ប្រដាល់៖ ព្រឹត្តិការណ៍ប្រដាល់គុនខ្មែរ “ម្ចាស់ជើងឯកខ្សែក្រវាត់ខារ៉ាបាវ” រដូវកាលទី៩ ក្នុងប្រភេទទំងន់ ៥៧គីឡូក្រាម នឹងចាប់ផ្តើមជុំទី១ នៅថ្ងៃអាទិត្យចុងសប្តាហ៍នេះហើយ។ កីឡាករគុនខ្មែរ ៤រូប និងថៃបួនរូបត្រូវប្រកួតប្រជែងគ្នាលក្ខណៈវិលជុំសន្សំពិន្ទុ មុនទទួលបានកៅអីវគ្គពាក់កណ្តាលផ្តាច់ព្រ័ត្រ និងផ្តាច់ព្រ័ត្រ។
បន្ទាប់ពី ពេជ្រ សម្បត្តិ ដែលជាម្ចាស់ជើងឯកខ្សែក្រវាត់រដូវកាលទី៨ ឈានដល់រដូវកាលទី៩ ក៏នឹងមានវត្តមានសិស្សច្បងមកពីក្លិបចលនាយុវជន ១៥៧ គុនខ្មែរមួយរូបទៀតមកប្រកួតប្រជែងគឺ ពេជ្រ ប៊ុនសិទ្ធ ក៏ដូចជាវត្តមានរបស់កូនសិស្សលោក ធន់ សុភា មកពីសមាគមកីឡាប្រដាល់ក្រសួងការពារជាតិ ធន់ ផានិត ដែលជាអតីតបេក្ខភាពប្រកួតរដូវកាលទី៨ តែបានត្រឹមលេខ៣។ ក្រៅពីនោះក៏មានកីឡាករពីររូបទៀត សេក គឹមសាន្ត មកពីខេត្តសៀមរាបនៅក្លិបអង្គរជ័យ យោធភូមិភាគទី ៤ និងកីឡាករកំពស់ខ្ពស់ ហុង សុវណ្ណចាន់សុធី មកពីក្លិបបញ្ជាការដ្ឋានទ័ពពិសេស។
ងាកមកសមាភាពកីឡាករថៃរួមមានម្ចាស់មេដាយស៊ីហ្គេម ផេតផាកភូមិខួងក្រៀងក្រៃ អ៊ីនស៊ីណយណៃហ្វ៊ែតារី ថៈឡេងើន ប៉.អាវបាងសេរេ និង ឡាហ្វាន់ ត.ភិសនុឆ័យ។ រូបមន្តនៃការប្រកួតនោះគឺកីឡាករកម្ពុជា និងថៃនៅពូលផ្សេងគ្នា តែត្រូវប្រកួតគ្នាកម្ពុជាប៉ះថៃសរុបម្នាក់ ៤ប្រកួតដណ្តើមយកជ័យជំនះ ៣ពិន្ទុ និងអ្នកចាញ់ ១ពិន្ទុ គ្មានស្មើ។ កីឡាករដែលឈរលេខ ១ និងលេខ ២ ក្នុងពូលនីមួយៗនឹងឡើងវគ្គពាក់កណ្តាលផ្តាច់ព្រ័ត្រ តែកីឡាករក្នុងពូលនីមួយៗត្រូវជួបលេខ ១ និងលេខ ២ ពូលខ្លួនឯងនៅវគ្គនោះ មុនដល់វគ្គផ្តាច់ព្រ័ត្រដែលដាច់ខាតត្រូវតែកីឡាករកម្ពុជាជួបថៃ។ សម្រាប់ការប្រកួតសប្តាហទី១ ជុំទី១ ថ្ងៃអាទិត្យទី១២ នេះ ហុង សុវណ្ណចាន់សុធី ត្រូវជួបជាមួយអ៊ីនស៊ីណយ ណៃហ្វ៊ែតារី និងពេជ្រ ប៊ុនសិទ្ធ ជួបឡាហ្វាន់ ត.ភិសនុឆ័យ៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
