ឧត្តរមានជ័យ៖ លោកឧត្តមសេនីយ៍ទោ ហួត សុធី ស្នងការនគរបាលខេត្តឧត្តរមានជ័យ បានស្នើរដល់មន្រ្តីនគរបាលដែលជាស្រ្តីទាំងអស់ ត្រូវខិតខំប្រឹងប្រែងពង្រឹងសមត្ថិភាពរបស់ខ្លួន ឲ្យបានប្រសើរបន្ថែមទៀត។

ថ្លែងបែបនេះខណៈដែលលោកឧត្តមសេនីយ៍ទោ ហួត សុធី បានអញ្ជើញជាអធិបតីភាពក្នុង ពិធីសំណេះសំណាល និងអបអរសាទរទិវានារីអន្តរជាតិ ៨មីនា លើកទី១១២ នៅ​ស្នងការដ្ឋាន​នគរបាលខេត្តឧត្តរមានជ័យ ក្រោមប្រធានបទ “ស្ត្រីរួមគ្នា រក្សាសន្តិភាព ដើម្បីកិច្ច​អភិវឌ្ឍន៍​ក្នុងសម័យឌីជីថល” ។

លោកស្នងការ បានលើកឡើងបន្ថែមថា ស្របតាមចក្ខុវិស័យរបស់រាជរដ្ឋាភិបាលកម្ពុជា​បច្ចុប្បន្ននេះ បានចាត់ទុកស្រ្តីគឺជាឆ្អឹងខ្នងដ៏សំខាន់​ក្នុងការរួមចំណែក​អភិវឌ្ឍន៍​ប្រទេសជាតិ។

លោកស្នងការ បន្តថា ទិវាអន្តរជាតិដ៏មានសារៈសំខាន់នេះ គឺជាកម្លាំងចលករ​ជម្រុញឱ្យស្ត្រីត្រូវ​ខិតខំពង្រឹង និងពង្រីកសកម្មភាពបន្ថែមទៀតលើចំណេះដឹង ជំនាញ រក្សាភាព​ម៉ឺងម៉ាត់ ឧស្សាហ៍​ព្យាយាម អំណត់អត់ធន ចូលរួមក្នុងគ្រប់កិច្ចការងារ ​និងក្នុងតួនាទីធ្វើសេចក្តីសម្រេចនានា ដោយសារស្ត្រីជាភ្នាក់ងារនាំមកនូវការផ្លាស់ប្តូរឥរិយាបទ ឆ្ពោះទៅបង្កើនសេចក្តីសុខ សុវត្ថិភាព និង​ភាពចម្រើនរុងរឿងក្នុងគ្រួសារ​ និងសង្គមជាតិ ដូចមានចែងក្នុងយុទ្ធសាស្ត្រចតុកោណ​របស់​រាជរដ្ឋាភិបាលកម្ពុជា ដែលថា ''ស្ត្រី ជាឆ្អឹងខ្នង នៃសេដ្ឋកិច្ចនិងសង្គមជាតិ'' ៕