កំពង់ឆ្នាំង៖ នៅថ្ងៃទី១០ ខែមីនា ឆ្នាំ២០២៣ សម្តេច​ព្រះអគ្គ​មហាសង្ឃរាជា​ធិបតីកិត្តិ​ឧទ្ទេស​បណ្ឌិត ទេព វង្ស សម្តេចព្រះមហាសង្ឃរាជាគណៈមហានិកាយ នៃព្រះរាជាណាចក្រកម្ពុជា បាន​និមន្ត​ជា​ព្រះរាជាធិបតីក្នុងពិធីស្រោចស្រពព្រះសុគន្ធវារី និងប្រកាសតែងតាំង ព្រះវិមលញាណ ឆន ឆុង ជា​ព្រះរាជាគណៈថ្នាក់កិត្តិយស និងជាព្រះចៅអធិការវត្តទេពធីតារាម ស្ថិត​ក្នុង​សង្កាត់​ផ្សារ​ឆ្នាំង ក្រុងកំពង់ឆ្នាំង រួមនិងសម្ពោធ​សមិទ្ធផលនានាក្នុងវត្តផងដែរ។

លោក យិន សាវ៉េន អភិបាលរងខេត្តកំពង់ឆ្នាំង បានថ្លែងថា ការរីកចម្រើនរបស់ពុទ្ធចក្រ និង​អាណា​ចក្រ​ត្រូវ​តែដើរទន្ទឹមគ្នា វានឹងផ្តល់ឱ្យគ្នាទៅវិញទៅមក ជាក់​ស្តែង​ព្រះពុទ្ធ​សាសនា​បាន​រួម​ចំណែក​យ៉ាង​ច្រើន​ក្នុង​ការលើកកម្ពស់ការអប់រំសីលធម៌សង្គម និងការកសាងសមិទ្ធផលផ្សេងៗ ជូនសង្គមជាតិទាំងមូល ។ ការពង្រឹងតួនាទីភារកិច្ច វិន័យរបស់ព្រះសង្ឃ និងវត្តអារាម ពិត​ជា​មាន​សារៈសំខាន់ និងអត្ថប្រយោជន៍​យ៉ាង​ធំធេង​នៅ​ក្នុង​ជីវភាព​រស់​នៅ​ប្រចាំ​ថ្ងៃ​របស់​ប្រជាពលរដ្ឋ​ខ្មែរ​យើង ហើយក៏បានផ្តល់ការថែរក្សានូវតម្លៃរបស់ព្រះពុទ្ធសាសនា។

សម្តេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស បានមានព្រះរាជបន្ទូលថា ក្រសួង​ធម្មការ និងសាសនា បានខិតខំយកចិត្តទុកដាក់ពង្រឹងនូវគុណភាពអប់រំ និងវិន័យ ដល់​ព្រះសង្ឃគ្រប់មូលដ្ឋាន ក្នុងការលើកកម្ពស់ដល់វិស័យព្រះពុទ្ធសាសនា ។ ជាពិសេស​លើក​កម្ពស់​ដល់​ការ​ជឿទុក​ចិត្តរបស់ប្រជាពុទ្ធសាសនិក ដែលបានលះបង់ចិត្ត សទ្ធាជ្រះថ្លាមកលើព្រះសង្ឃ ដែល​ជា​បុគ្គលអាចដឹកនាំពួកគេឱ្យទទួលបាននូវបុណ្យកុសល និងការអប់រំផ្លូវកាយ និងផ្លូវចិត្ត ឱ្យ​ឆ្ពោះ​ទៅ​រកភាពស្ងប់ស្ងាត់ ភាពអត់ឱន និងអធ្យាស្រ័យដល់អ្នកដទៃ ។

សម្តេច​ព្រះអគ្គមហាសង្ឃរាជបានពន្យល់ថា ក្នុងនាមជាថ្នាក់ដឹកនាំគ្រប់លំដាប់ថ្នាក់ ត្រូវមាន​ព្រហ្ម​វិហារ​ធម៌​ទំាង​បួន​យ៉ាងគឺ មេត្តា ករុណា មុទិតា និង ឧបេក្ខា ព្រមទាំងមានការឯកភាពផ្ទៃក្នុង លះបង់​អំពើ​អបាយមុខ ហើយត្រូវចងចាំថា ការបែកបាក់សាមគ្គី គឺស្លាប់ និងត្រូវខិតខំ​បំពេញ​នូវ​តួនាទី​ភារកិច្ចជាមួយពុទ្ធបរិស័ទ ដើម្បីដឹកនាំវិស័យព្រះពុទ្ធសាសនា ឱ្យរីក ចម្រើនតទៅមុខទៀត ៕ អត្ថបទ៖ ហុង វាស្នា