ ខែមីនាខាងមុខ ដោយកំណត់កីឡា ៤ប្រភេទ រួមមានកីឡាបាល់ទាត់ បាល់ទះ បាល់បោះ និងកីឡាអត្តពលកម្ម។
លោក ពៅ វណ្ណា ប្រធានការិយាល័យកីឡាអប់រំកាយ និងកីឡាបានឲ្យដឹងថា ការប្រកួតនេះធ្វើឡើងដើម្បីចម្រាញ់បានធនធានកីឡាករ-កីឡាការិនីល្អៗត្រៀមចូលរួមប្រកួតជើងឯកបឋមសិក្សាថ្នាក់ជាតិនាពេលខាងមុខ។ ក្រៅពីកីឡា ៤ប្រភេទនេះ កីឡាផ្សេងៗក៏កំពុងត្រូវបានយកចិត្តទុកដាក់ពីថ្នាក់ដឹកនាំមន្ទីរ ក៏ដូចជារដ្ឋបាលខេត្ត ដើម្បីផ្ដល់ឱកាសឲ្យសិស្សានុសិស្សបានលេងកីឡា និងត្រៀមការប្រកួតនានាផងដែរ។
គួរដឹងថា ខេត្តកណ្ដាលតាមរយៈអង្គភាពជំនាញ គឺជាខេត្តមួយដែលបានជំរុញសកម្មភាពកីឡាយ៉ាងផុសផុល ទាំងក្របខណ្ឌក្នុងវិស័យអប់រំ មហាជន និងការប្រកួតផ្សេងៗ ហើយមានការចូលរួមយ៉ាងផុសផុលទៀតផង ជាក់ស្ដែងក្នុងការប្រកួតក្របខណ្ឌបឋមសិក្សាឆ្នាំនេះគឺមានក្រុមកីឡាមកពី ១១ក្រុង-ស្រុកចូលរួម រួមមានក្រុងតាខ្មៅ, ស្រុកស្អាង, ស្រុកកោះធំ, ស្រុកកណ្តាលស្ទឹង, ស្រុកអង្គស្នូល, ស្រុកពញ្ញាឮ, ស្រុកមុខកំពូល, ស្រុកខ្សាច់កណ្តាល, ស្រុកល្វាឯម, ស្រុកកៀនស្វាយ និងស្រុកលើដែកជាដើម៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
